પૂર્વ-પશ્ચિમ અમદાવાદના ઘણાં વિસ્તારમાં ધોધમાર વરસાદ, જુઓ તસવીરોમાં...

અમદાવાદમાં સમી સાંજે અચાનક વાતાવરણમાં પલટો સર્જાયો છે. ત્યારે શહેરના અનેક વિસ્તારમાં ધોધમાર વરસાદ ખાબક્યો હતો.

અમદાવાદના એસજી હાઇવે વિસ્તાર, પ્રહ્લલાદ નગર, બોડકદેવ, સરખેજ, વેજલપુર, બોપલ, થલતેજ, ચાંદખેડામાં વરસાદી માહોલ છવાઈ ગયો હતો. તો બીજી તરફ પૂર્વ વિસ્તારમાં પણ ધોધમાર વરસાદ ખાબક્યો હતો. હીરાવાડી, બાપુનગર, ઠક્કરબાપા નગર, વિરાટનગર વિસ્તારમાં ભારે વરસાદ ખાબક્યો હતો.

ગુજરાતના હવામાન વિભાગે આગામી પાંચ દિવસ સુધી વરસાદની આગાહી વ્યક્ત કરી છે. વેસ્ટર્ન ડિસ્ટર્બન્સ (પશ્ચિમ વિક્ષોભ)ના કારણે વરસાદ થવાની શક્યતાઓ વ્યક્ત કરવામાં આવી છે.

તારીખ 28-29 મેએ વરસાદ થવાની સંભાવનાઓ વ્યક્ત કરવામાં આવી છે. જ્યારે અમદાવાદ માટે યલો એલર્ટ આપવામાં આવ્યું છે.

ગુજરાતના આગામી પાંચ દિવસના હવામાન અંગેની શક્યતાઓ વ્યક્ત કરીને અમદાવાદ હવામાન કેન્દ્રના ડિરેક્ટર ડૉ. મનોરમા મોહંતીએ જણાવ્યું છે કે, રાજ્યમાં આગામી પાંચ દિવસ સુધી હવામાન સૂકું રહેવાની શક્યતાઓ છે.

આ ઉપરાંત લોકલ કન્વેક્ટિવિટી એક્ટિવિટીની હાલ સંભાવના નથી, જો શક્યતાઓ દેખાશે તો તે અંગેની માહિતી આપવામાં આવશે. જો કે, તેમણે આગામી દિવસોમાં વરસાદ થવાની સંભાવનાઓ વ્યક્ત કરી છે.

મહત્ત્વનું છે કે, અમદાવાદના નરેન્દ્ર મોદી સ્ટેડિયમમાં મુંબઈ ઇન્ડિયન્સ અને ગુજરાત ટાઇટન્સ આજે IPL 2023ની બીજી ક્વોલિફાયરમાં એકબીજા સામે ટકરાશે. ત્યારે હવે આ મેચ માટે વરસાદનું વિઘ્ન આડે આવી ગયું છે.