Taliban vs Panjshir: 'આખું અફઘાનિસ્તાન અમારા નિયંત્રણમાં,' પંજશીર પર કબજાનો તાલિબાનનો દાવો

અહમદ મસૂદની આગેવાનીમાં પંજશીરમાં લડત (તસવીર: એપી)

Taliban in Afghanistan: તાલિબાની કમાન્ડરે કહ્યુ કે, "અલ્લાહની મહેરબાનીથી અમે આખા અફઘાનિસ્તાન પર નિયંત્રણ મેળવી લીધું છે. પરેશાની ઊભી કરતા લોકોને હરાવી દીધા છે અને પંજશીર અમારી કમાનમાં છે."

  • Share this:
    કાબુલ: અફઘાનિસ્તાનમાં તાલિબાનની સત્તા (Taliban government in Afghanistan)ની ઔપચારિક જાહેરાત પહેલા મોટા સમાચાર સામે આવ્યા છે. કહેવામાં આવી રહ્યું છે કે વિદ્રોહી સમૂહે હવે આખા અફઘાનિસ્તાન પર નિયંત્રણ મેળવી લીધું છે. અત્યાર સુધી અજેય રહેલા પંજશીર (Panjshir) પર પણ શુક્રવારે તાલિબાને કબજો કરી લીધો છે. જોકે, હજુ સુધી આ વાતની પુષ્ટિ નથી થઈ શકી. પંજશીરમાં અહમદ મસૂદ (Ahmad Massoud)ની અગેવાનીમાં તાલિબાન વિરુદ્ધ કાર્યવાહી થઈ રહી છે. આ વિસ્તારમાં મોટી સંખ્યામાં જાનહાની થઈ હોવાના સમાચાર પણ સામે આવી રહ્યા છે. બીજી તરફ તાલિબાન સામે લડી રહેલા અહમદ મસૂદે પંજશીર પર તાલિબાનના કબજાની વાતને ખોટી ગણાવી છે. તેમનું કહેવું છે કે પાકિસ્તાન મીડિયા દ્વારા ફેલાવવામાં આવી રહેલા ન્યૂઝ ખોટા છે. આ મામલે તેમનું ટ્વીટ પણ સામે આવ્યું છે.

    સમાચાર એજન્સી રૉયર્સના રિપોર્ટ પ્રમાણે પંજશીર પર પણ તાલિબાનનો કબજો થઈ ગયો છે. રિપોર્ટમાં તાલિબાનના ત્રણ સૂત્રોના હવાલેથી આ જાણકારી આપવામાં આવી છે. એક તાલિબાની કમાન્ડરે કહ્યુ કે, "અલ્લાહની મહેરબાનીથી અમે આખા અફઘાનિસ્તાન પર નિયંત્રણ મેળવી લીધું છે. પરેશાની ઊભી કરતા લોકોને હરાવી દીધા છે અને પંજશીર અમારી કમાનમાં છે." આ દરમિયાન પૂર્વ ઉપરાષ્ટ્રપ્રમુખ અમરુલ્લાહ સાહેલ (Amrullah Saleh)ને લઈને પણ સમાચાર આવ્યા છે કે તેઓ દેશ છોડીને ભાગી ગયા છે.

    રિપોર્ટ પ્રમાણે સાલેહ તરફથી આ વાતનું ખંડન કરવામાં આવ્યું છે. તેમણે ટોલો ન્યૂઝને જણાવ્યું કે તેઓએ દેશ છોડીને ભાગ્યા નથી. બીબીસી વર્લ્ડના પત્રકાર તરફથી ટ્વિટર પર એક વીડિયો શેર કરવામાં આવ્યો છે. કહેવામાં આવી રહ્યું છે કે આ વીડિયો સાલેહે જ મોકક્યો છે. આ વીડિયોમાં તેઓ કહી રહ્યા છે કે, "એ વાતમાં કોઈ શંકા નથી કે અમે મુશ્કેલીમાં છીએ. અમારા પર તાલિબાને આક્રમણ કર્યું છે...અમે તેમનો સામનો કરી રહ્યા છીએ."

    તેમણે ટ્વીટ કર્યું કે, "લડત ચાલુ છે અને ચાલુ રહેશે. હું અહીં મારી જમીન સાથે, જમીન માટે અને તેની ગરીમાની રક્ષા માટે છું." પૂર્વ ઉપરાષ્ટ્રપ્રમુખના દીકરા અબ્દુલ્લાહ સાલેહે પણ પંજશીરમાં હારના સમાચારનું ખંડન કર્યું છે. તેમણે કહ્યું, "આ જુઠ્ઠાણું છે." ઉલ્લેખનીય છે કે પંજશીરમાં હજારોની સંખ્યામાં ફાઇટર્સ વિસ્તારની સુરક્ષા કરી રહ્યા છે. તાલિબાને 15 ઓગસ્ટના રોજ કાબુલ (Kabul) પર નિયંત્રણ મેળવી લીધું હતું. જ્યારે 31 ઓગસ્ટના રોજ અમેરિકાના તમામ સૈનિકો સ્વદેશ પરત ફરી ચૂક્યા છે.

    અફઘાનિસ્તાનમાં સત્તાની ઔપચારિક જાહેરાત બાકી છે. અમુક રિપોર્ટ્સમાં તાલિબાનના સૂત્રોના હવાલેથી કહેવામાં આવ્યું છે કે તાલિબાનના ઉપ-સંસ્થાપક મુલ્લા અબ્દુલ ગની બરાદર (Mullah abdul ghani baradar) નવી અફઘાન સરકારનં નેતૃત્વ કરશે. રૉયટર્સના જણાવ્યા પ્રમાણે અફઘાનિસ્તાનની નવી સરકારની પ્રાથમિકતા અર્થવ્યવસ્થામાં સુધારો કરવાની રહેશે.



    અહમદ મસૂદે આ વાતને ખોટી ગણાવી

    તાલિબાન સામે લડી રહેલા અહમદ મસૂદે પંજશીર પર તાલિબાનના કબજાની વાતને ખોટી ગણાવી છે. અહમદ મસૂદ તરફથી કહેવામાં આવ્યું છે કે, તાલિબાન જ્યારે પંજશીર પર કબજો કરી લેશે એ દિવસ તેની જિંદગીનો અંતિમ દિવસ હશે.
    Published by:Vinod Zankhaliya
    First published: