Vadodara: સાવલી કોર્ટના ઇતિહાસમાં પ્રથમ વખત આરોપીને ફાંસીની સજા અપાતા કોર્ટ સંકુલમાં સન્નાટો

વડોદરા: છ વર્ષ પહેલાં બાળકનું અપહરણ (Child abduction) કરી જઇ તેની હત્યા (Murder) કરનાર આરોપીને સાવલી કોર્ટે (Savli Court) ફાંસીની સજા (Death penalty) અને જિલ્લા કાનુની સહાયતા મંડળને બાળકના પરિવારને રૂપિયા 10 લાખનું વળતર આપવાનો હુકમ કર્યો છે. નોંધનીય છે કે, સાવલી કોર્ટના ઇતિહાસમાં પ્રથમ વખત આરોપીને ફાંસીની સજા આપવાનો હુકમ કરવામાં આવ્યો છે.

આ બનાવની વિગત એવી છે કે, વર્ષ-2016માં ડેસર તાલુકાના છાલીયેર ગામના છ વર્ષના બાળકનું 20 વર્ષિય યુવાન ધીરેન્દ્રસિંહ ઠાકોર અપહરણ કરી ગયો હતો. અપહરણ બાદ ગભરાઇ ગયેલા ધીરેન્દ્રસિંહ ઠાકોરે બાળકને મોતને ઘાટ ઉતારી દીધો હતો. જે તે સમયે આ બનાવે સમગ્ર ડેસર અને સાવલી પંથકમાં સનસનાટી મચાવી મુકી હતી. દરમિયાન આ બનાવ અંગે ડેસર પોલીસે આરોપી ધીરેન્દ્રસિંહ ઠાકોર સામે અપહરણ અને હત્યાનો ગુનો દાખલ કરી ધરપકડ કરી જેલ ભેગો કરી દીધો હતો.

આ પણ વાંચો- હવામાન નિષ્ણાત અંબાલાલ પટેલની આગાહી

આ સનસનીકેજ બનાવનો કેસ સાવલીની અધિક સેસન્સ કોર્ટમાં ચાલી જતાં કોર્ટે આરોપી ધીરેન્દ્રસિંહ ઠાકોરને કસુરવાર ઠેરવી ફાંસીની સજાનો હુકમ કર્યો છે. અને ફાંસીની સજાના હુકમને બહાલી માટેનો રેકોર્ડ હાઇકોર્ટને મોકલી આપવા તજવીજ હાથ ધરી છે. તે સાથે કોર્ટે જિલ્લા કાનુની સહાયતા મંડળને મૃતક બાળકના પરિવારને રૂપિયા 10 લાખ વળતર પેટે ચૂકવવા માટે હુકમ કર્યો છે. સાવલી અધિક સેસન્સ કોર્ટના જજ જે. એ. ઠક્કરે આરોપી ધીરેન્દ્રસિંહ ઠાકોરને ફાંસીની સજાનો હુકમ કરતા કોર્ટ સંકુલમાં સન્નાટો વ્યાપી ગયો હતો.

આ પણ વાંચો- કેન્દ્ર સરકારની ગુજરાતના નાગરીકોને વધુ એક ભેટ

ઉલ્લેખનિય છે કે, સાવલી કોર્ટના ઇતિહાસમાં પ્રથમ વખત કોઇ આરોપીને ફાંસીની સજા થઇ હોય તેવો પ્રથમ કિસ્સો છે. બાળકનું અપહરણ કરીને તેની હત્યા કરવાના કેસમાં આરોપીને ફાંસીની સજાનો હુકમ કરતા છાલીયેર ગામમાં પણ સન્નાટો વ્યાપી ગયો હતો. મૃતકના પરિવારજનોએ કોર્ટે આપેલા ચુકાદા અંગે જણાવ્યું હતું કે, આજે અમારા પરિવારના બાળકને ન્યાય મળ્યો છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Gujarati news, Vadodara, વડોદરા પોલીસ, વડોદરા સમાચાર