કોરોના કેસની સુપરફાસ્ટ સ્પીડે વધારી ચિંતા, કયા રાજ્યમાં શું છે પરિસ્થિતિ, જાણો શું છે પ્રતિબંધ

નવી દિલ્હી: દેશમાં કોરોનાનાં કેસમાં 11 અઠવાડિયામાં સતત ઘટાડા બાદ ગત બે અઠવાડિયાથી દર્દીઓની સંખ્યા ફરીથી વધતી જઇ રહી છે. ગત ત્રણ દિવસથી તો સતત 2500થી વધુ કેસ આવી રહ્યાં છે. 18થી 24 એપ્રિલની વચ્ચે જ 15,700થી વધુ નવાં દર્દીઓ સામે આવ્યાં છે. ગત અઠવાડિયે તેમાં 95 ટકાનો વધારો થયો છે. કોવિડ કેસમાં વધારો હવે 12થી વધુ રાજ્યોમાં થઇ ગયો છે. જે ગત અઠવાડિયે માત્ર ત્રણ રાજ્યોમાં હતો. આ બાદ ઘણાં રાજ્યોએ ફરીથી પ્રતિબંધો લાદવાનાં શરૂ કરી દીધા છે. પરિસ્થિતિની ગંભિરતા જોતા બુધવારે વડાપ્રધાન નરેન્દ્ર મોદીએ તમામ મુખ્યમંત્રીઓ અને સ્વાસ્થ્ય મંત્રીઓ સાથે વીડિયો કોન્ફેર્સિંગ દ્વારા બેઠક પણ કરી હતી.

ગયા સપ્તાહ સુધી માત્ર દિલ્હી, હરિયાણા અને યુપીમાં કેસ વધતા જોવા મળતા હતા, પરંતુ હવે કેરળ, મહારાષ્ટ્ર, કર્ણાટક, તમિલનાડુ, બંગાળ, રાજસ્થાન અને પંજાબમાં પણ ચિંતા વધી છે. 12 રાજ્યો સિવાય, 8 રાજ્યો અથવા કેન્દ્રશાસિત પ્રદેશો એવા છે જ્યાં કેસ સતત વધી રહ્યા છે, પરંતુ હજી પણ અઠવાડિયામાં 100 થી નીચે છે. મહારાષ્ટ્રમાં ગયા સપ્તાહથી અત્યાર સુધીમાં 48 ટકા કેસ વધ્યા છે. કર્ણાટકમાં 71 ટકા, તમિલનાડુમાં 62 ટકા, બંગાળમાં 66 ટકા અને તેલંગાણામાં 24 ટકાનો ઉછાળો આવ્યો છે. ઉત્તર ભારતની વાત કરીએ તો રાજસ્થાનમાં એક સપ્તાહમાં 57 ટકા કેસ વધી ગયા છે. પંજાબમાં ગયા અઠવાડિયે 56 દર્દીઓની સંખ્યા ત્રણ ગણી થઈ છે.

દિલ્હી: સોમવારે સતત ચોથા દિવસે દિલ્હીમાં કોરોનાના 1000થી વધુ કેસ નોંધાયા છે. ચેપ દર પણ 6.42 ટકા પર પહોંચી ગયો છે. વધતા સંક્રમણને ધ્યાનમાં રાખીને માસ્ક ફરજિયાત કરવામાં આવ્યું છે. માસ્ક ન પહેરવા પર 500 રૂપિયાનો દંડ થશે. 18 થી 59 વર્ષના લોકો માટે ફ્રી બૂસ્ટર ડોઝની પણ જાહેરાત કરવામાં આવી છે.

ઉત્તર પ્રદેશ: યુપીમાં પણ કોરોનાની ઝડપે ચિંતા વધારી દીધી છે. સૌથી વધુ કેસ દિલ્હીને અડીને આવેલા ગૌતમ બુદ્ધ નગર અને ગાઝિયાબાદમાં આવી રહ્યા છે. રાજધાનીની બાજુમાં આવેલા NCRના વિસ્તારોમાં માસ્ક ફરજિયાત કરવામાં આવ્યા છે. યુપી સરકારે 1 એપ્રિલે માસ્ક પરનો પ્રતિબંધ હટાવી લીધો હતો, પરંતુ હવે તેને ફરીથી જરૂરી બનાવી દેવામાં આવ્યો છે.

હરિયાણા: દિલ્હીના પડોશી હરિયાણામાં, કોરોના ચેપ દર વધીને 5.14 ટકા થઈ ગયો છે, જે 1 એપ્રિલના રોજ 0.40 ટકા હતો. વધતા જતા કેસોને ધ્યાનમાં રાખીને, NCRમાં રાજ્યના ચાર જિલ્લા - ગુરુગ્રામ, ફરીદાબાદ, સોનીપત અને ઝજ્જરમાં માસ્ક જરૂરી બનાવવામાં આવ્યા છે.

કર્ણાટક: રાજ્યમાં કોવિડ-19 સંબંધિત નિયંત્રણો 28 ફેબ્રુઆરીથી દૂર કરવામાં આવ્યા હતા. પરંતુ હવે માસ્ક લગાવવું અને સામાજિક અંતરનું પાલન કરવું ફરજિયાત કરવામાં આવ્યું છે. જાહેર સ્થળોએ થૂંકવું એ પણ સજાપાત્ર ગુનો હશે. અહીં ચેપનો દર 1.9 ટકાને વટાવી ગયો છે.

તેલંગાણા: આ મહિનાની શરૂઆતમાં અહીં માસ્ક પ્રતિબંધ હટાવી લેવામાં આવ્યો હતો, જે હવે ફરીથી લાગુ કરવામાં આવ્યો છે. તેલંગાણામાં માસ્ક વગર જોવા પર 1000 રૂપિયાના દંડનો નિયમ છે.

તમિલનાડુ: જાહેર સ્થળોએ માસ્ક વગર જોવા મળતા લોકોને 500 રૂપિયાનો દંડ ફટકારવામાં આવ્યો છે.

આંધ્રપ્રદેશ: સરકારે ફરીથી માસ્ક પહેરવાનું ફરજિયાત બનાવ્યું છે. નિયમનો ભંગ કરનારને 100 રૂપિયાનો દંડ ફટકારવાનો નિયમ છે.

છત્તીસગઢ: સરકારે ફરી એકવાર જાહેર સ્થળોએ ફેસ માસ્ક ફરજિયાત બનાવ્યું છે. જાહેર સ્થળોએ થૂંકવા પર પણ પ્રતિબંધ મુકવામાં આવ્યો છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Corona cases, COVID-19