IND VS AUS: ભારતનો 6 વિકેટે વિજય, શ્રેણી 1-1થી સરભર

ક્રુણાલ પંડ્યા (4 વિકેટ)ની શાનદાર બોલિંગ પછી વિરાટ કોહલીની આક્રમક અડધી સદી (61)ની મદદથી ભારતે ઓસ્ટ્રેલિયા સામેની ત્રીજી ટી-20માં 6 વિકેટે વિજય મેળવ્યો હતો. આ જીત સાથે ભારતે ત્રણ મેચની શ્રેણી 1-1થી સરભર કરી દીધી છે.

ઓસ્ટ્રેલિયાએ 20 ઓવરમાં 6 વિકેટે 164 રન બનાવ્યા હતા. જવાબમાં ભારતે 19.4 ઓવરમાં 4 વિકેટ ગુમાવી 168 રન બનાવી લીધા હતા. કોહલી 41 બોલમાં 4 ફોર અને 2 સિક્સર સાથે 61 રન બનાવી અણનમ રહ્યો હતો. ભારત તરફથી શિખર ધવને 41, રોહિત શર્માએ 23 રન બનાવ્યા હતા.

હવે બંને વચ્ચે 6 ડિસેમ્બરથી ચાર મેચની ટેસ્ટ શ્રેણીનો પ્રારંભ થશે.

એરોન ફિન્ચ (28) અને શોર્ટે (33) પ્રથમ વિકેટ માટે 8.3 ઓવરમાં 68 રનની ભાગીદારી કરી શાનદાર શરુઆત અપાવી હતી. આ પછી મિડલ ઓર્ડરમાં ધબડકો થતા ઓસ્ટ્રેલિયા 20 ઓવરમા 6 વિકેટે 164 રન બનાવી શક્યું હતું.

ભારત તરફથી ક્રુણાલ પંડ્યાએ શાનદાર બોલિંગ કરતા 36 રનમાં 4 વિકેટ ઝડપી હતી.

ભારત સામેની ત્રીજી અને નિર્ણાયક ટી-20 મેચમાં ઓસ્ટ્રેલિયાના સુકાની એરોન ફિન્ચે ટોસ જીતીને પ્રથમ બેટિંગ કરવાનો નિર્ણય કર્યો હતો. ઓસ્ટ્રેલિયાએ ત્રીજી ટી-20માં મિચેલ સ્ટાર્કનો સમાવેશ કર્યો છે.