અરવલ્લી : ભિલોડામાં એક જ રાતમાં 7 ઇંચ વરસાદથી જળબંબાકાર

હાર્દિક પટેલ, અરવલ્લી/ આનંદ જયસ્વાલ, બનાસકાંઠા : હવામાન વિભાગની ભારે વરસાદની આગાહી વચ્ચે ઉત્તર ગુજરાતમાં અમુક વિસ્તારોમાં ભારે વરસાદ નોંધાયો છે. જેમાં સૌથી વધારે વરસાદ અરવલ્લીના ભિલોડામાં નોંધાયો છે. અહીં એક જ રાતમાં સાત ઇંચ વરસાદ ખાબકી જતાં જળબંબાકારની સ્થિતિ ઉભી થઈ છે. વરસાદને કારણે બુઢેલી અને હાથમતી નદીમાં ઘોડાપૂર આવ્યાં છે. પાણીની આવકને પગલે દોલવાણી તળાવ ઓવરફ્લો થઈ ગયું છે. અરવલ્લી ઉપરાંત બનાસકાંઠાના ભાભરમાં 24 કલાકમાં આઠ ઇંચ જેટલો વરસાદ ખાબક્યો છે.

અરવલ્લીમાં ભારે વરસાદથી તળાવના પાણી રોડ અને ખેતરોમાં ફરી વળ્યાં છે. શામળાજી અને ભિલોડા હાઇવે પર પણ પાણી ફરી વળ્યાં છે. આ ઉપરાંત ભિલોડાની અનેક સોસાયટીઓમાં પણ પાણી ભરાયા છે.



અરવલ્લી જિલ્લામાં વરસાદના આંકડા :

ભિલોડા------------7 ઇંચ
ધનસુરા------------ 3 ઇંચ
મોડાસા------------ 2 ઇંચ
માલપુર------------ 1.5 ઇંચ
બાયડ------------ 1.5 ઇંચ
મેઘરજ------------ 1.5 ઇંચ



બનાસકાંઠામાં વરસાદ :

છેલ્લા 24 કલાક દરમિયાન ઉત્તર ગુજરાતના બનાસકાંઠામાં પડેલા વરસાદના આકંડા જોઈએ તો સૌથી વધારે વરસાદ ભાભરમાં ખાબક્યો છે. ભાભરમાં 24 કલાક દરમિયાન આઠ ઇંચ વરસાદ પડ્યો છે. અમીરગઢમાં 65 મિ.મી., પાલનપુરમાં 69 મિ.મી., ડીસામાં 78 મિ.મી., દિયોદરમાં 109 મિ.મી., કાંકરેજમાં 114 મિ.મી., વાવમાં 27 મિ.મી., થરાદમાં 32 મિ.મી., ધાનેરામાં 22 મિ.મી., વડગામમાં 74 મિ.મી., લાખણીમાં 45 મિ.મી., દાંતામાં 91 મિ.મી., સુઈગામમાં 71 મિ.મી. અને દાંતીવાડામાં 65 મિ.મી. વરસાદ નોંધાયો છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Bhiloda, Gujarat monsoon, IMD, અરવલ્લી, વરસાદ