હૉકી પ્લેયર બન્યો ક્રિકેટર, 18 હજાર રન અને 40 સદી બાદ હવે સંન્યાસ લેવા જઈ રહ્યો છે

રોસ ટેલરે (Ross Taylor) પોતાની બેટિંગથી આંતરરાષ્ટ્રીય ક્રિકેટમાં એક અલગ છાપ છોડી છે. ન્યુઝીલેન્ડનો આ 38 વર્ષીય ક્રિકેટર 4 એપ્રિલ 2022ના રોજ તેની છેલ્લી આંતરરાષ્ટ્રીય મેચ રમવા જઈ રહ્યો છે. ન્યુઝીલેન્ડ અને નેધરલેન્ડ (New Zealand vs Netherlands) વચ્ચે ત્રણ મેચની વન-ડે સિરીઝની અંતિમ મેચ હેમિલ્ટનમાં રમાશે. કિવી ટીમ શ્રેણીમાં 2-0થી આગળ છે. ટેલરે પહેલેથી જ જાહેરાત કરી દીધી હતી કે તે 2022ની શરૂઆતમાં આંતરરાષ્ટ્રીય ક્રિકેટમાંથી નિવૃત્તિ લેશે. જો કે તે હાલ ડોમેસ્ટિક ક્રિકેટ રમવાનું ચાલુ રાખશે. પ્રથમ વર્લ્ડ ટેસ્ટ ચેમ્પિયનશિપનો ખિતાબ જીતનાર ન્યુઝીલેન્ડની ટીમમાં પણ તેનો સમાવેશ કરવામાં આવ્યો હતો. ફાઈનલમાં ન્યુઝીલેન્ડે ભારતને હરાવ્યું હતું.

રોસ ટેલરના ક્રિકેટમાં પ્રવેશની વાર્તા ખુબ જ રસપ્રદ છે. તે શરૂઆતમાં હોકી રમતો હતો. બાદમાં તેણે ક્રિકેટ પસંદ કરી અને પોતાના પ્રદર્શનથી બધાનું ધ્યાન પોતાના તરફ ખેંચ્યું. આંતરરાષ્ટ્રીય ક્રિકેટમાં તેનું પ્રદર્શન શાનદાર રહ્યું છે. 18 હજારથી વધુ રન બનાવવા ઉપરાંત તેણે 40 સદી પણ ફટકારી છે. તેના ટેસ્ટ રેકોર્ડ પર નજર કરીએ તો તેણે 112 મેચમાં 45ની એવરેજથી 7683 રન બનાવ્યા છે. તેણે 19 સદી અને 35 અડધી સદી ફટકારી છે. 290 રનની સૌથી મોટી ઇનિંગ રમી છે. તેણે 1 માર્ચ 2006ના રોજ વેસ્ટ ઈન્ડિઝ સામેની ODI મેચમાં આંતરરાષ્ટ્રીય ક્રિકેટમાં પ્રવેશ કર્યો હતો. એટલે કે તેણે 16 વર્ષ પહેલા ડેબ્યુ કર્યું હતું.

આ પણ વાંચો- CSK સામે વિરાટના રેકોર્ડ પર રહેશે ધવનની નજર, પૂર્વ RCB કેપ્ટનને પછાડવાથી શિખર 41 રન દૂર

વનડેમાં 21 સદી

રોસ ટેલરે અત્યાર સુધી 235 વનડેમાં 48ની એવરેજથી 8593 રન બનાવ્યા છે. તેણે 21 સદી અને 51 અડધી સદી ફટકારી છે. એટલે કે તેણે 72 વખત 50થી વધુ રનની ઇનિંગ રમી છે. અણનમ 181 રન સૌથી મોટો સ્કોર છે. તે છેલ્લી વન-ડેને યાદગાર બનાવવા ઈચ્છશે. તેના ટી-20 ઈન્ટરનેશનલ રેકોર્ડ પર નજર કરીએ તો તેણે 102 મેચમાં 26ની એવરેજથી 1909 રન બનાવ્યા છે. 7 અડધી સદી ફટકારી છે. સ્ટ્રાઈક રેટ 122નો હતો. 63 રનની સૌથી મોટી ઇનિંગ રમી હતી.

આ પણ વાંચો- Video: રિયાન પરાગના બોલ પર તિલક વર્માએ માર્યો જબ્બર શૉટ, સીધો કેમેરામેનને અથડાયો બોલ

રોસ ટેલર ફેબ્રુઆરી 2020માં ત્રણેય ફોર્મેટમાં 100-100 મેચ રમનાર વિશ્વનો પ્રથમ ક્રિકેટર બન્યો હતો. તે ત્રણેય ફોર્મેટને જોડીને ન્યુઝીલેન્ડ માટે સૌથી વધુ મેચ રમનાર ખેલાડી છે. તેણે 292 ટી-20 મેચમાં 31ની એવરેજથી 6429 રન બનાવ્યા છે. તેણે એક સદી અને 32 અડધી સદી ફટકારી છે. તેણે અણનમ 111 રનની સૌથી મોટી ઇનિંગ રમી હતી. તેણે ફર્સ્ટ ક્લાસ ક્રિકેટમાં 27 સદીની મદદથી 12 હજારથી વધુ રન બનાવ્યા છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Cricket betting, Cricket News Gujarati, Cricketers, ક્રિકેટ