Home /News /south-gujarat /

ગ્રીષ્મા વેકરિયાના હત્યારા ફેનિલને આજે મળી શકે છે સજા, કોર્ટમાં બચાવ પક્ષની દલીલ શરૂ

ગ્રીષ્મા વેકરિયાના હત્યારા ફેનિલને આજે મળી શકે છે સજા, કોર્ટમાં બચાવ પક્ષની દલીલ શરૂ

આરોપી ફેનિલ ગોયાણી

Grishma Vekaria murder case update: ફેનીલે ગ્રીષ્માના ગળા પર ચપ્પુના બે ઘસરકા કર્યા બાદ તેનું મૃત્યુ થયુ હતુ. ત્યારબાદ ફેનીલે હાથની નસ કાપી ઝેરી દવા પીને આપઘાત કરવાનું નાટક કર્યું હતું

    સુરત: શહેરના (Surat News) ચકચારી ગ્રીષ્મા વેકરીયા હત્યા (Grishma Vekaria Murder case) કેસના આરોપી ફેનિલ ગોયાણી (Fennil Goyani) સામે અંદાજે 69 દિવસ ચાલેલી સ્પીડી ટ્રાયલના અંતે ગુરૂવારે મુખ્ય જિલ્લા સેશન્સ જજ વિમલ કે.વ્યાસે આરોપીને દોષિત જાહેર કર્યો છે. ગઇકાલે જજે બંને પક્ષોની દલીલો તથા રજુ કરેલા પુરાવા જોયા બાદ બચાવપક્ષે આરોપીના બચાવવા માટે કરેલી તમામ દલીલોને નકારી કાઢી આરોપીને ઈપીકો-302(હત્યા) 307 હત્યાનો પ્રયાસ, 354(ડી) 342, 504, 506(2) તમામ ગુનામાં દોષી ઠેરવતો હુકમ કર્યો હતો. તો આજે આરોપી ફેનિલને કોર્ટ સજા સંભળાવી શકે તેવી પુરેપુરી શક્યતાઓ છે. કોર્ટમાં બચાવ પક્ષની દલીલો શરૂ થઇ ગઇ છે.

    12મી ફેબ્રુઆરીએ શું બન્યું હતું?

    શહેરના પાસોદરામાં ગઈ 12મી ફેબુ્રઆરીના રોજ સાંજે છ વાગ્યે એક તરફી પ્રેમમાં આરોપી ફેનિલ પંકજ ગોયાણીએ 21 વર્ષીય ગ્રીષ્મા વેકરીયાની સોસાયટીના ગેટ પર ચપ્પુ લઇ પહોંચી ગયો હતો. તેને સમજાવવા ગયેલા ગ્રીષ્માના કાકા સુભાષભાઇ, ભાઇ ધ્રુવ વેકરીયા પર ચપ્પુથી હુમલો કરીને ઇજા પહોંચાડી હતી. ગ્રીષ્મા તેમને બચાવવા જતા ફેનીલે તેના ગળા પર ચપ્પુના બે ઘસરકા કર્યા હતા અને લોહીના ફુવારા ઉડયા બાદ તેનું મૃત્યુ થયુ હતુ. ત્યારબાદ ફેનીલે હાથની નસ કાપી ઝેરી દવા પીને આપઘાત કરવાનું નાટક કર્યું હતું. આ આખી ઘટનાને લોકોએ મોબાઇલમાં કેદ કરી લીધી હતી.

    105 સાક્ષીઓની જુબાની લેવાઇ

    ગ્રીષ્માના ભાઈ ધ્રુવ વેકરીયાએ કામરેજ પોલીસમાં હત્યા, હત્યાના પ્રયાસ, ધાકધમકી આપવા સહિતના ગુના બદલ ફોજદારી ફરિયાદ નોંધાવી હતી. બનાવમાં સાત દિવસમાં ચાર્જશીટ બાદ આરોપી ફેનીલ ગોયાણી વિરુદ્ધ ચાર્જફ્રેમની કાર્યવાહી કરવામાં આવી હતી. સરકારપક્ષે મુખ્ય જિલ્લા સરકારી વકીલ નયન સુખડવાલાએ સરકારપક્ષના 190 સાક્ષીઓ સહિત દસ્તાવેજી પુરાવાનું લીસ્ટ સોંપતા તા.25 ફેબુ્રઆરીથી આરોપી વિરુધ્ધ સ્પીડી ટ્રાયલ હાથ ધરાઇ હતી. 85 સાક્ષી ડ્રોપ કરીને 105 સાક્ષીઓની જુબાની લેવામાં આવી હતી. બચાવપક્ષે ઝમીર શેખ તથા અજય ગોંડલીયાએ મુખ્યત્વે આરોપીના બચાવમાં ઘટના સ્થળના પંચનામા, પોસ્ટમોર્ટમ દરમિયાન તપાસ અધિકારીની એક સાથે બબ્બે જગ્યાએ હાજરીના મુદ્દે વાંધો ઉઠાવ્યો હતો. કબજે કરવામાં આવેલા મોબાઈલના મુદ્દે પણ બચાવપક્ષે વાંધો ઉઠાવી ભોગ બનનાર તથા આરોપી વચ્ચે પ્રેમપ્રકરણ હોવા તથા સમગ્ર બનાવ ઉશ્કેરાટના કારણે બન્યો હોઈ આરોપીનો હત્યાનો ઈરાદો ન હોવાનો બચાવ લીધો હતો.

    ગ્રિષ્માની તસવીર


    બચાવપક્ષની તમામ દલીલોને નકારી કાઢી

    જોકે, કોર્ટે બચાવપક્ષની તમામ દલીલોને નકારી કાઢી હતી. આારોપી ફેનીલ ગોયાણીને તમામ ગુનામાં દોષી ઠેરવ્યો હતો. જે બાદ ગુરૂવારે આરોપીની સજા કેટલા પ્રમાણમાં કરવી તેના મુદ્દે બચાવપક્ષે દલીલો કરવા માટે મુદત માંગી હતી. જેથી કોર્ટે સજાના મુદ્દે વધુ સુનાવણી આજે તા.22મી એપ્રિલના રોજ હાથ ધરવા નિર્દેશ આપ્યો હતો.

    ફેનિલે ધર્મની બહેનને કરી હતી હત્યા કરવાની વાત

    ગ્રીષ્મા વેકરીયા હત્યા કેસના આરોપી ફેનીલ ગોયાણીએ ગ્રીષ્માની હત્યા કરતા પહેલા પોતાની ધર્મની માનેલી બહેન ક્રિષ્નાને ગ્રીષ્માને મારી નાખવી છે તેવી ઈન્ટાગ્રામ પર ચેટીંગ કરીને પોતાનો ગુનાઈત ઈરાદો દર્શાવ્યો હતો. જે અંગે કોર્ટે આ બાબત અંગે ક્રિષ્નાએ જો પોલીસને આરોપીના ગુનાઈત ઈરાદાની જાણ ન કરી તે દુઃખદ બાબત ગણાવી હતી. જો તેણે આ અંગેની જાણ કરી હોત તો આ ગુનો બનતા અટકી શક્યો હોત. તદુપરાંત આરોપી ફેનીલે પોતાના મિત્રો આકાશ તથા હરેશ વઘાસીયા સમક્ષ પણ એક્સ્ટ્રા જ્યુડીશ્યલ કન્ફેશન કરીને પોતાનો ગુનાઈત ઈરાદો જાહેર કર્યો હોવાના સરકારપક્ષના પુરાવા તથા દલીલને કોર્ટે માન્ય રાખ્યો છે. જેથી બચાવપક્ષે સમગ્ર બનાવ ઉશ્કેરાટમા બન્યો હોવાની દલીલને કોર્ટે નકારી કાઢી છે.



    આ અંગે ફરિયાદી પક્ષના વકીલ નયન સુખડવાલાએ જણાવ્યું હતુ કે, સુરતના ઇતિહાસમાં પ્રથમ વખત કોઈ ખૂનની ઘટનામાં આ પ્રકારે ઝડપથી ટ્રાયલ થઈ હોય તેવો આ પહેલો બનાવ છે. ફરિયાદી પક્ષને બચાવ પક્ષ અને તમામ પૂરતો સમય આપ્યા બાદ પણ ખૂબ જ ઝડપથી આ કેસની સુનાવણી હાથ ધરવામાં આવી છે. કોર્ટે આ ઘટનાને હત્યારા દ્વારા ગણતરીપૂર્વક હત્યા કરવામાં આવે એ પ્રકારની ઘટના ગણી છે. કોર્ટે કહ્યું કે, પ્રેમ હોય એટલે હત્યા કરવાનું લાયસન્સ મળી જાય તેમ નથી. માત્ર કેટલાક ફોટાઓ રજૂ કરવાથી બન્ને વચ્ચે પ્રેમ હતો એવું માની લેવાય નહીં.
    Published by:Kaushal Pancholi
    First published:

    Tags: Grishma Vekaria murder case, ગુજરાત, સુરત, હત્યા

    આગામી સમાચાર