વલસાડ : કરોડો રૂપિયાની કિંમતના ચોરીના વાહનો સાથે ભેજાબાજ ગેંગના 3 સાગરીત ઝડપાયા

ભરતસિંહ વાઢેર, વલસાડ : જિલ્લા એલસીબી પોલીસના એક મસ મોટી સફળતા મળી છે. જેમાં કરોડો રૂપિયાની કિંમતના ચોરી કરેલા મોટા વાહનો સાથે આંતરરાજ્ય વાહનચોર ગેંગના 3 સાગરીતોને ઝડપી લીધા છે. પોલીસની આ કાર્યવાહીમાં અત્યાર સુધી 1.14 કરોડ રૂપિયાનો મુદ્દામાલ જપ્ત કર્યા છે, અને દેશના વિવિધ રાજ્યોમાં થયેલા મોટા વાહનોની ચોરીના અનેક ગુનાઓના ભેદ ઉકેલવામાં વલસાડ જિલ્લા પોલીસને સફળતા મળી છે. હજુ પણ આગામી સમયમાં વાહન ચોરીના અનેક ગુનાઓના ભેદ ઉકેલવાની શકયતા જોવાઈ રહી છે.

બનાવની વિગત મુજબ વલસાડ જિલ્લા પોલીસવડા ડૉ રાજદીપસિંહ ઝાલા અને વલસાડ એલસીબી પીઆઈ જે.એન ગોસ્વામીની ટીમને છેલ્લા કેટલાક સમયથી જિલ્લામાં એક મોટી આંતરરાજ્ય વાહનચોર ગેંગ સક્રિય હોવાની બાતમી મળી હતી. ત્યારથી જ વલસાડ જિલ્લાની પોલીસ આ આંતરરાજ્ય ગેંગને ઝડપવા તપાસમાં હતી. એ દરમિયાન જ એલસીબીની ટીમને મળેલી બાતમીને આધારે એલસીબી પીઆઇ જે. એન.ગૌસ્વામી અને તેમની ટીમે વાપી નજીક અમદાવાદ-મુંબઈ નેશનલ હાઈવે પર થી ત્રણ શંકાસ્પદ વ્યક્તિઓની અટકાયત કરી હતી, અને ત્યારબાદ તેમની આગવી ઢબે સરભરા કરી પૂછપરછ કરતા એક મસમોટું આંતરરાજ્ય વાહન ચોરીનું રેકેટ ઝડપાયું છે.

આરોપીઓની અત્યાર સુધીની પૂછપરછ કરતાં જે હકીકત બહાર આવી છે, તે જાણીને ખુદ પોલીસ પણ ચોંકી ગઈ હતી. પોલીસે અત્યારે આરોપીઓ પાસેથી દેશભરના વિવિધ રાજ્યોમાંથી ચોરી કરેલા 13 મોટા આઈસર ટેમ્પો અને 2 કાર મળી કુલ 15 વાહનો કબજે કર્યા છે, અને રૂપિયા 1.14 કરોડના મુદ્દામાલ સાથે 3 આરોપીઓની ધરપકડ કરી છે. પોલીસની પ્રાથમિક તપાસમાં બહાર આવ્યું છે કે, વાહન ચોરીના રેકેટમાં ઝડપાયેલા આરોપીઓ મોહમ્મદ સલમાન મહંમદ શકીલ, મહમૂદ રમઝાન ખાન, મોહમ્મદ જાબીર અબ્દુલ ગફાર શેખ નામના ત્રણેય આરોપીઓ ભારતના વિવિધ રાજ્યોમાંથી મોટેભાગે બ્રાઉન કલરના આઇશર ટેમ્પો અને કાર જેવા મોટા વાહનોની ચોરી કરતા હતા, ત્યારબાદ ટોટલ લોસમાં ગયેલા વાહનોની આર.સી બુક મેળવતા હતા. ત્યારબાદ આ વાહનોના ચેચીસ અને એન્જિન સાથે છેડછાડ કરી એનકેન પ્રકારે પૂર્વોત્તર રાજ્યો એટલે કે નાગાલેન્ડ, મિઝોરમ અને અરૂણાચલ જેવા રાજ્યોના આરટીઓમાંથી એન.ઓ.સી મેળવી લેતા હતા, અને ત્યારબાદ પૂર્વોત્તરના રાજ્યોમાંથી હજારો કિલોમીટર દૂર આવેલા સંઘપ્રદેશ દમણના આર.ટી.ઓ વિભાગમાં તે ચોરીના વાહનોનું રી-પાર્સિંગ કરાવી અને તેને વેચી મારતા હતા.

આ પણ વાંચો - 'પૈસે દે', કિન્નરોએ અર્ધનગ્ન થઈ પેસેન્જરોને માર માર્યો, વિચિત્ર ઘટનાનો LIVE VIDEO

આ ભેજાબાજ વાહનચોર ગેંગે અત્યાર સુધી અનેક વાહન ચોરીના ગુનાઓને અંજામ આપ્યા છે. પોલીસે અત્યારે દેશના વિવિધ રાજ્યોમાંથી ચોરી કરેલા બ્રાઉન કલરના 13 આઇશર ટેમ્પો અને 2 કાર મળી ચોરીના કુલ 15 વાહનો જપ્ત કર્યા છે.. જેની કુલ કિંમત 1.14 કરોડ થી વધુ થાય છે. પોલીસે આ આંતરરાજ્ય વાહનચોર ગેંગના ત્રણ સાગરીતોની ધરપકડ કરી. દેશના મહારાષ્ટ્ર દિલ્લી સહિત અન્ય રાજ્યોમાં થયેલા મોટા વાહનોની ચોરીના ગુનાઓના ભેદ ઉકેલવામાં વલસાડ જિલ્લા પોલીસને સફળતા મળી છે, અને હજુપણ આરોપીઓની આગવી ઢબે સરભરા કરી ઉંડાણપૂર્વકની પૂછપરછમાં આગામી સમયમાં દેશના વિવિધ રાજ્યોમાં થયેલા મોટા વાહન ચોરીના અનેક ગુનાઓના ભેદ ઉકેલાવાની શક્યતા જોવાઇ રહી છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Theft case, Valsad news, Valsad police