વર્લ્ડ કપ: વરસાદના કારણે ભારત અને ન્યૂઝીલેન્ડ વચ્ચેની મેચ રદ

આઈસીસી વર્લ્ડ કપમાં ભારે વરસાદના કારણે ભારત અને ન્યૂઝીલેન્ડ વચ્ચેની મેચ રદ કરવામાં આવી છે. મેચ રદ થતા બંને ટીમોને 1-1 પોઇન્ટ આપવામાં આવ્યો છે. પોઇન્ટ ટેબલમાં ન્યૂઝીલેન્ડ 4 મેચમાં 7 પોઇન્ટ સાથે પ્રથમ ક્રમાંકે છે. જ્યારે ભારત 3 મેચમાં 2 જીત સાથે 5 પોઇન્ટ મેળવી ત્રીજા સ્થાને છે.

ભારે વરસાદના કારણે ટોસ પણ થઈ શક્યો ન હતો અને આખરે મેચ રદ કરવાનો નિર્ણય કરાયો હતો. આ વર્લ્ડ કપમાં આ ત્રીજો મુકાબલો વરસાદના કારણે રદ થયો છે. જે એક રેકોર્ડ છે. આ પહેલા અત્યાર સુધીના બધા વર્લ્ડ કપમાં ફક્ત બે મેચો વરસાદના કારણે રદ થઈ હતી.

ભારત હવે 16 જૂને કટ્ટર હરીફ પાકિસ્તાન સામે ટકરાશે.