Ind vs Eng: બુમરાહની 5 વિકેટ, ભારત જીતથી 1 વિકેટ દૂર

જસપ્રીત બુમરાહ (5 વિકેટ)ના ચુસ્ત પ્રદર્શનની મદદથી ભારત ત્રીજી ટેસ્ટમાં ઇંગ્લેન્ડ સામે જીતથી ફક્ત 1 વિકેટ દૂર છે. ભારતે આપેલા 521 રનના પડકાર સામે ઇંગ્લેન્ડે ચોથા દિવસના અંતે 9 વિકેટ ગુમાવી 311 રન બનાવી લીધા છે. ઇંગ્લેન્ડ હજુ જીતથી 210 રન પાછળ છે અને તેની 1 વિકેટ બાકી છે. દિવસના અંતે રશિદ 30 અને એન્ડરસન 8 રને રમતમાં છે.

ઇંગ્લેન્ડ તરફથી જોશ બટલરે કારકિર્દીની પ્રથમ ટેસ્ટ સદી ફટકારતા 106 રન બનાવ્યા હતા. બેન સ્ટોક્સે 62 રનની ઇનિંગ્સ રમી હતી. આ બે બેટ્સમેન સિવાય બાકી બેટ્સમેનો ફ્લોપ રહ્યા હતા. બટલર અને સ્ટોક્સ વચ્ચે પાંચમી વિકેટ માટે 169 રનની ભાગીદારી નોંધાઈ હતી. બંનેના આઉટ થતા જ ટીમનો ધબડકો થયો હતો. ભારત તરફથી બુમરાહે પાંચ વિકેટ ઝડપી હતી. ઇશાંત બે વિકેટ જ્યારે શમી અને પંડ્યાએ 1-1 વિકેટ ઝડપી હતી.