ગ્રાહકે ગોલ્ડ લોન લઈ 19.59 લાખના દાગીના ગીરવે મુક્યા હતા, દાગીના બેંક કેશિયરે ચાંઉ કરી ગયો

ભરતસિંહ વાઢેર, વાપી: વાપીની એક બેંકના કેશિયરે જ બેંકના એક ગ્રાહક અને બેંક સાથે છેતરપિંડી કરી છે. ગ્રાહકે ગોલ્ડ લોનના બદલામાં બેંકમાં ગીરવે મુકેલા સોનાના અસલી દાગીનાને બદલે નકલી દાગીના મૂકી અને છેતરપિંડી આચરી હોવાનું બહાર આવ્યું છે. આ મામલે બેંક દ્વારા બેંકના કેશિયર વિરૂધ ફરિયાદ દાખલ કરાવતા વાપી ટાઉન પોલીસે છેતરપિંડી કરનાર કેશીયરની ધરપકડ કરી સળિયા પાછળ ધકેલી દીધો છે.

છેતરપિંડી કરનાર કેશીયરની ધરપકડ

વાપીના ચલા વિસ્તારમાં આવેલી યુનિયન બેન્ક ઓફ ઇન્ડિયામાં વાપીના છરવાડા રોડ વિસ્તારમાં રહેતા એક એક મહિલા ગ્રાહકે ગોલ્ડ લોન લેવા પોતાના અસલી દાગીના ગીરવે મૂક્યા હતા. બેંકના આ મહિલા ગ્રાહકે પોતાના 19.59 લાખની કિંમતના અસલી દાગીના ગીરવે મૂકી બેંકમાંથી ગોલ્ડ લોન લીધી હતી. વર્ષ 2022ના ડિસેમ્બર મહિનામાં બેંકનું રૂટીન ઓડિટ કરાવવામાં આવ્યું હતું. જેમાં કેરળ જ્વેલરી વર્કસ દ્વારા બેંકમાં ગોલ્ડ લોન લેવા માટે ગ્રાહકોએ મુકેલા દાગીનાનું ઓડિટ કરવામાં આવ્યું હતું. આ ઓડિટ દરમિયાન બેંકમાં મુકેલા એક ગ્રાહકના 19.59 લાખની કિંમતના દાગીના નકલી હોવાનું બહાર આવ્યું હતું. આથી બેંકનો સ્ટાફ ચોકી ગયો હતો. જોકે ત્યારબાદ બેંકની હેડ ઓફિસમાં આ અંગે જાણ કરવામાં આવી હતી. આથી હેડ ઓફિસ દ્વારા આ મામલે તપાસ કરવામાં આવી હતી. અને તપાસમાં હકીકત બહાર આવી હતી.

આ પણ વાંચો: રાજકોટમાં યુવાનની બોથડ પદાર્થના ઘા ઝીંકી હત્યા કરાઈ, પિતા પર જ હત્યાની આશંકા

પોલીસે ફરિયાદના આધારે તપાસ હાથ ધરી

બેંકના કોઈ કર્મચારીએ જ ગ્રાહકના મુકેલા અસલી દાગીનાને બદલે નકલી દાગીના મૂકી અને છેતરપિંડી આચરી હોવાનું બહાર આવ્યું હતું. આથી બેંકના મેનેજરે આ મામલે વાપી ટાઉન પોલીસ સ્ટેશનમાં ફરિયાદ દાખલ કરી હતી. વાપી ટાઉન પોલીસ સ્ટેશનમાં ફરિયાદ દાખલ થયા બાદ આ મામલે પોલીસે તપાસ કરી હતી. તપાસ દરમિયાન બેંકના અન્ય સ્ટાફ અને મેનેજરના પણ નિવેદનો અને ફરિયાદના આધારે બેંકમાંથી અસલી દાગીનાની ઉઠાંતરી કરી અને નકલી દાગીના મુકનાર કોઈ અન્ય નહીં પરંતુ બેંકનો જ કેશિયર હોવાનું બહાર આવ્યું હતું. બેંકના સીસીટીવી ફૂટેજ તપાસતા બેંકના  કેશિયર વિપુલ મનચંદા  ની શંકાસ્પદ હરકત દેખાઈ હતી.

આ પણ વાંચો: સુરતના રત્નકલાકારને હની ટ્રેપમાં ફસાવી 68,990 રૂપિયા પડાવી લીધા

બેંકના કેશિયર વિપુલ મનચંદાની ધરપકડ

બેંકનો કેશિયર શંકાસ્પદ રીતે બેંકના  સેફ વોલ્ટમાં જ્યાં ગ્રાહકોના દાગીના મુકેલા હતા તે વિસ્તારમાં પણ બિનજરૂરી રીતે શંકાસ્પદ હિલચાલ કરી રહ્યો હોવાનું ધ્યાને આવ્યું હતું. જ્યાં ગ્રાહકોના અસલી દાગીના મુકેલા હતા તે વિસ્તારમાં પણ તેની હાજરી દેખાઈ હતી આ હકીકત બહાર આવતા વાપી ટાઉન પોલીસે આ મામલામાં બેંકના કેશિયર વિપુલ મનચંદા ની ધરપકડ કરી સળિયા પાછળ ધકેલી લીધો છે. ઉલ્લેખનીય છે કે, અત્યારે હવે આ કેસિયરે અન્ય જે જગ્યાએ ફરજ બજાવી હતી ત્યાં પણ આવી રીતે કોઈ કારસ્તાન કર્યું  છે કે કેમ? તે અંગે પણ તપાસ હાથ ધરી છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Bank Fraud, Vapi News, Vapi Police