Home /News /sport /

નિખતે 3 વર્ષથી મનપસંદ બિરયાની નથી ખાધી, વર્લ્ડ ચેમ્પિયનના પિતાએ સંભળાવી સંઘર્ષની કહાની

નિખતે 3 વર્ષથી મનપસંદ બિરયાની નથી ખાધી, વર્લ્ડ ચેમ્પિયનના પિતાએ સંભળાવી સંઘર્ષની કહાની

નિખત

Sports News: તે સમયગાળાને યાદ કરતાં પિતાએ કહ્યું, “જ્યારે તેણીએ વર્લ્ડ યુથ ટાઇટલ જીત્યું, ત્યારે તે માત્ર 15 વર્ષની હતી અને તેને સમજવામાં સમય લાગ્યો કે અહીંથી સિનિયર લેવલે રમવા સુધીની સફર અઘરી હશે.

ભારતીય બોક્સર (Indian boxer)  નિખત ઝરીન (Nikhat Zareen) 52 કિગ્રા વજન વર્ગ (52 વજન શ્રેણી)માં વર્લ્ડ ચેમ્પિયન બની છે. તેણીએ એક દિવસ પહેલા ફાઇનલમાં થાઇલેન્ડની જીતપોંગ જુટામેન્સને 5-0થી હરાવી હતી. તેલંગાણાની નિખત ભારતની પાંચમી મહિલા બોક્સર છે, જેણે વર્લ્ડ ચેમ્પિયનશિપમાં ગોલ્ડ મેડલ જીત્યો છે. નિખતના બોક્સર બનવાની કહાની પણ રસપ્રદ છે. પિતા મોહમ્મદ જમીલ પોતે ફૂટબોલ અને ક્રિકેટ રમતા હતા, તેઓ ઈચ્છતા હતા કે તેમની 4 દીકરીઓમાંથી એક દીકરી ખેલાડી બને. તેમણે ત્રીજા નંબરની પુત્રી નિખત માટે એથ્લેટિક્સની પસંદગી કરી અને નાની ઉંમરમાં જ સ્ટેટ ચેમ્પિયન બનેલી નિખતે પણ તેના પિતાના નિર્ણયને સાચો સાબિત કર્યો. પરંતુ કાકાની સલાહ પર નિખતે બોક્સિંગ રિંગમાં પ્રવેશ કર્યો અને 14 વર્ષની ઉંમરે વર્લ્ડ યુથ બોક્સિંગ ચેમ્પિયન બની અને તે પછી તે એક પછી એક સફળતાની સીડી ચઢતી ગઈ. વર્લ્ડ ચેમ્પિયનશિપમાં ગોલ્ડ મેડલ જીતવો એ આ સફરનો સૌથી મહત્વપૂર્ણ તબક્કો છે.

ભારતમાં મહિલા બોક્સિંગનો મતલબ 6 વખતની વર્લ્ડ ચેમ્પિયન એમસી મેરી કોમ. પરંતુ, નિખતે હવે આ યાદીમાં પોતાનું નામ બનાવી લીધું છે. જોકે, આ માટે તેણે લાંબી રાહ જોવી પડી હતી. ખભાની ઈજાને કારણે નિખત 2017માં બોક્સિંગ રિંગમાં પ્રવેશી નહોતી શકી. પરંતુ, 5 વર્ષ પછી વર્લ્ડ ચેમ્પિયનશિપમાં ઐતિહાસિક જીત બાદ તેની ઉદાસી દૂર થઈ ગઈ.

આ જીત દેશની દરેક દીકરીને પ્રેરણા આપશેઃ પિતાજી

નિખતના પિતા મોહમ્મદ જમીલે ઈન્ડિયન એક્સપ્રેસને કહ્યું, “વર્લ્ડ ચેમ્પિયનશિપમાં ગોલ્ડ મેડલ જીતવો એ એક એવી વસ્તુ છે, જે મુસ્લિમ છોકરીઓની સાથે સાથે દેશની દરેક છોકરીને જીવનમાં મોટા લક્ષ્યો હાંસલ કરવા માટે પ્રેરિત કરશે. નિખતે પોતે જ પોતાનો રસ્તો બનાવ્યો છે.”



કાકાની સલાહથી બોક્સર બનવાનું નક્કી કર્યું

કાકા શમસુદ્દીનના બે પુત્રો એતેશામુદ્દીન અને ઇતિશામુદ્દીન બોક્સર હોવાથી નિખતને બોક્સર બનવા માટે કોઈ બહારથી પ્રેરણા લેવાની જરૂર નહોતી. જોકે, 2000ના દાયકામાં જ્યારે નિખતે બોક્સિંગ શરૂ કર્યું, ત્યારે નિઝામાબાદ અથવા હૈદરાબાદની કોઈ સ્પર્ધામાં મહિલા બોક્સર ભાગ્યે જ જોવા મળતી હતી. આમ છતાં પિતાએ નિખતને બોક્સર બનતા ક્યારેય રોકી નહીં. બોક્સિંગ એક એવી રમત છે, જેમાં છોકરીઓએ ટ્રેનિંગ અથવા બાઉટ દરમિયાન શોર્ટ્સ અને ટી-શર્ટ પહેરવાની હોય છે. આવી સ્થિતિમાં જમીલ પરિવાર માટે તેમની પુત્રીને બોક્સર બનાવવી સરળ ન હતી. પરંતુ નિખતને પિતા અને માતા પરવીન સુલતાના બંનેનો સાથ મળ્યો.

'સંબંધીઓ બોક્સિંગને સારું નહોતા માનતા'

પિતા જમીલે કહ્યું, “હું સાઉદી અરેબિયામાં સેલ્સ આસિસ્ટન્ટ તરીકે કામ કરતો હતો અને ત્યાં 15 વર્ષ વિતાવ્યા પછી મેં મારી દીકરીઓના શિક્ષણ અને રમતગમતમાં તેમની કારકિર્દીને ધ્યાનમાં રાખીને નિઝામાબાદ પાછા ફરવાનું નક્કી કર્યું. નિખતની બે મોટી બહેનો ડોક્ટર છે. મારો બધો સમય નિખત અને તેની નાની બહેન, જે બેડમિન્ટન રમે છે તેને તાલીમ આપવામાં વિતે છે. મને યાદ છે કે જ્યારે નિખતે અમને બોક્સર બનવાની તેની ઈચ્છા વિશે જણાવ્યું ત્યારે અમને કોઈ સંકોચ નહોતો. પરંતુ, કેટલીકવાર સંબંધીઓ અથવા મિત્રો કહેતા હતા કે છોકરીએ એવી રમતો ન રમવી જોઈએ જેમાં તેણે શોર્ટ્સ પહેરવા પડે. પરંતુ અમે જાણતા હતા કે નિખત જે પણ ઈચ્છે છે, અમે હંમેશા તેના સપનાને સાકાર કરવા તેની પડખે ઉભા રહીશું અને આજે તે વર્લ્ડ ચેમ્પિયન બની છે.

પિતા સાથે નિખત


આ પણ વાંચો: ગુજરાતની મહિલા વોલીબોલ ટીમે ઇતિહાસ રચ્યો, આ સ્પર્ધામાં પહેલીવાર બન્યા ચેમ્પિયન

રિંગની અંદર અને બહાર બંને જગ્યાએ મેરી કોમ સામે લડવું પડ્યું

નિખતને ભારતીય બોક્સિંગની નવી આશા માનવામાં આવી રહી છે. તે 6 વખતની વર્લ્ડ ચેમ્પિયન એમસી મેરી કોમના વારસાને આગળ ધપાવી શકે છે. જોકે, નિખતને આ તક આસાનીથી નહોતી મળી. આ માટે તેણે મેરી કોમ સાથે રિંગની અંદર અને બહાર પોતાના અધિકારો માટે લડવું પડ્યું. 3 વર્ષના સંઘર્ષ બાદ નિખતને વર્લ્ડ ચેમ્પિયનશિપમાં ભાગ લેવાની તક મળી અને તે તેના વજન વર્ગમાં વર્લ્ડ ચેમ્પિયન બની.

2011માં બની હતી યુથ વર્લ્ડ ચેમ્પિયન

2011માં નિખત યુથ વર્લ્ડ ચેમ્પિયન બનવા સાથે તે ભારતીય બોક્સિંગના નવા સ્ટાર તરીકે મજબૂત દાવેદાર બની. પરંતુ નેશનલ લેવલે પોતાનું નામ બનાવવા માટે તેને 5 વર્ષ રાહ જોવી પડી હતી. તે 2016માં ફ્લાયવેટ કેટેગરીમાં મનીષાને હરાવીને પ્રથમ વખત સિનિયર નેશનલ ચેમ્પિયન બની હતી. પરંતુ લંડન ઓલિમ્પિક્સની બ્રોન્ઝ મેડલ વિજેતા મેરી કોમ પણ આ જ વેઇટ કેટેગરીમાં હતી. ત્યારે નિખત માટે સિનિયર લેવલ પર પોતાનું સ્થાન બનાવવું આસાન નથી રહ્યું. 2018માં તેણે સિનિયર નેશનલ્સમાં બ્રોન્ઝ જીત્યો અને તે જ બેલગ્રેડમાં મહત્વપૂર્ણ ટાઇટલ જીત્યું. નિખતે 2019 એશિયન ચેમ્પિયનશિપ અને થાઈલેન્ડ ઓપનમાં મેડલ જીતીને સિનિયર લેવલ પર રમવાનો દાવો કર્યો. પરંતુ 52 કિગ્રા વજન વર્ગમાં મેરી કોમની હાજરીને કારણે નિખતને તક ન મળી. તેને 2018ની કોમનવેલ્થ અને એશિયન ગેમ્સની ટીમમાં પણ સ્થાન મળ્યું નથી. જેને લઈને તે નિરાશ થઈ ગઈ. પરંતુ તેના પિતાએ તેને પ્રોત્સાહન આપ્યું.

તે સમયગાળાને યાદ કરતાં પિતાએ કહ્યું, “જ્યારે તેણીએ વર્લ્ડ યુથ ટાઇટલ જીત્યું, ત્યારે તે માત્ર 15 વર્ષની હતી અને તેને સમજવામાં સમય લાગ્યો કે અહીંથી સિનિયર લેવલે રમવા સુધીની સફર અઘરી હશે. 2016માં સિનિયર નેશનલ ચેમ્પિયન બન્યા બાદ તેનો આત્મવિશ્વાસ વધી ગયો હતો. પરંતુ પછીનું આખું વર્ષ તે ઈજાને કારણે રિંગથી દૂર રહી. આ દરમિયાન તેને ઘણી આંતરરાષ્ટ્રીય ટૂર્નામેન્ટથી દૂર રહેવું પડ્યું હતું. તેણી આનાથી ભાંગી પડી હતી. પણ મેં હંમેશા તેને પ્રોત્સાહિત કરવાનો પ્રયત્ન કર્યો. મેં કહ્યું કે દરેક વસ્તુનો યોગ્ય સમય હોય છે અને હવે તેનો સમય આવી ગયો છે.

નિખતે 2-3 વર્ષથી મનપસંદ બિરયાની નથી ખાધી

નિખતની આ સફળતા પર પિતા અને પરિવાર ખૂબ જ ખુશ છે અને હવે ઉજવણીની તૈયારીઓ શરૂ થઈ ગઈ છે. પિતાએ કહ્યું, 2-3 વર્ષથી તેણે તેની મનપસંદ બિરયાની અને નિહારી નથી ખાધી. જલદી તે શિબિરમાંથી મુક્ત થશે, તેણીને તેની મનપસંદ વાનગી ખાવા માટે એક કે બે દિવસ મળશે. તે પછી તે ફરીથી વ્યસ્ત થઈ જશે.
Published by:Kaushal Pancholi
First published:

Tags: Life story, Sports news, દેશવિદેશ

આગામી સમાચાર