Ahmedabad Rain: અમદાવાદમાં બે કલાકમાં 2 ઈંચ જેટલો વરસાદ, અખબારનગર અંડરપાસ બંધ કરાયો

અમદાવાદ: રાજ્યમાં ભારે વરસાદની આગાહી વચ્ચે અમદાવાદ સહિત રાજ્યમાં 75 તાલુકાઓમાં વરસાદ નોંધયા છે. આજે સાંજે ચાર વાગ્યા બાદ અમદાવાદમાં શરૂ થયેલા વરસાદને લીધે ઠેર-ઠેર પાણી ભરાયા છે. અમદાવાદમાં 2 કલાકમાં ગાજવીજ સાથે વરસાદ નોંધાયો છે અને હજુ પણ વરસાદ ચાલુ જ છે. અનેક જગ્યાએ પાણી ભરાતા ટ્રાફિકજામની દ્રશ્યો સર્જાયા છે. સાથે જ વરસાદને પગલે અખબારનગર અંડરપાસ બંધ કરાયો છે. અમદાવાદમાં છેલ્લા બે કલાકમાં બેથી દોઢ ઇંચ જેટલો વરસાદ નોંધાયો છે.

અમદાવાદમાં બે કલાકમાં પાલડીમાં 2 ઈંચ, જોધપુરમાં 1.5 ઈંચ વરસાદ પડ્યો છે. મણિનગર, બોપલ, બોડકદેવમાં 1 ઈંચ વરસાદ ખાબક્યો છે. ચકુડિયા અને ઉસ્માનપુરામાં અડધો ઈંચ વરસાદ, જ્યારે સરખેજ અને મકતમપુરામાં પણ અડધો ઈંચ વરસાદ પડ્યો છે. ખાસ કરીને જીવરાજ અને વેજલપુર સહિતના વિસ્તારોમાં ઢીંચણસમા પાણી ભરાયા છે.

આજે અમદાવાદના વેજલપુર, જીવરાજ, સેટેલાઇટ, એસજી હાઇવે, રાણીપ, ઉસમાનપુરા, ગોતા, આંબાવાડી, એરપોર્ટ વિસ્તાર, પાલડી વિસ્તારમાં ધોધમાર વરસાદ પડ્યો છે. સાંજે એક રાઉન્ડ બાદ વરસાદે થોડો વિરામ લીધો હતો, પરંતુ હવે ફરીથી મોટાભાગના વિસ્તારોમાં વરસાદ શરૂ થયો છે. ખાસ કરીને સતત વરસાદને લીધે નીચાણવાળા વિસ્તારોમાં પાણી ભરાયા છે અને ઘણી જગ્યાએ રસ્તાઓ પર પાણી ભરાતા વાહન વ્યવહારને પણ મુશ્કેલીનો સામનો કરવો પડી રહ્યો છે.

રાજ્યમાં અમદાવાદ સિવાય મોટાભાગના વિસ્તારોમાં વરસાદ નોંધાયો છે. 12 કલાકમાં રાજ્યના 75 તાલુકામાં વરસાદ પડ્યો છે. જેમાં 8 તાલુકામાં 1 ઈંચથી વધુ વરસાદ. કરજણ, ઉમરપાડા, સુબિરમાં 1.5 ઈંચ વરસાદ. સિનોર અને પાલનપુરમાં 1.5 ઈંચ વરસાદ. જોટાણા, દાહોદ અને મોરવા હડફમાં 1 ઈંચ વરસાદ નોંધાયો છે.

હવામાન વિભાગે આગાહી કરી છે કે આગામી 5 દિવસ વરસાદી માહોલ યથાવત રહેશે. કેટલાક વિસ્તારમાં ભારે વરસાદ થશે તો અન્ય વિસ્તારોમાં સામાન્યથી મધ્યમ વરસાદ થશે. જોકે તાપમાન ઊંચું અને ભેજનું પ્રમાણ વધતા થન્ડર સ્ટ્રોમ એક્ટિવિટી થશે. જેના કારણે પવન સાથે વરસદની સંભાવના છે.