Mehsana: મહેસાણા શહેરની ગંદકી થશે દૂર, આટલા ટન કચરાનો નિકાલ થશે

Rinku Thakor, Mehsana: મહેસાણા શહેરનાં કચરાનો નિકાલ કરવા વહીવટી મંજૂરી આપવામાં આવી છે. મહેસાણા નગરપાલિકાને ડમ્પિંગ સાઇડ પર વર્ષોથી એકત્ર થયેલા ઘનકચરાના નિકાલ માટે પ્રાદેશિક કમિશ્નર કચેરીએથી વહીવટી મંજૂરી મળી જતાં હવે ટેન્ડર માટે કવાયત હાથ ધરાવામાં આવી છે.

અંદાજે 1.98 લાખ મેટ્રીક ટન કચરાના નિકાલ પાછળ 5.15 કરોડ ખર્ચનો અંદાજ

આ પહેલાં 15મા નાણાં પંચમાંથી 42 હજાર ટન કચરાના નિકાલ પાછળ રૂ.એક કરોડ ખર્ચાયા હતા. હવે બાકી રહેલા અંદાજે 1.98 લાખ મેટ્રીક ટન કચરાના નિકાલ પાછળ 5.15 કરોડ ખર્ચનો અંદાજ મૂકાયો છે.

નગરપાલિકાના સૂત્રોએ કહ્યું કે, પાલિકાએ આ પહેલાં 15મા નાણાંપંચમાં રૂ.એક કરોડની મર્યાદામાં પ્રતિ ટન રૂ.234ના ભાવે 42 હજાર ટન ઘનકચરાનો બાયો માઇનિંગ પદ્ધતિથી અંકલેશ્વરની માધવ એન્ટરપ્રાઇઝ એજન્સીરાહે અઢી મહિના માં નિકાલ કરાયો છે.

હજુ અંદાજે 1.80 લાખ ટનથી વધુ કચરો પડ્યો છે. તાજેતરમાં રાજ્યની તમામ પાલિકાના ચીફ ઓફિસરોની પ્રાદેશિક કમિશ્નર કક્ષાએ યોજાયેલી બેઠકમાં સરકાર દ્વારા પાલિકા વિસ્તારની ડમ્પિંગ સાઇડોથી કચરાનો નિકાલ કરવા પ્રતિ ટન ભાવ નક્કી કરવા અને ટેન્ડર બાબતે ચીફ ઓફિસરોની કમિટી બનાવાઇ હતી.

આ પણ વાંચો: ડુંગળી-બટાકાના ખેડૂતોને સહાય જાહેર કરવામાં આવશે, કેબિનેટમાં સૈદ્ધાંતિક મંજૂરીઃ ઋષિકેશ પટેલ

એકાદ વર્ષમાં મોટાભાગે ડમ્પિંગ સાઇડ પર એકત્ર થયેલા કચરાનો નિકાલ થઇ જશે.

જેમાં પ્રતિ ટન ઘનકચરાના નિકાલ માટે રૂ.260 અપસેટ કિંમત મુજબ ટેન્ડર કરવા પાલિકાઓને સૂચવાયું છે. હવે પાલિકા ટેન્ડર કરીને એજન્સી નક્કી કરશે. સંભવત: એકાદ વર્ષમાં મોટાભાગે ડમ્પિંગ સાઇડ પર એકત્ર થયેલા કચરાનો નિકાલ થઇ જશે.



રોજ નીકળતા 88 ટન કચરા નિકાલનું આગોતરું આયોજન

શહેરમાં રોજેરોજ 88 ટન ઘનકચરો ડમ્પિંગ સાઇડ પર ઠલવાય છે. ત્યારે રૂ.5.15 કરોડના ખર્ચે હાલ એકત્ર તમામ કચરાના નિકાલ પછી રોજ આવનાર 88 ટન કચરાનો રોજિંદો નિકાલ થાય તે માટે અલગથી પ્લાન નક્કી કરવા નગર પાલિકા એ એડવાન્સમાં આયોજન હાથ ધર્યું છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Cleaning, Local 18, Mahesana, Nagarpalika, Polution