Wrestlers Protest: એક જ ઝાટકે WFIને ભંગ ન કરી શકાય, અનુરાગ ઠાકુરને મળવા કેમ ન આવ્યા રેસલર્સ?

નવી દિલ્હી: કેન્દ્રીય રમતગમત મંત્રી અનુરાગ ઠાકુર સવારથી ટોચના ભારતીય કુસ્તીબાજોને મળવા માટે તેમના નિવાસસ્થાને છે, પરંતુ કોઈ તેમને મળવા આવ્યું નથી. સમસ્યાના ઉકેલ માટે કેન્દ્રીય મંત્રીએ શુક્રવારે રમતગમત મંત્રાલયના અધિકારીઓ સાથે બેઠક યોજી હતી, જેમાં ડીજી સાઈ પણ હાજર હતા. આ દરમિયાન સુત્રો જણાવી રહ્યા છે કે, કુસ્તીબાજો મળવા આવવાના હતા, પરંતુ તેમની માંગણીઓ પૂરી ન થવાના કારણે તેઓ હજુ સુધી આવ્યા નથી. કુસ્તીબાજોએ અત્યાર સુધી રમતગમત મંત્રાલય દ્વારા કરાયેલા પ્રસ્તાવોને સ્વીકારવાનો ઇનકાર કર્યો છે.

મામલાની ગંભીરતાને જોતા અનુરાગ ઠાકુરે પોતાના તમામ કાર્યક્રમો રદ્દ કરી દીધા છે. રમતગમત મંત્રાલયના અધિકારીઓ અનુરાગ ઠાકુરના ઘરે ઘણા કલાકો સુધી રોકાયા હતા, પરંતુ કોઈ ખેલાડી તેમને મળવા આવ્યો ન હતો, જ્યારે ગુરુવારે રાત્રે નક્કી કરવામાં આવ્યું હતું કે સવારે તેમના નિવાસસ્થાને બેઠક યોજવામાં આવશે. 19 જાન્યુઆરીની રાત્રે યોજાયેલી મીટિંગ અનિર્ણિત રહી કારણ કે, ગુસ્સે થયેલા કુસ્તીબાજોએ રેસલિંગ ફેડરેશન ઓફ ઈન્ડિયા (WFI) ને તાત્કાલિક વિસર્જન કરવાની સરકારની તેમની માગણીથી પીછેહઠ કરવાનો ઇનકાર કર્યો હતો.

આ પણ વાંચો: ધરણાથી લઈને રમત મંત્રાલય સાથે બેઠક, જાણો કુસ્તીબાજોના પ્રદર્શન સાથે જોડાયેલી 10 મોટી વાતો

WFI પ્રમુખ પર કુસ્તીબાજો દ્વારા જાતીય સતામણીનો આરોપ

સૂત્રોના જણાવ્યા અનુસાર, રમતગમત મંત્રી અનુરાગ ઠાકુર, રમત મંત્રાલયના ઉચ્ચ અધિકારીઓ અને કુસ્તીબાજો વચ્ચે મોડી રાત્રે ચાર કલાકથી વધુ સમય સુધી બેઠક ચાલી હતી, જેમાં આ મુદ્દાને ઉકેલવા માટે ઘણા પાસાઓ પર વિગતવાર ચર્ચા કરવામાં આવી હતી. એ વાત પણ સામે આવી રહી છે કે, રેસલિંગ ફેડરેશન ચૂંટાયેલી સંસ્થા હોવાથી તેને મંત્રાલય એક જ ઝાટકે હટાવી શકે નહીં. રેસલર્સે રેસલિંગ ફેડરેશન ઓફ ઈન્ડિયા (WFI)ના પ્રમુખ બ્રિજ ભૂષણ શરણ સિંહ પર જાતીય સતામણીનો આરોપ લગાવ્યો છે.

સરકારે ખેલાડીઓની સામે એક ફોર્મ્યુલા મૂકી

આ બેઠક દરમિયાન સરકારના ખેલાડીઓની સામે એક ફોર્મ્યુલા પણ રાખવામાં આવી હતી. આ અંતર્ગત સરકાર ત્રણ સભ્યોની કમિટી બનાવશે, જે ખેલાડીઓની ફરિયાદો સાંભળશે અને મહિલાઓની છેડતીની ફરિયાદો પણ સાંભળવામાં આવશે. ખેલાડીઓને કહેવામાં આવ્યું છે કે, તેઓ કોનું નામ ઇચ્છે છે તે રમત મંત્રાલયને જણાવે, પરંતુ અત્યાર સુધી કુસ્તીબાજો પોતાની વાત રાખવા પાછા આવ્યા નથી. આવી સ્થિતિમાં સવાલ એ ઊભો થાય છે કે, તેમની દરખાસ્ત સરકારને પરત મોકલતા તેમને શું રોકી રહ્યું છે.

આ પણ વાંચો: સેક્સ્યુયલ હેરેસમેન્ટનાં ગંભીર આરોપો! જંતર મંતરમાં દંગલ, PHOTOS માં જુઓ કયા દિગ્ગજો ઉતર્યા મેદાનમાં

સૂત્રોના જણાવ્યા અનુસાર, સરકાર ઇચ્છે છે કે કુસ્તીબાજો તેમનો વિરોધ સમાપ્ત કરે, પરંતુ ખેલાડીઓ એ વાત પર અડગ છે કે પહેલા WFIનું વિસર્જન કરવું જોઈએ. કુસ્તીબાજોની નજીકના એક સૂત્રએ પીટીઆઈને કહ્યું કે, "સરકાર અન્ય મુદ્દાઓને પછીથી ઉકેલી શકે છે. અમને આનાથી કોઈ વાંધો નથી પરંતુ તેણે પહેલા WFIનું વિસર્જન કરવું જોઈએ.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Anurag Thakur, Delhi News, Protest, Wrestler