ગંગા વિલાસ ક્રૂઝ લોન્ચ; મોદીએ વિદેશી પર્યટકોને કહ્યું- ભારતને શબ્દોથી નહિં હૃદયથી ફીલ કરીને જાણો

વારાણસીઃ ફાઈવ સ્ટાર હોટલ સુવિધાઓથી સજ્જ ગંગા વિલાસ ક્રૂઝની આજે, દેશને ગંગા વિલાસ ક્રૂઝના રૂપમાં એક નવી ભેટ મળી છે, જેના દ્વારા ભારત દર્શન કરી શકાશે. વડાપ્રધાન નરેન્દ્ર મોદીએ વીડિયો કોન્ફરન્સ દ્વારા વારાણસીમાં ગંગા નદીના કિનારે વિશ્વના સૌથી લાંબા રિવર ક્રૂઝ 'MV ગંગા વિલાસ ક્રૂઝ રૂટ'ને લીલી ઝંડી બતાવી વારાણસીથી પ્રસ્થાન કરાવ્યુ હતું.

આ સિવાય તેમણે વારાણસીમાં 'ટેન્ટ સિટી'નું ઉદ્ઘાટન કર્યું. આ દરમિયાન રવિદાસ ઘાટ પર આયોજિત ભવ્ય સમારંભમાં મુખ્યમંત્રી યોગી આદિત્યનાથ અને કેન્દ્રીય જળ બંદર મંત્રી સર્બાનંદ સોનોવાલ પણ હાજર રહ્યા હતા. કાર્યક્રમ દરમિયાન વડાપ્રધાન નરેન્દ્ર મોદીએ રૂ. 1,000 કરોડથી વધુના મૂલ્યના અન્ય કેટલાક આંતરદેશીય જળમાર્ગ પ્રોજેક્ટ્સનું ઉદ્ઘાટન અને શિલાન્યાસ પણ કર્યો હતો.

ગંગા વિલાસ ક્રૂઝ લોંચિંગ વખતે મોદીએ કરેલા ભાષણની હાઇલાઇટ્સ:

પીએમ મોદીએ કહ્યું કે 2014માં ભારતમાં માત્ર 5 રાષ્ટ્રીય જળમાર્ગો હતા, આજે 24 રાજ્યોમાં 111 રાષ્ટ્રીય જળમાર્ગો વિકસાવવાનું કામ ચાલી રહ્યું છે. આમાંથી લગભગ બે ડઝન જળમાર્ગો પર સેવાઓ ચાલી રહી છે. ગંગા પર બની રહેલો રાષ્ટ્રીય જળમાર્ગ સમગ્ર દેશ માટે એક મોડેલની જેમ વિકાસ કરી રહ્યો છે. આ રાષ્ટ્રીય જળમાર્ગ પરિવહન, વેપાર અને પર્યટન માટે મહત્વપૂર્ણ માધ્યમ બની રહ્યો છે.

પીએમ મોદીએ કહ્યું કે આ ક્રૂઝ 25 અલગ-અલગ નદીઓમાંથી પસાર થશે અને જેઓ ભારતના સમૃદ્ધ ભોજનનો અનુભવ કરવા માગે છે તેમના માટે પણ આ એક શ્રેષ્ઠ તક છે. એટલે કે આ પ્રવાસમાં આપણને ભારતની ધરોહર અને આધુનિકતાનો અદ્ભુત સંગમ જોવા મળશે. 21મી સદીનો આ દાયકો ભારતમાં ઈન્ફ્રાસ્ટ્રક્ચર કાયાકલ્પનો દાયકા છે. આ દાયકામાં ભારતના લોકો આધુનિક ઈન્ફ્રાસ્ટ્રક્ચરનું તે ચિત્ર જોવા જઈ રહ્યા છે, જેની કલ્પના કરવી મુશ્કેલ હતી.

પીએમ મોદીએ કહ્યું કે ગંગાજી આપણા માટે માત્ર એક જળપ્રવાહ નથી, પરંતુ પ્રાચીન સમયથી ભારતની આ મહાન ભૂમિની તપસ્યા અને તપના સાક્ષી છે. ભારતની સ્થિતિ ગમે તે હોય, મા ગંગાએ હંમેશા કરોડો ભારતીયોનું પાલન-પોષણ કર્યું છે. ક્રુઝ ટુરીઝમનો આ નવો તબક્કો આ ક્ષેત્રમાં આપણા યુવા સાથીઓને રોજગાર-સ્વ-રોજગારીની નવી તકો આપશે. આ ચોક્કસપણે વિદેશી પ્રવાસીઓ માટે આકર્ષણનું કેન્દ્ર બનશે, દેશના પ્રવાસીઓ કે જેઓ અગાઉ આવા અનુભવો માટે વિદેશ જતા હતા… તેઓ પણ હવે પૂર્વ-ઉત્તર પૂર્વ ભારત તરફ વળી શકશે.

પીએમ મોદીએ વારાણસીથી ગંગા વિલાસ ક્રૂઝ રવાના થયા બાદ વર્ચ્યુઅલ કાર્યક્રમને સંબોધિત કર્યો હતો. આ દરમિયાન પીએમ મોદીએ વિદેશી મહેમાનો અને પર્યટકોને સંબોધતા કહ્યું કે ભારતમાં તે બધું છે જેની તમે કલ્પના કરી શકો. ભારતમાં એવું પણ છે, જેની તમે કલ્પના પણ ન કરી શકો. પીએમ મોદીએ વધુમાં કહ્યું કે ભારતને શબ્દોમાં વર્ણવી શકાય તેમ નથી, તેને હૃદયથી અનુભવવું પડે છે.

પીએમ મોદીએ કહ્યું કે આજે લોહરીનો ઉત્સાહપૂર્ણ તહેવાર છે. આગામી દિવસોમાં અમે ઉત્તરાયણ, મકરસંક્રાંતિ, ભોગી, બિહુ, પોંગલ જેવા અનેક તહેવારોની ઉજવણી કરીશું. હું દેશ અને દુનિયામાં આ તહેવારોની ઉજવણી કરનારા લોકોને અભિનંદન આપું છું. આજે કાશીથી ડિબ્રુગઢ વચ્ચે વિશ્વની સૌથી મોટી નદીના પાણીની યાત્રા 'ગંગા વિલાસ' ક્રૂઝ શરૂ થઈ ગઈ છે. આ કારણે પૂર્વ ભારતના ઘણા પ્રવાસન સ્થળો વિશ્વ પ્રવાસન નકશામાં વધુ આગવી રીતે આવવાના છે.

51 દિવસમાં 3,200 કિલોમીટરનું અંતર કાપશે ક્રુઝ

એમવી ગંગા વિલાસ વારાણસીથી તેની મુસાફરી શરૂ કરશે અને 51 દિવસમાં લગભગ 3,200 કિલોમીટરનું અંતર કાપશે અને બાંગ્લાદેશ થઈને આસામના ડિબ્રુગઢ પહોંચશે. આ ક્રૂઝ દરમિયાન ભારત અને બાંગ્લાદેશમાંથી પસાર થતી 27 નદી પ્રણાલીઓ દ્વારા તેના ગંતવ્ય સ્થાન પર પહોંચશે. આ ગંગા વિવાસ ક્રૂઝ દ્વારા 50 પર્યટન સ્થળોને જોડવામાં આવશે. વિદેશી પર્યટકો રિવર ક્રુઝ 'ગંગા વિલાસ'માં મુસાફરી કરવા વારાણસી પહોંચ્યા છે અને તેમની પ્રથમ બેચ આજે રવાના થશે.

વારાણસીમાં પણ ટેન્ટ સિટી શરૂ કરવામાં આવી રહી છે

વારાણસી ડેવલપમેન્ટ ઓથોરિટી (VDA)ના વાઇસ પ્રેસિડેન્ટ અભિષેક ગોયલે કહ્યું કે ટેન્ટ સિટીમાં પ્રવાસીઓની સુવિધા અને સલામતી માટે ખાસ કાળજી લેવામાં આવી છે. ટેન્ટ સિટીના ક્લસ્ટરમાં 200 વ્યક્તિઓ માટે રહેવાની સુવિધા હશે. તેમાં સ્વિસ કોટેજ, રિસેપ્શન એરિયા, ગેમિંગ ઝોન, રેસ્ટોરન્ટ, ડાઇનિંગ એરિયા, કોન્ફરન્સ સ્થળ, સ્પા અને યોગ સેન્ટર, લાઇબ્રેરી અને આર્ટ ગેલેરી ઉપરાંત વોટર સ્પોર્ટ્સ, કેમલ, હોર્સ રાઇડિંગ વગેરે અને અન્ય સાંસ્કૃતિક અને રમતગમતની પ્રવૃત્તિઓ હશે.

આ પણ વાંચોઃ વિદેશી પર્યટકોને ખૂબ પસંદ છે ગંગા વિલાસ ક્રૂઝ, 5 વર્ષ માટે 60 ટકા સ્યૂટ બુક

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Cruise, River ganga, River ganga water