Joshimath Tragedy: લોકોની સુરક્ષા કરો, અભ્યાસ કરો; PMOએ 7 કેન્દ્રીય સંસ્થાઓને સ્પષ્ટ સૂચના આપી

જોશીમઠઃ ઉત્તરાખંડના જોશીમઠમાં ભૂસ્ખલનને ધ્યાનમાં રાખીને રવિવારે વડાપ્રધાન કાર્યાલય (PMO)માં ઉચ્ચ સ્તરીય બેઠક યોજાઈ હતી. આ બેઠકમાં સરકારે સાત કેન્દ્રીય સંસ્થાઓને સ્પષ્ટ માર્ગદર્શિકા આપી હતી. સરકારે કહ્યું કે સૌથી પહેલા 350 મીટરની ખતરનાક ત્રિજ્યામાં રહેતા લોકોને સુરક્ષિત સ્થાનો પર લઈ જાઓ. તેમના માટે કામચલાઉ ઘર બનાવો. નેશનલ ડિઝાસ્ટર મેનેજમેન્ટ ઓથોરિટી (NDMA) અને નેશનલ ઇન્સ્ટિટ્યૂટ ઑફ ડિઝાસ્ટર મેનેજમેન્ટ (NIDM) રાજ્ય સરકારને વ્યૂહરચના ઘડવામાં મદદ કરશે. જ્યારે સેન્ટ્રલ બિલ્ડિંગ રિસર્ચ ઇન્સ્ટિટ્યૂટ (CBRI) લોકોના અસ્થાયી મકાનોની ડિઝાઇન કરશે.

બીજી પ્રાથમિકતા શહેરમાં ક્યાંથી પાણી લીક થઈ રહ્યું છે તે શોધવાની છે. નેશનલ ઇન્સ્ટિટ્યૂટ ઓફ હાઇડ્રોલોજીને લીક શોધવા માટે કહેવામાં આવ્યું છે. આ પાણી જમીનમાંથી નીકળી રહ્યું છે. એવું માનવામાં આવે છે કે, આ લીક થયેલા પાણીનો સંબંધ ઘરો અને મેદાનોમાં પડેલી તિરાડો સાથે છે. રૂરકી IIT નિષ્ણાતો જોશીમઠની માટીનું પરીક્ષણ કરશે. તેઓએ ઘણી જગ્યાએથી લીક થયેલા પાણીના સેમ્પલ લીધા છે.

ભૂકંપની ગતિવિધિઓ પર નજર રાખવામાં આવશે

પીએમઓએ પોતાના નિવેદનમાં કહ્યું કે, તમામ સાત સંસ્થાઓએ ઉત્તરાખંડ સરકાર સાથે મળીને કામ કરવું જોઈએ. સમય મર્યાદામાં પૂર્ણ કરવાની યોજના બનાવવી જોઈએ. ભૂકંપ જેવી હિલચાલ પર સતત નજર રાખવી જોઈએ. વાડિયા ઇન્સ્ટિટ્યૂટ ઑફ હિમાલયન જીઓલોજી (WIHG) ભૂકંપની ગતિવિધિઓ પર નજર રાખશે. આ સંસ્થા ભૂ-ભૌતિક અભ્યાસ પણ કરશે. આ ઉપરાંત જિયોલોજિકલ સર્વે ઓફ ઈન્ડિયા (GSI) પણ જોશીમઠમાં આ દિશામાં કામ કરશે.

આ પણ વાંચોઃ નિષ્ણાત સમિતિએ જોશીમઠમાં ભૂસ્ખલન થવાના કારણો જણાવ્યાં

જોશીમઠના 600 ઘરો જોખમી ક્ષેત્રમાં

ઉલ્લેખનીય છે કે, ઉત્તરાખંડની સ્થિતિ જાણવા માટે બોર્ડર મેનેજમેન્ટના સચિવ અને NDMAના સભ્યો સોમવારે વિસ્તારોની મુલાકાત લેશે. અહીં ઉત્તરાખંડના મુખ્યમંત્રી પુષ્કર ધામીએ પહેલાંથી જ લોકોને વિસ્થાપિત કરવાના આદેશ જારી કર્યા છે. કહેવામાં આવી રહ્યું છે કે, અહીં 600 ઘરો જોખમી ક્ષેત્રમાં છે. તેમની તપાસ બાદ જે રિપોર્ટ આવશે તે મુજબ સરકાર આ મકાનોને તોડી પાડવાનો નિર્ણય લેશે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Dehradun, Uttarakhand news