ગુજરાતના આ માર્કેટ યાર્ડમાં ઘઉંના ઐતિહાસિક ભાવ બોલાયા, ખેડૂતો ખુશખુશાલ

હિંમતનગર: હિંમતનગર માર્કેટ યાર્ડમાં ઘઉંનો સૌથી ઉંચો ભાવ બોલાયો છે. ઈતિહાસમાં પહેલીવાર ઘઉંનો ભાવ 900ને પાર પહોંચ્યો છે. ખેડૂતના ઘઉંનો ભાવ 901 રૂપિયા બોલાયો છે. જેને લઇને ખેડૂતોમાં પણ ખુશી જોવા મળી રહ્યો છે. સાથે જ માર્કેટિંગ યાર્ડમાં ઘઉંની આવક વધી છે. આજે માર્કેટિંગ યાર્ડમાં 14000થી વધુ બોરીની આવક થઇ છે. બીજી બાજુ, હજુ પણ આવક અને ભાવ વધવાની આશા છે.

બે દિવસ પહેલા 836 ભાવ બોલાયો હતો

સાબરકાંઠા જીલ્લાના મુખ્ય મથક હિંમતનગર ખાતે આવેલા માર્કેટિંગ યાર્ડમાં ઘઉંની અધધ આવક થઈ રહી છે. બે દિવસ અગાઉ 8 હજાર બોરીથી પણ વધુ ઘઉંની આવક નોંધાઈ હતી. વાવેતરની વાત કરીએ તો જીલ્લામાં ઘઉંનું 86 હજાર કરતાં વધુ હેક્ટરમાં વાવેતર થયું હતું, પરંતુ કમોસમી વરસાદ અને માવઠાને લઈને ખેડૂતોમાં ચિંતા જોવા મળી હતી. હિંમતનગરના ઓપન માર્કેટમાં બે દિવસ અગાઉ જાહેર હરાજીમાં અધધ એટલે કે 836 રૂપિયા ભાવ પડયાં હતાં.

આ પણ વાંચો: આ વિસ્તારના મરચાની રસોઈ માટે ખૂબ જ માંગ, જાણો શું છે ખાસિયત

ખેડૂતોમાં ખુશીનો માહોલ

આમ તો ખેડૂતોને આટલા બધા ભાવની આશા ન હતી, પરંતુ અત્યારે સૌથી વધુ ભાવ 901 પ્રતિ મણનો ભાવ મળતાં ખેડૂતોમાં ખુશી જોવા મળી રહી છે. ગુજરાતમાં સૌથી વધુ ભાવ હિંમતનગર માર્કેટ યાર્ડમાં મળી રહ્યા છે, તેવું હાલ તો ખેડૂતો માની રહ્યા છે. જેથી આસપાસના જિલ્લાના ખેડૂતો પણ અહીં આવી રહ્યા છે.

જાણો માવઠામાં પલળેલા ઘઉંનો ભાવ

આ વખતે બેથી ત્રણ વખત માવઠાનો માર ખેડૂતોને સહન કરવો પડ્યો હતો અને ખેડૂતોમાં પણ ભાવ ઓછો મળવાનો ભય હતો. પરંતુ આ વખતે ખુલ્લી હરાજીમાં સરકારના ટેકાના ભાવ કરતાં પણ વધુથી હરાજી શરૂ થઈ છે. 430થી લઈને 901 સુધી ખેડૂતોને ભાવ મળી રહ્યા છે. જો પલળેલા ઘઉં હોય તો તેમાં સરેરાશ 450થી લઈને 500ની આસપાસ ભાવ મળે છે. જે ઘઉં સારા હોય તેના 670થી લઈને 901 સુધી ભાવ મળી રહ્યા છે. જેને લઈને હાલ તો ખેડૂતોમાં ખુશી જોવા મળી રહી છે. આ ભાવ જાણી આસપાસના જિલ્લા જેવા કે અરવલ્લી, મહેસાણા, પંચમહાલ, બનાસકાંઠાના ખેડૂતો વહેલી સવારથી જ આવી પહોંચે છે. આ ઉપરાંત આવતીકાલની હરાજી માટે અત્યારથી જ ખેડૂતો લાઈન લગાવીને ઉભા છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Gujarat News, Himmatnagar