યુક્રેન યુદ્ધ વિરુદ્ધ બોલવા પર પુતિનના ભાષણ લખનારને મોસ્ટ વોન્ટેડ જાહેર કરવામાં આવ્યો

મોસ્કો : રશિયાના રાષ્ટ્રપતિ વ્લાદિમીર પુતિન યુક્રેન યુદ્ધ પર સવાલ ઉઠાવનારાઓ પર સતત કડક વલણ અપનાવતા જોવા મળે છે. જેણે પણ રશિયા યુક્રેન યુદ્ધ વિરુદ્ધ વાત કરી અથવા શાંતિની અપીલ કરી, તેને અહીં સખત સજા ભોગવવી પડશે. ફરી એકવાર, રાષ્ટ્રપતિ વ્લાદિમીર પુતિનના ભાષણ લેખક અબ્બાસ ગાલિમોવને રશિયન પોલીસે મોસ્ટ વોન્ટેડ જાહેર કર્યા છે. તેમના પર યુક્રેન યુદ્ધને લઈને રશિયાની ટીકા કરવાનો આરોપ છે.

રશિયન મીડિયા પાસેથી મળેલી માહિતી અનુસાર અબ્બાસ ગાલિમોવનું નામ ગૃહ મંત્રાલયના ડેટાબેઝમાં મોસ્ટ વોન્ટેડ લોકોની યાદીમાં સામેલ કરવામાં આવ્યું છે. અબ્બાસ પર વિદેશી એજન્ટ હોવાનો આરોપ છે. ગયા મહિને જ રશિયાના ન્યાય મંત્રાલયે અબ્બાસને વિદેશી એજન્ટ જાહેર કર્યો હતો. મંત્રાલયે કહ્યું હતું કે, તેઓ વિદેશી એજન્ટો દ્વારા તૈયાર કરાયેલા એજન્ડાને ફેલાવે છે. તેમના પર યુક્રેન યુદ્ધની ટીકા કરીને સેનાનું સતત અપમાન કરવાનો આરોપ છે. તેણે 2008 થી 2012 દરમિયાન વ્લાદિમીર પુતિનના ભાષણો લખ્યા. તે દરમિયાન પુતિન રશિયાના વડાપ્રધાન હતા.

વિરોધ કરનારાઓ પર પુતિનની કડકાઈ

હકીકતમાં, રશિયા અને યુક્રેન વચ્ચે ચાલી રહેલા યુદ્ધની વિરુદ્ધ બોલનારાઓ પર રશિયા સતત કડક રહ્યું છે. યુદ્ધની શરૂઆતથી જ રશિયા જે લોકો રશિયાની ટીકા કરી રહ્યા છે, તેના પર નજર રાખીને કાર્યવાહી કરી રહ્યું છે. આ કરવા માટે, ઘણા લોકોને જેલમાં નાખવામાં આવ્યા છે, અને ઘણા લોકો દેશ છોડીને ચાલ્યા ગયા છે. રશિયાના મામલાઓ પર નજર રાખતા મીડિયા હાઉસ ઓવીડી-ઈન્ફો ઈંગ્લિશના મેનેજર ડેન સ્ટોરીએવે અલ્જઝીરાને આપેલા ઈન્ટરવ્યુમાં જણાવ્યું કે, છેલ્લા એક વર્ષમાં 544 સગીરોને યુદ્ધ વિરુદ્ધ લખવા, બોલવા કે, વિરોધ કરવા બદલ સજા કરવામાં આવી છે. તેણે એ પણ જણાવ્યું કે, યુદ્ધ વિરુદ્ધ હિંસક વિરોધ કરનારા ઘણા સગીરોની પોલીસે ધરપકડ કરી છે. અબ્બાસ ગાલિમોવે તાજેતરના ઈન્ટરવ્યુમાં રશિયામાં પુતિન સામે લોકોના બળવાની આશંકા પણ વ્યક્ત કરી હતી. તેમણે કહ્યું હતું કે, યુક્રેન યુદ્ધથી લોકો પરેશાન છે. રશિયા હવે ફાસીવાદી દેશમાં ફેરવાઈ ગયું છે.

આ પણ વાંચો : 'ચોર મંડળી'ના નિવેદનથી સંજય રાઉતની મુશ્કેલી વધી, વિશેષાધિકાર કેસમાં દોષિત, જાણો સમગ્ર મામલો...

પુતિન વિરુદ્ધ ધરપકડ વોરંટ જારી કરવામાં આવ્યું છે

નોંધપાત્ર વાત એ છે કે યુક્રેન પર સતત બોમ્બ ફેંકવા બદલ ઇન્ટરનેશનલ ક્રિમિનલ કોર્ટ (ICC) દ્વારા રશિયન રાષ્ટ્રપતિ વ્લાદિમીર પુતિન વિરુદ્ધ ધરપકડ વોરંટ જારી કરવામાં આવ્યું છે. વોરંટ જારી થયા બાદ પુતિનના સહયોગી અને પૂર્વ રશિયન રાષ્ટ્રપતિ દિમિત્રી મેદવેદેવે કડક ચેતવણી આપી હતી. તેમણે કહ્યું કે, પુતિનની ધરપકડ કરવાના કોઈપણ પ્રયાસને રશિયા વિરુદ્ધ યુદ્ધની ઘોષણા માનવામાં આવશે. એ પણ કહ્યું કે રશિયા કોઈપણ દેશ પર બોમ્બમારો કરી શકે છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Russia Ukraine, Speech, Vladimir putin