A farmer of Parvasa village in Pardi taluka earned 20 lakhs from exotic flower cultivation akv

Home /News /valsad /Valsad: 1 એકરમાં વિદેશી ફૂલની ખેતીથી 20 લાખની આવક; જાણો સફળતાનું રહસ્ય

ઓર્કીડના ફૂલો ખાસ કરીને થાઈલેન્ડ અને ચીનમાં થતા હોઈ છે.

વલસાડના પારડી તાલુકાના પરવાસા ગામના ખેડૂતે વિદેશી ફૂલની ખેતી કરી છે અને વર્ષે રૂપિયા 20 લાખની આવક મેળવી છે.પરવાસા ગામમાં 1 એકર જમીન પર ઓર્કિડના ફૂલોની ખેતી કરી લાખોની કમાણી કરી છે.

News18 Gujarati
Last Updated : January 06, 2023, 18:30 IST
Valsad, India

published by :Santosh Kanojiya

Akshay Kadam, valsad: લગ્ન પ્રસંગ અને વિવિધ તહેવારોમાં દેશભરમાં સૌથી વધુ માંગમાં રહેતા થાઈલેન્ડ અને ચીનમાં થતા ઓર્કિડના ફૂલોની ખેતી હવે વલસાડ જિલ્લાના પારડી તાલુકાના પરવાસા ગામમાં પણ થઈ રહી છે. આધુનિક ટેક્નોલોજી વડે વિદેશી ફૂલોની ખેતી હવે આપણા દેશની ધરતી પર સફળતાપૂર્વક થઈ રહી છે. જેની મિશાલ પરવાસા ગામના ખેડૂત મિતુલભાઈ દિનેશભાઈ ઉપાધ્યાયએ પુરી પાડી છે. ઓર્કિડની સફળ ખેતીની સાથે મિતુલભાઈને વર્ષે રૂપિયા 20 લાખની આવક મેળવી છે.

યુવા ખેડૂત મિતુલભાઈએ જણાવ્યું હતી કે, બાપ દાદાના સમયથી ચાલી આવતી પરંપરાગત ખેતીમાં આંબા વાડી સાથે ડાંગર અને શેરડીની ખેતી કરતા હતા. પરંતુ એક દિવસ ગામમાં ખેડૂત શિબિરની મુલાકાત કરવાથી સરકારના બાગાયત ખાતાની વિવિધ સહાયલક્ષી યોજનાની જાણ થઈ. એકમ દીઠ વધુ ઉત્પાદનથી સારી એવી આવક મળે છે, એવી માહિતી મળતા ઓર્કિડના ફૂલોની ખેતી કરવાની પ્રેરણા મળી હતી.

થાઈલેન્ડ અને ચીનમાં થતા ઓર્કિડના ફૂલોની ખેતી આપણે ત્યાં પણ ગ્રીન હાઉસમાં થઈ શકે તેવુ માર્ગદર્શન વલસાડ બાગાયત ખાતાના અધિકારીઓએ આપતા મે સૌ પ્રથમ મહારાષ્ટ્રમાં પુનાની કંપનીમાં પ્લાન્ટ અંગે તપાસ કરતા જાણવા મળ્યું કે, તેઓ થાઈલેન્ડથી ટીશ્યુ કલ્ચર રોપા મંગાવી પોતાને ત્યાં 5 ઈંચ સુધી ઉગવા દે છે, ત્યાર બાદ ખેડૂતોને વેચાણથી આપતા હોઈ છે. બાદ હું 3 વાર થાઈલેન્ડ જઈ આવ્યો છું. જ્યાંથી વિસ્તૃત સમજ મળ્યા બાદ ખેતી પ્રત્યેની અભિરૂચીના કારણે નોકરી છોડીને પરવાસા ગામમાં 1 એકર જમીન પર ઓર્કિડના ફૂલોની ખેતી કરવાનું નક્કી કર્યું હતું.

ખર્ચ બાદ કરતા 12.80 લાખનો નફો

બાગાયત ખાતામાં વર્ષ 2018-19માં આઈ ખેડૂત પોર્ટલ પર ઓનલાઈન અરજી કરતા પ્રોજેક્ટ કોસ્ટ રૂપિયા . 69 લાખની સામે રૂપિયા 38.39 લાખની સબસિડીનો લાભ મળ્યો હતો. અત્યારે મારા ગ્રીન હાઉસમાં 40 હજાર પ્લાન્ટ છે. એક પ્લાન્ટની કિંમત રૂપિયા 60 છે.

1 પ્લાન્ટ પર ઓર્કિડના ફૂલની 5 થી 6 સ્ટીક (છડી) થાય છે. 1 સ્ટીકની કિંમત બજારમાં રૂપિયા 10 થી રૂપિયા 18 સુધીની છે. હાલમાં ફૂલની 2 લાખ સ્ટીક છે. જેના થકી વર્ષે રૂપિયા 20 લાખ આવક થાય છે. જેમાંથી મજૂર, ખાતર અને દવા સહિતનો વાર્ષિક રૂપિયા 7.20 લાખનો ખર્ચ બાદ કરતા 12.80 લાખનો નફો થાય છે.

તહેવારમાં વધુ ભાવ મળે છે

મેમિતુલભાઈએ વધુમાં જણાવ્યું હતું કે, ઓર્કિડના ફૂલની માંગ માર્કેટમાં વર્ષ દરમિયાન સતત રહેતી હોવાથી વર્ષ દરમિયાન અનેક ઓર્ડર આવતા હોઇ છે. ઘણીવાર ઓર્ડરને પહોંચી શકાતુ નથી. 20 સ્ટીકનું એક બંડલ બને છે. જેનો મુંબઈમાં હાલમાં ભાવ રૂપિયા 230 અને લગ્ન તેમજ તહેવારની સિઝનમાં રૂપિયા 350 થી પણ વધુ ભાવ મળે છે. ઓર્કિડનો પ્લાન્ટ એક વાર તૈયાર કર્યા બાદ તેની સરખી માવજત કરે તો સતત 7 વર્ષ સુધી ફૂલ આપતા હોવાથી મહેનત રંગ લાવે છે.

નાળિયેરના છોટલાની લાદીમાં થાય છે ઓર્કિડના ફૂલ

ખેડૂત મિતુલભાઈએ કહ્યું કે, શુ તમે જાણો છો કે, ઓર્કિડના ફૂલ નારીયેળના છોટલા (જટા)માં થાય છે. નારિયેળના છોટલાને પાણીમાં પલાળી મહિનાઓ સુધી નરમ કરવામાં આવે છે. ત્યાર બાદ તેમાં ખાતર નાંખી માટી જેવુ કરી તેની લાદી બનાવવામાં આવે છે. આ લાદી બેંગ્લોરથી મંગાવવામાં આવે છે. એક લાદીની કિંમત રૂપિયા 60 હોય છે. ત્યારબાદ લાદીમાં પલાન્ટ લગાડવામાં આવે છે. જેમાંથી સ્ટીક નીકળતા 9 થી 10 મહિનાનો સમય લાગે છે. આમ આ સંપૂર્ણ સીસ્ટમને તૈયાર થતા દોઢ થી બે વર્ષનો સમય લાગે છે.

ઓર્કિડના પ્લાન્ટને આર ઓનું શુધ્ધ પાણીનો છંટકાવ કરવુ જરૂરી

ઓર્કિડના પ્લાન્ટમાં ભેજનું પ્રમાણ જળવાઈ રહે તે માટે સ્પ્રીકંલર પધ્ધતિથી સિંચાઈ કરવામાં આવે છે. પ્લાન્ટ મોટા થયા બાદ સુકા ન પડે તે માટે તેમાં એક દિવસ છોડીને બીજા દિવસે પાણીનો સ્પ્રે મારવો જરૂરી છે, ઉનાળામાં તો રોજ પાણીનો સ્પ્રે મારવો પડે છે.

આ વિદેશી ફૂલને સાદુ પાણી નહીં પણ આર ઓ પ્લાન્ટના શુધ્ધ પાણીનું સિંચન કરવું પડે છે. કારણ કે સાદા પાણી ખારાશ અને ક્ષારયુક્ત હોય છે. જે માટે મિતુલભાઈએ પોતાના ખેતરમાં આર ઓ પ્લાન્ટની સાથે 15 હજાર લીટરની પાણીની ટાંકી પણ મુકી છે. પ્લાન્ટમાં લાલ કલરની જીવાત ન પડે તે માટે સાવચેતી જરૂરી છે.