Home /News /north-gujarat /

અનદેખી, અનિર્ણય, અસહયોગ... હાર્દિક પટેલ કોંગ્રેસથી કેમ છે નાખુશ? જાણો 5 કારણો

અનદેખી, અનિર્ણય, અસહયોગ... હાર્દિક પટેલ કોંગ્રેસથી કેમ છે નાખુશ? જાણો 5 કારણો

હાર્દિક પટેલ

Gujarat Election 2022: હાર્દિક પટેલનો આક્ષેપ છે કે, કોંગ્રેસમાં જોડાયાના 3 વર્ષ બાદ પણ ગુજરાત કોંગ્રેસ તેને નિર્ણય પ્રક્રિયામાં સામેલ કરતી નથી.

    મનોજ શર્મા

    અમદાવાદઃ ગુજરાત કોંગ્રેસના (Gujarat Congress) કાર્યકારી અધ્યક્ષ હાર્દિક પટેલ (Hardik Patel) હાલ પાર્ટીની કામગીરીથી નારાજ દેખાઇ રહ્યા છે. ગુજરાતના પાટીદાર (Patidar) સમાજના પ્રભાવશાળી અને યુવા નેતા હાર્દિક પટેલ છેલ્લા એક વર્ષથી પ્રદેશ કોંગ્રેસની રીતભાતથી નારાજ છે. તેમણે ઘણી વખત જાહેરમાં પોતાની નારાજગી વ્યક્ત કરી છે. શુક્રવારે, તેમણે ત્યાં સુધી કહ્યું હતું કે "તેમના વિકલ્પો ખુલ્લા છે." જે બાદ તે નિવેદનનું ભાજપમાં જોડાવાની સંભાવના તરીકે અર્થઘટન કરવામાં આવ્યું હતું. જોકે, બીજા જ દિવસે હાર્દિકે ટ્વીટ કરીને સ્પષ્ટ કર્યું હતું કે, તે કોઈ અન્ય પાર્ટીમાં જોડાવાનો નથી. ચાલો જાણીએ, કોંગ્રેસ પાર્ટી પર હાર્દિક પટેલના 5 મોટા આરોપ અંગે.

    આરોપ નંબર 1: પક્ષના નિર્ણયોથી દૂર રખાયો

    હાર્દિક પટેલનો આક્ષેપ છે કે, કોંગ્રેસમાં જોડાયાના 3 વર્ષ બાદ પણ ગુજરાત કોંગ્રેસ તેને નિર્ણય પ્રક્રિયામાં સામેલ કરતી નથી. માર્ચમાં પ્રદેશ કોંગ્રેસે 75 મહાસચિવ અને 25 ઉપપ્રમુખની નિમણૂક કરી હતી. હાર્દિકનો આરોપ છે કે, તેની સાથે તેની ચર્ચા પણ કરવામાં આવી નથી. હાર્દિકે ગયા વર્ષે નાગરિક ચૂંટણી માટે ટિકિટ વિતરણમાં અવગણનાનો આક્ષેપ પણ કર્યો હતો. ઈન્ડિયન એક્સપ્રેસ અનુસાર, કોંગ્રેસના નેતાઓનું કહેવું છે કે, હાર્દિકની અવગણના કરવાના આરોપ પર તે ઘણીવાર 'ખૂબ ડિમાન્ડિંગ' બની જાય છે. તમે તમારા લોકોની પાર્ટીમાં નિમણૂક માટે વિનંતી કરી શકો છો, પરંતુ તમે દબાણ કરી શકતા નથી કે આવી વ્યક્તિની નિમણૂક ન કરવી જોઈએ. કોંગ્રેસના એક નેતાએ હાર્દિકની તુલના અલ્પેશ ઠાકોર સાથે કરી છે. ઓબીસી નેતા અલ્પેશ કોંગ્રેસમાં જોડાયા બાદ 2017માં ધારાસભ્ય બન્યા હતા. પાર્ટીએ તેમને બિહારમાં જવાબદારી સોંપી, પરંતુ 2020માં તેઓ ભાજપમાં જોડાયા. જે બાદ તેઓ પેટાચૂંટણી પણ હારી ગયા હતા.

    આરોપ નંબર 2: પાર્ટી હાઈકમાન્ડ પર અનિર્ણાયકતાનો પડછાયો

    હાર્દિકનો દાવો છે કે, તેણે પાર્ટી હાઈકમાન્ડ સામે ઘણી વખત પોતાના વિચારો વ્યક્ત કર્યા છે. પાર્ટીના મહાસચિવ કેસી વેણુગોપાલને પણ મળ્યા. પણ દર વખતે મને એક જ આશ્વાસન મળ્યું - કાંઈક સારું થશે, તને તારું સ્થાન મળશે. પરંતુ હાર્દિક કહે છે કે, છેલ્લા એક વર્ષમાં જો કંઈ બદલાયા હોય તો ગુજરાત કોંગ્રેસ અધ્યક્ષ, બીજું કાંઈ બદલાયું નથી. ગયા વર્ષે ડિસેમ્બરમાં કોંગ્રેસે OBC નેતા અને પૂર્વ સાંસદ જગદીશ ઠાકોરને ગુજરાત કોંગ્રેસના પ્રમુખ તરીકે નિયુક્ત કર્યા હતા. પાટીદાર નેતા નરેશ પટેલના કોંગ્રેસમાં જોડાવાને લઈને પાર્ટીમાં ચાલી રહેલી મૂંઝવણથી હાર્દિક પણ નારાજ છે.

    આ પણ વાંચો - કોંગ્રેસ મિશન ૨૦૨૨ના ટાર્ગેટ સાથે સોશિયલ મીડિયા પર ભાર મુક્યો, યુથને આકર્ષિત કરવા કોંગ્રેસનો પ્રયાસ

    આરોપ નંબર 3: પ્રદેશ કોંગ્રેસને સાઈડલાઈન કરવામાં આવી

    હાર્દિક પટેલ સતત આરોપ લગાવી રહ્યા છે કે, ગુજરાત કોંગ્રેસ પર ધ્યાન આપવામાં આવતું નથી. હાર્દિક પટેલને રાહુલ ગાંધી કોંગ્રેસમાં લાવ્યા હતા. 2019 માં જોડાયાના એક વર્ષની અંદર, તેમને ગુજરાત કોંગ્રેસના કાર્યકારી અધ્યક્ષ બનાવવામાં આવ્યા. કોંગ્રેસના એક નેતાએ કહ્યું કે, આના કારણે પાર્ટીમાં લાંબા સમયથી હાજર નેતાઓમાં બેચેની હતી, જે સ્વાભાવિક છે. જોકે, તેઓ એવું પણ માનતા હતા કે, હાર્દિક અને જિજ્ઞેશ મેવાણી જેવા નેતાઓ સાથે આંદોલનથી અલગ વર્તન કરવું જરૂરી છે. પાર્ટીએ પણ તેમ કર્યું. 2019ની લોકસભા ચૂંટણીમાં, હાર્દિક અહેમદ પટેલ સિવાય, તે ગુજરાતમાંથી એકમાત્ર કોંગ્રેસના નેતા હતા જેમને સ્ટાર પ્રચારકનો દરજ્જો મળ્યો હતો. 2022ની પંજાબ ચૂંટણીમાં પણ તેમને આ જ દરજ્જો આપવામાં આવ્યો હતો.

    આરોપ નંબર 4: નાગરિક ચૂંટણીમાં ખર્ચ પણ વધાર્યો

    હાર્દિક પટેલનો દાવો છે કે, 2021ની સ્થાનિક સંસ્થાઓની ચૂંટણીઓ માટે પાર્ટીના પ્રચારની તૈયારીથી લઈને તેના અમલીકરણ સુધીની જવાબદારી તેણે પોતે લીધી હતી. આ રેલીઓમાં કોંગ્રેસના ધારાસભ્ય લલિત કગથરા જેવા પાટીદાર નેતાઓ પણ હાજર રહ્યા હતા. આ દરમિયાન હાર્દિકે માત્ર પાટીદાર પ્રભુત્વ ધરાવતા વિસ્તારોમાં જ નહીં પરંતુ અમદાવાદ જેવા વિસ્તારોમાં પણ પ્રચાર કર્યો હતો. તેમનો દાવો છે કે, આ ઝુંબેશનો ખર્ચ પાર્ટીએ ઉઠાવ્યો નથી, તેમણે પોતે જ ઉઠાવ્યો છે.

    આરોપ નંબર 5: કેસોમાં પક્ષનો ટેકો નથી મળતો

    હાર્દિક સામે 28 કેસ નોંધાયેલા છે. જેમાંથી 2 રાજદ્રોહના છે. ફેબ્રુઆરીમાં, હાર્દિકે જાહેરાત કરી હતી કે જો 2015ના પાટીદાર આરક્ષણ આંદોલન દરમિયાન પાટીદારો પરના કેસ પાછા ખેંચવામાં નહીં આવે તો તે 23 માર્ચથી આંદોલન કરશે. આ પછી ગુજરાત સરકારે હાર્દિક સામેના 10 કેસ પાછા ખેંચવાની પ્રક્રિયા શરૂ કરવાની જાહેરાત કરી હતી. હાર્દિક એ વાતથી પણ નારાજ છે કે, ભાજપે તેના અલ્ટીમેટમ પર ધ્યાન આપ્યું, પરંતુ કોંગ્રેસે કોઈ ધ્યાન આપ્યું નહીં. હાલમાં જ સુપ્રીમ કોર્ટે 2015ના પાટીદાર આંદોલનમાં હાર્દિકને મળેલી સજા પર રોક લગાવી દીધી હતી. આ પછી હાર્દિકે આગામી ચૂંટણી લડવાની ઈચ્છા વ્યક્ત કરી હતી. કોંગ્રેસ તરફથી પણ આ અંગે કોઈ પ્રતિક્રિયા આવી નથી.
    Published by:Kaushal Pancholi
    First published:

    Tags: Gujarat Election 2022, Gujarat Politics, ગુજરાત કોંગ્રેસ, હાર્દિક પટેલ

    આગામી સમાચાર