રાજકોટ: લોક સાહિત્યકાર દેવાયત ખવડની મુશ્કેલીઓ વધી, હત્યાના પ્રયાસની કલમ હેઠળ નોંધાયો ગુનો

રાજકોટ: " રાણો રાણાની રીતે " ફેઇમ લોક સાહિત્યકાર દેવાયત ખવડ વિરુદ્ધ રાજકોટ શહેરના એ ડિવિઝન પોલીસ સ્ટેશનમાં હત્યાની પ્રયાસ સહિતની કલમો હેઠળ ગુનો નોંધવામાં આવ્યો છે. દેવાયત ખવડ સહિત કુલ ત્રણ વ્યક્તિઓ વિરુદ્ધ આઈપીસીની કલમ 307, 325, 506 (2), 114 તેમજ ગુજરાત પોલીસ એક્ટની કલમ હેઠળ ગુનો નોંધવામાં આવ્યો છે.

બુધવારના રોજ રાજકોટ શહેરના એ ડિવિઝન પોલીસ સ્ટેશન વિસ્તારમાં આવતા સર્વેશ્વર ચોક નજીક મયુરસિંહ રાણા ઉપર હુમલો કરવામાં આવ્યો હતો. હુમલામાં તેમના હાથ અને પગના ભાગે તેમને ઇજા પહોંચાડવામાં આવી હતી. પીડિતે સમગ્ર મામલે પોતાને માર મારનાર અન્ય કોઈ નહીં પરંતુ લોકસાહિત્યકાર દેવાયત ખવડ અને અજાણીઓ ઈસમ હોવાનું જણાવ્યું હતું.

આ પણ વાંચો: ગુજરાત ચૂંટણીનાં પરિણામનું પોસ્ટમોર્ટમ

સમગ્ર મામલાના સીસીટીવી ફૂટેજ પણ ગણતરીની જ કલાકોમાં સોશિયલ મીડિયામાં વાયરલ થવા માંડ્યા હતા. વાયરલ થયેલા વીડિયોમાં સ્પષ્ટપણે જોઈ શકાય છે કે, દેવાયત ખવડ જેવી વ્યક્તિ અન્ય એક સાથે નંબર વગરની સ્વિફ્ટ કારમાંથી ઉતરે છે. તેમજ રસ્તા પર જઈ રહેલા મયુરસિંહ રાણા ઉપર બેફામ રીતે માર મારવા માંડે છે.

આ પણ વાંચો: ગુજરાતના પાટીદારો ભાજપ તરફ વળ્યા

સમગ્ર મામલે ઇજા પહોંચનારા મયુરસિંહ રાણાને તાત્કાલિક અસરથી પ્રથમ સિવિલ હોસ્પિટલ અને ત્યારબાદ રાજકોટ શહેરની ખાનગી હોસ્પિટલમાં હાલ સારવાર આપવામાં આવી રહી છે. બીજી તરફ ગુનો નોંધાતા એ ડિવિઝન પોલીસ દ્વારા દેવાયત ખવડના ઘરે પણ તપાસ કરવામાં આવી હતી. પરંતુ દેવાયત ખવડ પોતાના ઘરે ન હોવાનું હાલ પોલીસ સૂત્રો દ્વારા જાણવા મળી રહ્યું છે.



પોલીસને આપેલી ફરિયાદમાં ફરિયાદી મયુરસિંહ રાણાએ જણાવ્યું છે કે, હુમલા પાછળનું કારણ આજથી એકાદ વર્ષ પૂર્વે દેવાયત ખવડની બાજુમાં રહેતા મારા મામાને ત્યાં પાર્કિંગ બાબતે માથાકૂટ થઈ હતી. જે બાબતનો ખાર આજ દિવસ સુધી દેવાયત ખવડ રાખતો હોય તેના કારણે દેવાયત સહિત બે લોકોએ મારા પર હુમલો કર્યો હતો. જ્યારે કે અન્ય એક વ્યક્તિ કાર ચાલક તરીકે મદદગારીમાં હતો.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: ક્રાઇમ સમાચાર, ગુજરાત, રાજકોટ