Ahmedabad Honey Trap Case: અમદાવાદના ઉદ્યોગપતિ સામે યુવતીએ કપડા ઉતાર્યા તે કેસમાં મોટો ભેદ ખુલ્યો

ફોન પર વર્ચ્યુઅલ રીતે શરીર સુખ માણવાની લાલચમાં આવીને લપસી પડેલા અમદાવાદના નવરંગપુરાના ઉદ્યોગપતિના કેસમાં મોટો વળાંક આવ્યો છે. આ કેસમાં માત્ર ધોરણ-11 પાસ રાજસ્થાનના 22 વર્ષના યુવકે ભેજાબાજી કરીને ઉદ્યોગપતિને ફસાવ્યા હતા. આ શખ્સે ઉદ્યોગપતિને ફસાવ્યા બાદ તેમની પાસેથઈ 2.70 કરોડ રૂપિયા પડાવ્યા હતા. પોલીસે તાલિમ તાહિરખાન નામના શખ્સની ધરપકડ કરી લીધી છે.

સાયબર સેલે ફરિયાદ મળ્યા બાદ ટેક્નિકલ તપાસ કરીને આરોપીની લોકેશન ડિટેઈલ્સ મેળવી હતી. જેમાં આરોપી રાજસ્થાનના ભરતપુર જિલ્લાના ચંદુપુરા ગામનો હોવાનું બહાર આવ્યું હતું. પોલીસે આ મામલે તપાસ કરીને 22 વર્ષના તાલિમ ખાન નામના શખ્સની ધરપકડ કરી લીધી છે.

માત્ર ધોરણ-11 પાસ તાલિમ ખાને ગજબનું ભેજું વાપરીને અમદાવાદના ઉદ્યોગપતિને ટાર્ગેટ બનાવ્યા હતા. પોતાની વોટ્સએપ પ્રોફાઈલમાં આરોપી તાલિમ છોકરીનો ફોટો મૂકીને માત્ર Hi મેસેજ કરતો હતો. આ પછી જો વાત આગળ વધે તો તે સામેવાળી વ્યક્તિને ફસાવવા માટે બીજી ચાલ ચાલતો હતો.

જો આરોપી તાલિમને લાગે કે સામેવાળી વ્યક્તિ તેની જાળમાં ફસાઈ છે તો તે બીજા ફોનમાં છોકરી કપડાં ઉતારતી હોય તેવો વીડિયો બતાવતો હતો. જેથી ફસાઈ રહેલી વ્યક્તિને એવું લાગે કે સામેના છેડે છોકરી નગ્ન થઈને કપડાં ઉતારી રહી છે. આ જોઈને જેવી શિકાર બની રહેલી વ્યક્તિ કપડા ઉતારે કે તેની વીડિયો સ્ક્રીન રેકોર્ડ કરવામાં આવતી હતી.

આ વીડિયો સ્ક્રીન એકાદ મિનિટ જેટલી રેકોર્ડ થઈ જાય એટલે આરોપી તાલિમ વીડિયો કૉલ કટ કરી નાખતો હતો. અને પછી શિકાર બનાવી હોય તે વ્યક્તિને ન્યૂડ ક્લિપ આવી ગઈ હોવાનું કહીને વિવિધ રીતે ધમકી આપીને રૂપિયા પડાવવાનું શરુ કરતો હતો.

અમદાવાદના ઉદ્યોગપતિ પાસેથી આરોપી અને તેની ગેંગે કુલ 2.70 કરોડ રૂપિયા પડાવ્યા હતા. રિપોર્ટ્સ પ્રમાણે આ કેસમાં તાલિમ ખાને પીઆઈ અર્જુન મીણા અને ગુજરાત પોલીસના રોહિતકુમાર તરીકેની ઓળખ આપીને 1.17 કરોડ રૂપિયા પડાવ્યા હતા.

કઈ રીતે અમદાવાદના ઉદ્યોગપતિ ફસાયા?: રિપોર્ટ્સ મુજબ તારીખ 8 ઓગસ્ટ 2022માં ઉદ્યોગપતિને રાત્રે 10 વાગ્યે રિયા શર્મા તરીકે ઓળખ આપનારી યુવતીનો મેસેજ આવ્યો હતો. યુવતીએ Hi લખ્યાનો જવાબ ઉદ્યોગપતિએ Hello સાથે આપ્યો હતો. આ પછી બન્ને વચ્ચે વાતની શરુઆત થઈ જેમાં યુવતીએ પોતે મોરબીની હોવાનું કહીને વીડિયો કૉલ કર્યો હતો.

યુવતીએ વીડિયો કૉલમાં રંગીન પળો માણવાની ઓફર ઉદ્યોગપતિ સમક્ષ મૂકી હતી. જોકે, ઉદ્યોગપતિએ આમ કરવાનો ઈનકાર કરી દીધો હતો. આમ છતાં યુવતીએ પોતાના પ્લાન પ્રમાણે ચાલુ વીડિયો કૉલમાં કપડાં ઉતારી નાખ્યા હતા. રિયાએ આ તો માત્ર વીડિયો છે તેમ કહીને અનેક લોકોને કૉલ કરતી હોવાની વાત કહી હતી, આ પછી વેપારીએ પણ પોતાના કપડાં ઉતારી નાખ્યા હતા અને એક મિનિટ સુધી કૉલ ચાલ્યા બાદ યુવતીએ ફોન કાપી નાખ્યો હતો.

વર્ચ્યુઅલ શરીર સુખની લાલચમાં વેપારીએ વીડિયો કૉલ દરમિયાન કપડાં ઉતાર્યા બાદ તેમને જ પોતાનો વીડિયો મોકલીને ધમકીઓ આપવાનું શરુ કરવામાં આવ્યું હતું જેમાં પોલીસની ધમકી, વીડિયો વાયરલ કરવાની ધમકી અને યુવતીએ આપઘાત કરી લીધો હોવાની ધમકી આપીને કરોડો ખંખરવાનું શરુ કર્યું હતું. ઉદ્યોગપતિએ સાયબર સેલને મંગળવારે રાત્રે ફરિયાદ નોંધાવી હતી, જેમાં પોલીસને સફળતા મળી છે.