અમદાવાદઃ જો તમે વાહનની ડેકીમાં કિંમતી વસ્તુ મૂકી રહ્યા છો તો ચેતી જજો, ક્યાંક પસ્તાવાનો વારો ન આવે

અમદાવાદઃ શહેરમાં વાહનની ડેકીમાંથી કિંમતી ચીજવસ્તુઓની ઉઠાંતરી કરતી ગેંગનો (thieves Gang) આતંક જાણે કે દિવસેને દિવસે વધી રહ્યો હોય તેવું લાગી રહ્યું છે. બે દિવસ પહેલા રામોલમાં ગયેલા જવેલર્સના કર્મચારીના (Jewelers Employees) એક્ટિવાની ડેકીમાંથી રૂપિયા 26 લાખના દાગીના અને રોકડ રકમ ભરેલો બેગની ઉઠાંતરી નો બનાવ સામે આવ્યો હતો. બાદમાં હવે સરખેજ પોલીસ સ્ટેશન (sarkhej police station) વિસ્તારમાં પણ આ પ્રકારનો વધુ એક બનાવ સામે આવ્યો છે.

સરખેજ વિસ્તારમાં રહેતા મુસ્તાકભાઈ શેખે સરખેજ પોલીસ સ્ટેશનમાં ફરિયાદ નોંધાવી છે કે તેઓ સરખેજ બાવળા રોડ પર ઝલક કોમ્પલેક્ષમાં છેલ્લા વીસ વર્ષથી ટ્રાન્સપોર્ટનો ધંધો કરે છે. ગઈકાલે બપોરે ચારેક વાગ્યાની આસપાસ તેઓ તેમનું એકટીવા લઈને સાણંદ સર્કલ નજીક આવેલ આર.કે આંગડિયા પેઢીમાં ગયા હતા.

અને ત્યાંથી રૂપિયા 4 લાખ 99 હજાર રોકડા લીધા હતા. જે રૂપિયા એક બ્લેક કલરની બેગમાં મૂકીને બેગ એકટીવાની ડેકીમાં મૂકીને તેઓ તેમના કોમ્પલેક્ષ નજીક આવેલ ચાની કીટલી પર ચા પીવા માટે ગયા હતા. બાદમાં તેઓ ઝલક કોમ્પલેક્ષના ગેટ પાસેએકટીવા પાર્ક કરીને કોમ્પલેક્ષમાં આવેલ તેમના ગેરેજ પર ગયા હતા.

જો કે દસેક મિનિટ બાદ તેઓ જ્યારે પરત ફર્યા ત્યારે તેમણે જોયું તો એકટીવાની સીટ નીચેની ડેકી ખુલેલી હાલતમાં હતી. જ્યારે ડેકીમાં મૂકેલું પર્સ પણ ગાયબ હતું. એકટીવાના સ્ટેરીંગ પાસે આવેલ નોક પણ તૂટેલી હાલતમાં જોવા મળ્યું હતું.

જે અંગેની જાણ તેઓએ પોલીસને કરતા હાલમાં પોલીસએ સીસીટીવીના આધારે આ સમગ્ર મામલે વધુ તપાસ શરૂ કરી છે. સીસીટીવીમાં પણ બે ગઠીયાઓ આ ઘટનાને અંજામ આપતા કેદ થયેલ હોવાનુ જોવા મળી રહ્યું છે.