India-Afghan: ભારત અફઘાનિસ્તાનમાં ઘઉં મોકલશે, ગદગદ થઈ તાલિબાને બતાવ્યા વિશ્વના નેતા..

India Send wheat to Afghanistan:  ભારત સરકારે 20 હજાર મેટ્રિક ટન ઘઉં અફઘાનિસ્તાન મોકલવાની જાહેરાત કરી છે. તાલિબાન સરકારે ભારતના આ પગલાની પ્રશંસા કરતા કહ્યું કે, અમે ભારતના ખૂબ આભારી છીએ. ભારત સરકારની આ પહેલને આવકારતા અફઘાનિસ્તાને કહ્યું છે કે, આનાથી બંને દેશોના લોકો વચ્ચેના સંબંધો સુધરશે. તે જ સમયે, આ પ્રથમ વખત હશે જ્યારે ભારત અફઘાનિસ્તાનની મદદ માટે પાકિસ્તાની માર્ગોનો ઉપયોગ નહીં કરે, પરંતુ તે ઈરાનના ચાબહાર પોર્ટ દ્વારા અફઘાનિસ્તાનને મદદ મોકલશે.

ચાબહાર બંદરથી મદદ જશે

મંગળવારે પોતાના નિવેદનમાં ભારત સરકારે અફઘાનિસ્તાનને 20 હજાર મેટ્રિક ટન ઘઉં આપવાની જાહેરાત કરી છે. ભારત તરફથી એક નિવેદન આવ્યું કે, હાલમાં અફઘાનિસ્તાનમાં માનવીય સંકટ છે, તેથી અમે તેને મદદ કરવાનો નિર્ણય લીધો છે.

ઈરાનના ચાબહાર પોર્ટ દ્વારા ઘઉં અફઘાનિસ્તાન પહોંચાડવામાં આવશે. બેઠક દરમિયાન ભારતે ચર્ચા કરી હતી કે, આતંકવાદ હજુ પણ મધ્ય એશિયા માટે ખતરો છે, અને અફઘાનિસ્તાને તેની જમીનનો ઉપયોગ આતંકવાદી તાલીમ અથવા આવી કોઈપણ પ્રવૃત્તિની યોજના માટે ન કરવો જોઈએ.

ભારતે 2020માં પણ મદદ મોકલી હતી

વર્ષ 2020માં ભારતે અફઘાનિસ્તાનને 75 હજાર મેટ્રિક ટન ઘઉંની સહાય મોકલી હતી. તે દરમિયાન ભારતે રોડ માર્ગનો ઉપયોગ કરીને પાકિસ્તાનના અટારી મારફતે મદદ મોકલી હતી. જોકે, તે દરમિયાન, પાકિસ્તાને રસ્તાની મંજૂરી આપવામાં ઘણી બેદરકારી કરી હતી, જેના પર તાલિબાન સરકારે સખત વાંધો ઉઠાવ્યો હતો.

તાલિબાનના પ્રવક્તાએ આભાર વ્યક્ત કર્યો

તાલિબાનના પ્રવક્તા સુહેલ શાહીને ભારતના વખાણ કર્યા અને તેને વિશ્વના અસલી નેતા ગણાવ્યો. સાથે જ તેમણે 20 હજાર મેટ્રિક ટનની મદદ મેળવવા બદલ ભારત સરકારની પ્રશંસા કરી છે. તેમણે કહ્યું કે, 'અમે ચાબહાર પોર્ટ દ્વારા અફઘાન લોકોને 20 હજાર મેટ્રિક ટન ઘઉંની સપ્લાય કરવાના ભારત સરકારના નિર્ણયની પ્રશંસા કરીએ છીએ. આવા માનવતાવાદી પગલાં બંને દેશો વચ્ચે પરસ્પર વિશ્વાસમાં વધારો કરે છે, જે બંને દેશો વચ્ચેના સંબંધોને મજબૂત બનાવશે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Afghanistan Taliban News, Modi Cabinet, Wheat