સુરતમાં 35 લાખના પોલીસ તોડકાંડ મામલો, છેતરપિંડીનો ગુનો દાખલ કરી ઉત્તરપ્રદેશથી એકની ધરપકડ

સુરતઃ શહેરના અલથાણ વિસ્તારમાં પોલીસના તોડકાંડની એક ઘટના બની હતી. પ્રારંભિક તબક્કાઓમાં આ ઘટના બાદ પોલીસ દ્વારા ફરિયાદ પણ લેવામાં આવી નહોતી. ત્યારબાદ એકાએક જ અલથાણ પોલીસ સ્ટેશનના બે કોન્સ્ટેબલને સસ્પેન્ડ કરી દેવામાં આવ્યા હતા અને PI અને PSIની બદલી કરવામાં આવી હતી. ત્યારે આ સમગ્ર મામલે પોલીસ અધિકારીઓની બદલી અને સસ્પેન્ડની કાર્યવાહી બાદ પોલીસે છેતરપિંડીનો ગુનો દાખલ કર્યો છે અને હવે આરોપીને ઉત્તર પ્રદેશથી ઝડપી પાડ્યો છે.

સુરતના પર્વતપાટિયાના કાપડ વેપારી સાથે સોના-ચાંદીના દાગીના આપવાના બહાને 35 લાખ રૂપિયાની છેતરપિંડી થઈ હતી. આ સમગ્ર મામલે સુરત ક્રાઈમ બ્રાન્ચ દ્વારા ઉત્તર પ્રદેશના ગાજીપુરથી સમાજવાદી પાર્ટીના એક કાર્યકર્તાની ધરપકડ કરી લેવામાં આવી છે. આરોપીનું નામ સમીરખાન પઠાણ હોવાનું સામે આવ્યું છે અને આરોપીનું કાકો સરફુદ્દીન આ ગુનાનો મુખ્ય સૂત્રધાર હોવાનું પણ જાણવા મળી રહ્યું છે.

આ પણ વાંચોઃ ધોળા દિવસે સોનાની દુકાનમાં ઘૂસીને માથામાં બંદૂક મારી લૂંટનો પ્રયાસ, CCTV

ત્યારબાદ આરોપી સરફુદીને તેના સાગરીતોને 16 ડિસેમ્બરના દિવસે બપોરે આભવા ચોકડી હાઇવે પાસે મોકલીને ફરિયાદીને સોનુ ખરીદવા બોલાવી ફરિયાદી પાસેથી આરોપીઓએ 35 લાખ રૂપિયા પડાવી લીધા હતા અને ત્યારબાદ ફરાર થઈ ગયા હતા. જો કે, આ સમગ્ર મામલે અલથાણ પોલીસ સ્ટેશનના જ બે પોલીસ કોન્સ્ટેબલે વેપારીને આ ઘટનામાં ન્યાય અપાવવાના બદલે વેપારીનો 7 લાખનો તોડ કરી નાંખ્યો હતો અને આ મામલો સુરત પોલીસ કમિશનર સુધી પહોંચતા તાત્કાલિક અસરથી PI અને PSIની બદલી કરી બે પોલીસ કોન્સ્ટેબલને સસ્પેન્ડ કરવામાં આવ્યા હતા અને ત્યારબાદ પોલીસ દ્વારા સમગ્ર મામલે છેતરપિંડીની ફરિયાદ નોંધવામાં આવી હતી.



અલથાણ પોલીસ સ્ટેશનમાં નોંધાયેલી છેતરપિંડીની ફરિયાદ બાદ ક્રાઈમ બ્રાન્ચ દ્વારા પણ તપાસ હાથ ધરવામાં આવી હતી અને આ સમગ્ર મામલે ક્રાઈમ બ્રાન્ચે બાતમીના આધારે ઉત્તર પ્રદેશના ગાજીપુરથી સમાજવાદી પાર્ટીના કાર્યકર્તા એવા સમીર ખાન પઠાણની ધરપકડ કરી છે અને આરોપીની પૂછપરછ માટે આરોપીને કોર્ટમાં રજૂ કરી ચાર દિવસના રિમાન્ડ મેળવવામાં આવ્યા છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Surat crime news, Surat news, Surat police