હરમનપ્રીત કૌર રમતગમતમાં મહિલાઓને વધુ ગૌરવ અપાવશે : નીતા અંબાણી

મુંબઈ ઈન્ડિયન્સે વિમેન્સ પ્રીમિયર લીગની પહેલી સીઝન પહેલા હરમનપ્રીત કૌરની મહિલા ટીમના કેપ્ટન તરીકે જાહેરાત કરી છે. હરમન તાજેતરમાં જ 150 ટી20 ઇન્ટરનેશનલ રમનારી પ્રથમ ક્રિકેટર બની છે. 20 વર્ષની ઉંમરે પદાર્પણ કર્યા બાદ તે તમામ ફોર્મેટમાં એક દાયકાથી વધુ સમયથી રાષ્ટ્રીય ટીમ માટે એક આધારસ્તંભ રહી છે. અર્જુન પુરસ્કાર વિજેતા રાષ્ટ્રીય ટીમના સુકાની પાસે જીતનો નક્કર રેકોર્ડ છે અને તે મહિલા વિશ્વ કપની નોકઆઉટ મેચમાં અત્યાર સુધીના સૌથી વધુ વ્યક્તિગત સ્કોર (171*)નો રેકોર્ડ પણ ધરાવે છે.

આ અંગે  નીતા એમ. અંબાણીએ જણાવ્યું કે , "અમે હરમનપ્રીતને મુંબઈ ઈન્ડિયન્સની પ્રથમ મહિલા ક્રિકેટ ટીમના કેપ્ટન તરીકે મેળવીને રોમાંચિત છીએ. રાષ્ટ્રીય કેપ્ટન તરીકે તેમણે ભારતીય મહિલા ટીમને કેટલીક સૌથી આકર્ષક જીત અપાવી છે. અને મને ખાતરી છે કે શાર્લોટ અને ઝુલનની મદદથી તેઓ અમારી એમઆઇ મહિલા ટીમને તેમનું શ્રેષ્ઠ ક્રિકેટ રમવા, ગર્વની ભાવના પ્રદર્શિત કરવા અને રમતોમાં મહિલાઓને વધુ ગૌરવ અપાવવા માટે પ્રેરિત કરશે. અમે એમઆઇ માટેના આ નવા પ્રકરણની શરૂઆતની રાહ જોઈ રહ્યા છીએ! અમારા ચાહકોને ગમે છે એવી નિર્ભય અને મનોરંજક એમઆઇ બ્રાન્ડની ક્રિકેટ અમારી ખેલાડીઓ રમે તે માટે હું રાહ જોઈ શકતી નથી. હરમનપ્રીત અને સમગ્ર એમઆઇ ટીમને આવનારી આ રોમાંચક સફરમાં વધુ શક્તિ મળે!”

હરમન મુખ્ય કોચ શાર્લોટ એડવર્ડ્સની વિરુદ્ધમાં રમી ચૂકી છે અને ઝુલન ગોસ્વામી સાથે તો રમી જ છે તથા તેની કેપ્ટન પણ રહી છે. તે વિશ્વના અન્ય ભાગોમાં ટી20 લીગમાં રમનાર પ્રથમ ભારતીય હોવાને કારણે વિશ્વ સમક્ષ ભારતીય ક્રિકેટનું શ્રેષ્ઠ પ્રદર્શન કરવામાં પ્રભાવશાળી રહી છે. તે હવે એવી ટીમનું નેતૃત્વ કરશે જેમાં મહિલા ક્રિકેટના કેટલાક મોટા નામો અને યુવા ખેલાડીઓ તેમની પ્રતિભા દર્શાવવા આતુર છે કારણ કે મુંબઈ ઈન્ડિયન્સ વૈશ્વિક ક્રિકેટ માટે પ્રતિભાની નર્સરી બની રહી છે.

આ પણ વાંચો:  દ્વારકાના એટીએમમાં ચોરીની ગજબ ટેક્નિક

મુંબઈ ઈન્ડિયન્સની કોચિંગ ટીમમાં શાર્લોટ એડવર્ડ્સ (મુખ્ય કોચ), ઝુલન ગોસ્વામી (બોલિંગ કોચ અને મેન્ટર), દેવિકા પાલશીકર (બેટિંગ કોચ) અને લિડિયા ગ્રીનવે (ફિલ્ડિંગ કોચ) છે. ટીમનું નેતૃત્વ હરમનપ્રીત કૌર કરશે અને તેમાં નેટ શિવર-બ્રન્ટ, એમેલિયા કેર, પૂજા વસ્ત્રાકર, યાસ્તિકા ભાટિયા, હીથર ગ્રેહામ, ઈસાબેલ વોંગ, અમનજોત કૌર, ધારા ગુજ્જર, સાયકા ઈશાક, હેલી મેથ્યુઝ, ક્લો ટ્રાયન, હુમાઈરા કાઝી, પ્રિયંકા બાલા, સોનમ યાદવ, નીલમ બિષ્ટ અને જિન્તીમણી કલિતાનો સમાવેશ થાય છે.


મુંબઈ ઈન્ડિયન્સ WPL 2023ની સિઝન પહેલી મેચ ચોથી માર્ચ 2023ના રોજ ગુજરાત જાયન્ટ્સ સામે ડી. વાય. પાટિલ સ્ટેડિયમમાં રમશે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Mumbai indians, Neeta Ambani, Women Cricketers