પોરબંદર: માત્ર 300 રુપિયાની ચોરી કરવા પર યુવાને જીવ ગુમાવ્યો, ચોંકાવનારી ઘટના

પ્રતિશ શીલુ, પોરબંદર: માત્ર 300 રુપિયાની ચોરી કરવા પર યુવાનને જીવ ગુમાવવાનો વારો આવ્યો છે. 24 વર્ષીય શ્યામ બથીયા પોતાના ઘરનું ગુજરાન ચલાવવા માટે ફિનાઈલ અને એસિડ વહેંચતો હતો. શ્યામ બથીયાએ ગત 31 જાન્યુઆરીના રોજ બોખીરા વિસ્તારમાં આવેલા વાછરાડાડાના મંદિરમાંથી 300 રુપિયાની ચોરી કરી હતી. ચોરીની જાણ સ્થાનિકોને થતાં એભલ કડછા, લાખા ભોગેસરા તથા રાજુ બોખીરીયા આ ત્રણેય આરોપીઓએ મૃતક શ્યામ બથીયાને ઉઠાવી મંદિર નજીક આવેલી ઝેરોક્ષની દુકાને લઈ જઈ ગુનો કબુલવા માટે કાયદો હાથમાં લીધો હતો અને મૃતકને લાકડીઓ તથા પ્લાસ્ટિકના પાઈપ વડે આડેધડ માર મારવામાં આવ્યો હતો. પોલીસે આરોપીઓ વિરુદ્ધ હત્યા તેમજ પુરાવા નાશ કરવા સહિતની વિવિધ કલમો હેઠળ ગુનો નોંધી કાયદેસરની કાર્યવાહી હાથ ધરી છે.

80થી 90 ટકા દિવ્યાંગ એસિડ-ફિનાઈલ વેચતો હતો

પોરબંદર શહેરના નવા કુંભારવાડા વિસ્તારમાં રહેતા 24 વર્ષીય શ્યામ કીશોર બથીયા કે જે 80થી 90 ટકા દિવ્યાંગ હોય અને સાયકલ લઈને એસિડ તથા ફિનાઈલ વહેંચી પોતાના પરિવારનું ગુજરાન ચલાવતો હતો. આ ઘટનામાં જે શ્યામ બથીયાની હત્યા થઈ છે તે શ્યામ બથીયાએ ગત 31 જાન્યુઆરીના રોજ બોખીરા વિસ્તારમાં આવેલા વાછરાડાડાના મંદિરમાંથી મૃતકના કહેવા મુજબ 150થી 300 રુપિયા જેટલી ચોરી કર્યાનું સામે આવ્યુ હતું.

આ પણ વાંચો: વલસાડનાં વિદ્યાર્થીનું કમાલનું ઇનોવેશન

આડેધડ માર મારવામાં આવ્યો હતો

ચોરીની ઘટના બાદ બીજા દિવસે શ્યામ બથીયાએ આ ચોરી કરી હોવાની જાણ બોખીરામાં રહેતા સ્થાનિક આ કેસના આરોપી એવા એભલ મેરામણ કડછા, લાખા ભીમા ભોગેસરા તથા રાજુ સવદાસ બોખીરીયા આ ત્રણેય આરોપીઓએ મૃતક શ્યામ બથીયાને ઉઠાવી મંદિર નજીક આવેલી ઝેરોક્ષની દુકાને લઈ જઈ ગુનો કબુલવા માટે કાયદો હાથમાં લઈને લાકડીઓ તથા પ્લાસ્ટિકના પાઈપ વડે આડેધડ માર મારવામાં આવ્યો હતો.

પોલીસે શ્યામ બથીયાને લોકઅપની બહાર બેસાડ્યો હતો ને...

આ કેસનો ત્રીજા નંબરનો આરોપી રાજુ સવદાસ બોખીરીયાએ ભાજપ શાસિત પોરબંદર છાંયા નગરપાલિકાના ટાઉન પ્લાનિંગ કમિટીના ચેરમેન કેશુ બોખીરીયાનો નાનો ભાઈ થાય છે. આરોપીઓએ ચોરીની કબુલાત માટે ઢોર માર માર્યા બાદ પોલીસને જાણ કરતા પોલીસે ઘટના સ્થળે પહોંચી શ્યામ બથીયાને હોસ્પિટલ લઈ જવાને બદલે ઉદ્યોગનગર પોલીસ સ્ટેશન ખાતે લઈ ગઈ હતી. પોલીસે શ્યામ બથીયાને લોકઅપની બહાર બેસાડ્યો હતો. તે દરમિયાન થોડા સમય બાદ તે એકાએક ઢળી પડતા પોલીસે 108ને જાણ કરતા કીશોર બથીયાને મૃત જાહેર કર્યો હતો. ઢોર મારવા બદલ મોત નિપજતા મૃતક શ્યામ બથીયાના પિતાએ આરોપીઓ વિરુદ્ધ ઉદ્યોગ નગર પોલીસ સ્ટેશનમાં ફરિયાદ આપતા પોલીસે આરોપીઓ વિરુદ્ધ હત્યા તેમજ પુરવા નાશ કરવા સહિતની વિવિધ કલમો હેઠળ ગુનો નોંધી કાયદેસરની કાર્યવાહી હાથ ધરી છે.

બોખીરા ખાતે વાછરાડાડાના મંદિરે જ્યાં આ ઘટના બની હતી ત્યાં સીસીટીવી કેમેરા પણ હોય પરંતુ આ કેસના આરોપીઓએ શ્યામ બથીયાને જ્યારે ઢોર માર માર્યો ત્યારે તેણે આ સીસીટીવી આટલો સમય બંધ કરી દીધા હોવાનું સામે આવ્યું હતું. આરોપીઓએ ઢોર માર માર્યા બાદ પોલીસને જાણ કરી હતી કે તેઓએ ચોરીના આરોપીને ઝડપી પાડ્યો છે. પોલીસ ઘટના સ્થળે પહોંચી ત્યારે મૃતક શ્યામ બથીયા ત્યાં નીચે પડ્યો હતો અને પોલીસે ત્યાં હાજર લોકોને પૂંછ્યુ હતું કે, આને કોઈ ઈજા પહોંચી છે કે કેમ, ત્યાર બાદ તેઓ શ્યામ બથીયાને પોલીસ પીસીઆર વાનમાં બેસાડી ઉદ્યોગનગર પોલીસ સ્ટેશને પહોંચી હતી. જો હકીકતે આ મૃતકને આરોપીઓએ ઢોર માર માર્યાની જાણ ત્યાં ઉપસ્થિત સ્થાનિકોને પણ હોય તેથી ખોટી જાણકારી આપવા બદલ ઉપસ્થિત જેમનું નામ ખુલશે તેઓ વિરુદ્ધ પણ કાર્યવાહી કરવામાં આવશે તેવું સીટી ડિવાયએસપીએ જણાવ્યું હતું. મૃતક શ્યામ બથીયાને પોલીસ સ્ટેશનમાં જ્યાં બેસાડવામાં આવ્યો હતો ત્યા સીસીટીવી છે અને આ સમગ્ર ઘટનાના સીસીટીવી છે.

મંદિરમાં થયેલી ચોરીના આરોપીને પકડી પોલીસને જાણ કરવી તે બાબત છે પરંતુ કાયદો વ્યવસ્થા હાથમાં લઈને માર મારવાના કેવા ગંભીર પરિણામ આવી શકે અને મામલો મોત અને ત્યાર બાદ હત્યાના ગુના સુધી પહોંચી શકે તેનું જીવતું જાગતું ઉદારણ આ ઘટના છે. આરોપીઓએ મૃતક શ્યામ બથીયાને બેફામ માર મારતા તેઓ વિરુદ્ધ તો હત્યાનો ગુનો નોંધાયો જ છે પરંતુ સમયસર શ્યામ બથીયાને હોસ્પિટલ લઈ જવાને બદલે તેને પોલીસ સ્ટેશન ખાતે લઈ જઈ જે રીતે પોલીસ સ્ટેશનમાં તેનું મૃત્યુ થયુ છે તે બેદરકારી બદલ ઉદ્યોગનગર પોલીસ સ્ટેશનના પીએસઆઈ સહિત પાંચ પોલીસકર્મીઓને પણ સસ્પેન્ડ કરવામાં આવ્યા છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Crime news, Gujarat News, Porbandar News