અમદાવાદની ચોંકાવનારી ઘટના: ઘરકંકાસમાં પતિએ પત્નીની હત્યા કરી, ઘરે લગાવી આગ

દીપિકા ખુમાણ, અમદાવાદ: આજે સવારે શહેરના ગોદરેજ ગાર્ડન સિટીમાં આવેલી બિલ્ડિંગમાં આગ લાગી હોવાની ઘટના સામે આવી હતી. આગને પગલે અફરાતફરી મચી જવા પામી હતી, જ્યારે આગ પર કાબૂ મેળવવાના પ્રયાસો હાથ ધરવામાં આવ્યા હતા. આ ઘટનામાં એક મહિલાના મોતની જાણકારી મળી હતી. પરંતુ પ્રથામિક તપાસમાં જે માહિતી સામે આવી હતી, તે ખૂબ જ ચોંકાવનારી હતી. આ જે-તે કારણસર લાગેલી આગ નહોતી. પતિએ પત્નીની હત્યા બાદ આગ લગાવી હોવાનું ખુલ્યું હતું. ઘરકંકાસમાં પતિએ પત્નીની હત્યા કરી આગ લગાવી હતી.

આ સાથે જ સિક્યોરિટી ગાર્ડનું નિવેદન સામે આવ્યું છે. જેમાં સિક્યોરિટી ગાર્ડે પતિ-પત્નીને ચપ્પાના ઘા મારેલી હાલતમાં જોયા હતા. બન્ને ગંભીર રીતે ઘાયલ હતા અને તે દરમિયાન જ અચાનક આગ લાગી હતી. ફાયર વિભાગના અધિકારીએ જણાવ્યું હતું કે, જ્યારે અમારી ટીમ ઘટના સ્થળે પહોંચી ત્યારે મકાન માલિક ઝખમી હાલતમાં નીચે હતા અને આગ પર કાબૂ મેળવવાના પ્રયાસ હાથ ધર્યા હતા. જોકે, આગ પાછળનું કારણ હાલ સામે આવ્યું નથી.

આ સમગ્ર મામલે પતિએ પોલીસને નિવેદન આપ્યું છે. ડી. વી. રાણા (એસીપી એલ ડિવિઝન)એ જણાવ્યું હતું કે, આ બનાવ સવારે 9.30 કલાકનો છે. ઘટનાને પગલે ચાંદખેડા પોલીસ ઘટના સ્થળે પહોંચી હતી, જ્યારે અનિલભાઈ સોલા સિવિલ હતા. દંપત્તિ બ્રેડ બટર નાસ્તો કરી રહ્યા હતા. આ દરમિયાન નાસ્તો વાસી હોવા મામલે ઝગડો શરૂ થયો હતો. જે દરમિયાન પત્નીએ પોતાના પર છરીના ઘા ઝીંક્યા હતા અને ગેસ કનેક્શન કાઢીને આગ લાગવાનો પ્રયાસ કર્યો હતો. સાથે જ અનિલભાઈએ બચાવ-બચાવની બૂમો પાડી હતી. પોલીસ તપાસ તપાસ કરી રહી છે કે, અન્ય બાબતોનું મન દુઃખ હતું કે નહીં? ઘટના સ્થળ પર એફએસએલની ટીમ તપાસ માટે પહોંચી છે. અનિલભાઈ ટોરે જાપાનીઝ કંપનીમાં સેલ્સ મેનેજર તરીકે વર્ક ફ્રોમ હોમ કામ કરતા હતા. ઉપરાંત, તેમણે વર્ષ 2017માં આ ઘર લીધું હતું. અવારનવાર પરિવારના લોકો પણ ઘરે આવતા હતા. જ્યારે પત્ની માનસિક તણાવમાં રહેતી હતી. આ મામલે બાળકોની પૂછપરછ પણ ચાલુ છે. પત્નીની બહેનને પણ બોલાવ્યા છે. તપાસ મામલે ફિગરપ્રિન્ટ કોલ ડેટા તમામનો ઉપયોગ કરવામાં આવશે.

આ બનાવા અંગે સ્થાનિક લોકોએ જણાવ્યું હતું કે, આ પતિ-પત્ની ચાર-પાંચ વર્ષથી અહીં રહેતા હતા અને તેમની વચ્ચે મનદુખ હોવાનું પણ સ્થાનિકો જણાવી રહ્યા છે.

પ્રાથમિક માહિતી અનુસાર, આ ઘટનામાં આગ લગાવનાર પતિ પણ ગંભીર રીતે દાઝ્યો છે. જેને સારવાર માટે હોસ્પિટલ ખસેડવામાં આવ્યો છે.

સ્થાનિકો અનુસાર, આજે અચાનક બંને પતિ-પત્ની ઝઘડતા ઝઘડતા સિડી ઉતરીને નીચે આવી રહ્યા હતા. આ સમયે બન્ને ચપ્પાના ઘા મારેલી હાલતમાં જોવા મળ્યા હતા.

પ્રાપ્ત માહિતી અનુસાર, આ યુગલના એક પુત્ર અને પુત્રી પણ છે. સવારે બાળકોને શાળાએ મૂકીને આવ્યા બાદ બંને વચ્ચે ઝઘડો થયો હતો. ઝઘડા દરમિયાન ચપ્પુના ઘા ઝીંકાયા હોવાનું અનુમાન છે. જે પછી ઘરમાં આગ લગાડી હોઇ શકે છે. આ ઘટનામાં પત્નીનું મોત થયું છે. પતિ ઇજાગ્રસ્ત થતાં હોસ્પિટલ ખસેડવામાં આવ્યો છે.

મળતી માહિતી અનુસાર, મૃતકનું નામ અનિતા બઘેલા હોવાનું જાણવા મળ્યું છે, જ્યારે પતિનું નામ અનિલ બઘેલ છે. દંપત્તિનો પુત્ર ધો. 8 અને પુત્રી ધો. 6માં અભ્યાસ કરે છે.

આગને પગલે ફાયરની 6 ગાડી ઘટના સ્થળે દોડી આવી હતી અને આગ પર કાબૂ મેળવવાના પ્રયાસો હાથ ધરવામાં આવ્યા હતા.