PM મોદી વિશ્વના સૌથી લોકપ્રિય નેતા બન્યા, બાઇડેન અને ઋષિ સુનકને છોડ્યા પાછળ

નવી દિલ્હી: વડા પ્રધાન નરેન્દ્ર મોદી ફરી એકવાર વિશ્વના સૌથી લોકપ્રિય નેતા તરીકે ક્રમાંકિત થયા છે. યુએસ સ્થિત કન્સલ્ટિંગ ફર્મ 'મોર્નિંગ કન્સલ્ટ' દ્વારા તાજેતરના સર્વેક્ષણમાં પીએમ મોદી વિશ્વમાં સૌથી વધુ 78 ટકાના એપ્રુવલ રેટિંગ સાથે લોકપ્રિય નેતાઓની યાદીમાં ટોચ પર છે. આ સર્વેમાં વિશ્વભરના 22 નેતાઓના રેટિંગનું મૂલ્યાંકન કરવામાં આવ્યું હતું અને આમાં પીએમ મોદીની રેટિંગ યુએસના રાષ્ટ્રપતિ જો બિડેન, ફ્રાંસના રાષ્ટ્રપતિ ઈમેન્યુઅલ મેક્રોન અને બ્રિટિશ વડાપ્રધાન ઋષિ સુનક સહિત અન્ય નેતાઓ કરતા ઘણી વધારે છે.

આ પોલિટિકલ ઇન્ટેલિજન્સ રિસર્ચ ફર્મે કહ્યું કે. આ 'ગ્લોબલ લીડર એપ્રૂવલ' સર્વે આ વર્ષે 26થી 31 જાન્યુઆરી વચ્ચે એકત્રિત કરવામાં આવેલા ડેટા પર આધારિત છે, જેમાં દરેક દેશના પુખ્ત રહેવાસીઓની સાત દિવસની મૂવિંગ એવરેજના સેમ્પલ સાઇઝ લેવામાં આવ્યા છે.

આ પણ વાંચો: 2019 બાદ પીએમ મોદીએ 21 વખત લીધી વિદેશની મુલાકાત, આટલા કરોડનો થયો ખર્ચ

આ સર્વેમાં પીએમ મોદીએ 78 ટકાનું એપ્રુવલ રેટિંગ હાંસલ કર્યું છે, જે યુએસ પ્રેસિડેન્ટ જો બાઈડેન કરતાં ઘણું આગળ છે, જેમને 40 ટકાનું એપ્રુવલ રેટિંગ મળ્યું છે. મેક્સિકોના પ્રેસિડેન્ટ એન્ડ્રેસ મેન્યુઅલ લોપેઝ ઓબ્રાડોર 68 ટકા એપ્રુવલ રેટિંગ સાથે બીજા ક્રમે છે, જ્યારે સ્વિસ પ્રેસિડેન્ટ એલેન બેર્સેટ 62 ટકા એપ્રુવલ રેટિંગ સાથે ત્રીજા ક્રમે છે.

ભારતની વિદેશ નીતિમાં વિશ્વમાં પડઘો

આ રિપોર્ટમાં કહેવામાં આવ્યું છે કે, વડાપ્રધાન નરેન્દ્ર મોદીના નેતૃત્વમાં ભારતની વિદેશ નીતિના ઈતિહાસમાં વર્ષ 2022 અભૂતપૂર્વ વર્ષ રહ્યું છે. આ દરમિયાન, પીએમ મોદીએ રશિયાના રાષ્ટ્રપતિ વ્લાદિમીર પુતિનને આપેલી સલાહ કે, 'આ યુદ્ધનો યુગ નથી'નો સમગ્ર વિશ્વમાં પડઘો પડ્યો હતો.

રશિયા-યુક્રેન યુદ્ધે વિશ્વને ત્રીજા વિશ્વ યુદ્ધની અણી પર મૂકી દીધું છે, દરેક દેશ એક બાજુ પસંદ કરી રહ્યા છે. જો કે, પીએમ મોદીએ સંયુક્ત રાષ્ટ્રમાં વિશ્વાસ મૂક્યો અને શાંતિનો પક્ષ પસંદ કર્યો હતો. તેમણે બંને દેશોને 'સંવાદ અને કુટનીતિ' દ્વારા સમસ્યાનું નિરાકરણ લાવવા જણાવ્યું હતું.

આ પણ વાંચો: મોદી સરકારની યોજનાઓથી ભારત ચમકવા લાગ્યું! ઈસરોના આ અહેવાલમાં ખુલાસો, જાણો વિગત

સપ્ટેમ્બરમાં શાંઘાઈ કોઓપરેશન ઓર્ગેનાઈઝેશન સમિટના પ્રસંગે પણ પીએમ મોદીએ પુનરોચ્ચાર કર્યો હતો કે, 'હવે યુદ્ધનો સમય નથી'. તેમના નિવેદનનું અમેરિકા અને અન્ય પશ્ચિમી દેશોએ સ્વાગત કર્યું હતું. ભારતની વ્યૂહરચના બહુધ્રુવીય વિશ્વમાં સત્તાની સ્પર્ધાને ટાળવાની અને પોતાનો બિન-જોડાણવાળો માર્ગ બનાવવાની હોવાનું જણાય છે.

પીએમ મોદીની લોકપ્રિયતા વધી

યુએસ-ટ્રેકિંગ ફર્મની વેબસાઈટ પર શેર કરવામાં આવેલા ડેટા અનુસાર, 78 ટકા લોકો પીએમ મોદીને પસંદ કરે છે, જ્યારે 18 ટકા લોકો તેમને નાપસંદ કરે છે. પીએમ મોદીના એપ્રુવલ રેટિંગમાં તાજેતરમાં વધુ વધારો થયો છે, જે જાન્યુઆરીના ત્રીજા સપ્તાહમાં 79 ટકા સુધી પહોંચી ગયો છે.

આ યાદી નિયમિતપણે અપડેટ કરવામાં આવે છે અને યુએસ પ્રમુખ જો બિડેન હાલમાં સાતમા સ્થાને છે. 22 રાજ્યોના વડાઓની આ યાદીમાં નોર્વેના વડાપ્રધાન જોનાસ ગહર સ્ટોર, દક્ષિણ કોરિયાના રાષ્ટ્રપતિ યૂન સોક-યુલ અને જાપાનના વડાપ્રધાન ફ્યુમિયો કિશિદા છેલ્લા ત્રણમાં સામેલ છે.

આ પણ વાંચો: Union Budget 2023: અલ્પસંખ્યક મંત્રાલયના બજેટ પર મોદી સરકારે કાતર મુકી, 40 ટકા કાપ મુક્યો

આ ઉપરાંત, ઇટાલીના નવા ચૂંટાયેલા ધુર-જમણેરી નેતા અને દેશની પ્રથમ મહિલા વડા પ્રધાન જ્યોર્જિયા મેલોની 52 ટકાના રેટિંગ સાથે 6ઠ્ઠા ક્રમે છે. ઓસ્ટ્રેલિયન વડા પ્રધાન એન્થોની અલ્બેનિસ 58 ટકા મંજૂરી રેટિંગ સાથે સર્વેમાં ચોથા સ્થાને છે. જ્યારે બ્રાઝિલના નવા ચૂંટાયેલા રાષ્ટ્રપતિ લુઇઝ ઇનાસિયો લુલા દા સિલ્વા 50 ટકા રેટિંગ સાથે 5માં સ્થાને છે. કેનેડાના વડા પ્રધાન 40 ટકા સાથે 9માં સ્થાને હતા અને યુએસ વડા પ્રધાન ઋષિ સુનક 30 ટકા સાથે 12માં સ્થાને હતા.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Jo Biden, PM Modi પીએમ મોદી, Political, Rishi Sunak