પંચમહાલ: અકસ્માત બાદ પૂર્વ સાંસદના કાર ચાલકે એસટી બસના ડ્રાઇવરને માર્યો માર, મારામારીનો વીડિયો વાયરલ

પંચમહાલ: જિલ્લામાં અકસ્માત બાદ મારામારીનો એક વીડિયો વાયરલ (Viral video) થયો છે. હકીકતમાં પંચમહાલના પૂર્વ સાંસદની કાર અને એસ.ટી. બસ વચ્ચે ટક્કર થઈ ગઈ હતી. જે બાદમાં પૂર્વ સાંસદના કાર ડ્રાઇવરે એસ.ટી. બસ ચાલકને માર માર્યો હતો. અકસ્માત બાદ રોડ પર જ મારામારીના દ્રશ્યો સામે આવ્યા હતા. આ બનાવ કાલોલની અલીન્દ્રા ચોકડી (Alindra Cross road) નજીક બન્યો હતો. જેમાં પૂર્વ સાંસદ ગોપાલસિંહ સોલંકી (Gopalsinh Solanki)ની કારને અકસ્માત નડ્યો હતો. જે બાદમાં ગોપાલસિંહ સોલંકીની કારના ચાલકે સરકારી બસના ડ્રાઇવર (ST bus driver)ને માર માર્યો હતો.

કારનો ડ્રાઇવર એસ.ટી. બસના ડ્રાઇવરને માર મારતો હોય તેવો વીડિયો કોઈ મુસાફરે પોતાના મોબાઇલમાં શૂટ કરી લીધો હતો. આ આખી વાત પોલીસ સુધી પણ પહોંચી છે. એવી પણ શક્યતા છે કે બસમાં કેટલાક એસ.ટી. કર્મીઓ મુસાફરી કરી રહ્યા હતા. જેમણે આ વીડિયો શૂટ કર્યો હતો. આ બનાવ બાદ એસ.ટી.ના કર્મચારીઓમાં પણ રોષ જોવા મળ્યો છે.

પૂર્વ સાંસદે શું કહ્યું?

આ બનાવ અંગે પૂર્વ સાંસદ ગોપાલસિંહ સોલંકીએ જણાવ્યુ હતુ કે, "હું મારા ડ્રાઇવર સાથે કાર લઈને જઈ રહ્યો હતો. આ દરમિયાન એસ.ટી. બસના ડ્રાઇવરે બેદરકારી દાખવી અચાનક બ્રેક મારી હતી. જે બાદમાં કારને જમણી તરફ લીધી હતી. આ દરમિયાન એસ.ટી. બસના ડ્રાઇવરે પણ જાણી જોઈને કાર જમણી બાજુ લીધી હતી. આ કારણે બસ અને કારની ટક્કર થઈ હતી. અકસ્માતમાં કોઈને ઈજા નથી થઈ. અકસ્મતામાં વોલ્વો કારને બેથી અઢી લાખ રૂપિયાનું નુકસાન થયું છે."

આ પણ વાંચો: એવી દુકાન જેના દરવાજા ક્યારેય નથી થતાં બંધ

ફરિયાદ કરવાનો ઇન્કાર

પૂર્વ સાંસદે વધુમાં જણાવ્યું હતું કે,"અકસ્માત બાદ હું ડ્રાઇવર સામે કોઈ ફરિયાદ કરવાનો નથી. અમે ફક્ત વીમાનો ક્લેમ કરીએ છીએ. એસ.ટી. બસના ડ્રાઇવર અને કંડક્ટરે મારી ગાડીના ડ્રાઇવરને ફટકાર્યો હતો. અમે કાયદો હાથમાં નથી લીધો. જો એ લોકો સામેથી ફરિયાદ કરશે તો અમે પછી નિર્ણય કરીશું.."

અકસ્માત બાદ મારામારીનો વીડિયો વાયરલ

પંચમહાલમાં પૂર્વ સાંસદની કાર અને ST બસ વચ્ચે અકસ્માત#Panchmahal pic.twitter.com/lhK5e5W90b

— News18Gujarati (@News18Guj) June 10, 2022

ડ્રાઇવરને માર માર્યો તો ફરિયાદ શા માટે નહીં?

આ કેસમાં જે વીડિયો સામે આવ્યા છે તેમાં સ્પષ્ટ જોઈ શકાય છે કે પૂર્વ સાંસદનો ડ્રાઇવર કેબિનમાં અંદર ચઢીને ડ્રાઇવરને માર મારી રહ્યો છે. આ ઉપરાંત તે બસના ડ્રાઇવરને કોલરથી પકડીને પણ લઈને જતો નજરે પડે છે. આ કેસમાં પૂર્વ સાંસદે એવો આક્ષેપ કર્યો છે કે બસના ડ્રાઇવર અને કંડક્ટરે તેના ડ્રાઇવરને માર માર્યો છે તો તેઓ ફરિયાદ કરવાનો શા માટે ઇન્કાર કરી રહ્યા છે? આ ઉપરાંત તેમણે પોતાના કારને બેથી અઢી લાખનું નુકસાન થયું હોવાનો દાવો કર્યો છે તો શા માટે પોલીસ ફરિયાદ નથી કરી રહ્યા? બીજી તરફ એવી પણ વિગતો સામે આવી છે કે એસ.ટી. બસનો ડ્રાઇવર કારના ડ્રાઇવર વિરુદ્ધ ફરિયાદ કરવા માટે પોલીસ મથક પહોંચ્યો છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Car driver, Road accident, ST Bus, અકસ્માત, કાર