Ahmedabad Rain: અમદાવાદમાં ભરશિયાળે વરસાદની જમાવટ, માવઠા સાથે ધુમ્મસનું સામ્રાજ્ય

અમદાવાદ: આજે સતત બીજા દિવસે પણ રાજ્યના વાતાવરણમાં પલટો જોવા મળી રહ્યો છે. આજે રવિવારે રાજ્યના વિવિધ શહેરો સહિત અમદાવાદમાં પણ વરસાદ ખબાક્યો છે. આજે વહેલી સવારથી જ અમદાવાદમાં વરસાદ જોવા મળી રહ્યો છે. અમદાવાદમાં ભરશિયાળે સતત બીજા દિવસે વરસાદ વરસ્યો છે.

હવામાન વિભાગની આગાહી મુજબ રાજ્યના અનેક વિસ્તારોમાં વરસાદ વરસી રહ્યો છે. વહેલી સવારે જ અમદાવાદ શહેરના રસ્તાઓ પર પાણી-પાણી જોવા મળી રહ્યું હતું. જાણે ચોમાસું જામ્યુ હોય તેવો માહોલ જોવા મળી રહ્યો છે. સાથે જ શહેરમાં ધુમ્મસનું સામ્રાજ્ય પણ જોવા મળી રહ્યું છે.

ગઇકાલે શનિવારે અમદાવાદના ઘણા વિસ્તારોમાં વાતાવરણમાં પલટો આવ્યો હતો. બપોરે શહરેના ઘણા વિસ્તારોમાં કમોસમી વરસાદ પડ્યો હતો. વટવા, નારોલ, લાંભા, રામોલ, મણીનગરમાં વરસાદ પડ્યો હતો. ઈસનપુરમાં બપોરે માવઠું પડ્યું હતું. સવારથી ધૂમ્મસભર્યું વાતાવરણ હતું, ત્યારે બપોરે વરસાદ ખાબક્યો હતો.

ગઇકાલે અમદાવાદના એસપી રીંગ રોડ પર કરા સાથે વરસાદ પડ્યો હતો. હાથીજણ સર્કલ રોડ પર કરા પડ્યા હતા. સાથે જ આસપાસના વિસ્તારોમાં કમોસમી વરસાદ પડ્યો હતો.

હવામાન વિભાગની આગાહી અનુસાર, રાજ્યમાં પૂર્વ દક્ષિણના પવનો ફૂંકાયા છે. આજે રાજ્યના વાતાવરણ પલટો રહેશે. સાથે જ સામાન્ય વરસાદની આગાહી કરવામાં આવી છે. રાજ્યમાં અમુક વિસ્તારમાં સામાન્ય વરસાદની સંભાવના છે. જ્યારે 24 કલાક બાદ ફરી ઠંડીનું જોર વધશે.