કર-નાટક : સ્પીકરે બળવાખોર ધારાસભ્યોને એક સપ્તાહનો સમય આપ્યો

કર્ણાટકમાં રાજકીય ઘમાસાણ હવે મુંબઈ, દિલ્હી એન ગોવા સુધી ફેલાઈ ચૂક્યું છે. પદ અને પાર્ટીથી રાજીનામું આપી કર્ણાટકથી મુંબઈ સોફિટેલ હોટલમાં રોકાયેલા બળવાખોર ધારાસભ્યો મોડી રાત્રે અજ્ઞાત સ્થળે પહોંચી ગયા છે. એવામાં ભાજપ પોતાની સરકાર બનાવવાનો પ્રયાસ કરી રહી છે. પૂર્વ મુખ્યમંત્રી અને ભાજપના પ્રદેશ અધ્યક્ષ બીએસ યેદિયુરપ્પાએ સીએમ કુમારસ્વામીના રાજીનામાની માંગ કરી છે. આ દરમિયાન મંગળવારે દરેકની નજર વિધાનસભા અધ્યક્ષ પર છે, જેમના હાથમાં ધારાસભ્યોના રાજીનામાનો નિર્ણય છે.

હાલમાં જ મંત્રી બનેલા કેપીજેપીના ધારાસભ્ય આર શંકરે પણ સરકારનો સાથ છોડી દીધો છે. આર શંકરના રાજીનામા બાદ હવે બળવાખોર ધારાસભ્યોની સંખ્યા 15 થઈ ગઈ છે. આ પહેલા સોમવારે અપક્ષ ધારાસભ્ય એચ નાગેશે પણ મંત્રીપદથી રાજીનામું આપી દીધું હતું. પોતાના રાજીનામા બાદ તેઓ સ્પેશલ પ્લેનથી મુંબઈ માટે રવાના થઈ ગયા હતા. એવામાં સવાલ એ ઊભો થઈ રહ્યો છે કે શું કુમારસ્વામી સરકાર હવે લઘુમતીમાં આવી ગઈ છે. જોકે, કર્ણાટક સરકાર પોતાની પાસે બહુમત હોવાનો હજુ પણ દાવો કરી રહી છે.