Vadodara: જિલ્લાના અનેક ગામડાઓમાં રીંછના દેખાડા વધ્યા, આ કારણે વધ્યા રીંછ હુમલાના કિસ્સાઓ

વડોદરા:  રીંછ એકલું ફરવા ચાલ્યું હાથમાં લીધી સોટી...બાળ ગીતો અને જોડકણાંઓ માં રીંછ મામાને ખૂબ લાડ લડાવવામાં આવ્યાં છે. આ રીંછ મામા આમ તો ઊંડા જંગલમાં રહે એટલે કહેવું પડે કે મામા ( રીંછ)નું ઘર કેટલે..તો જવાબ મળે કે ઘોર જંગલમાં ગુફા દેખાય એટલું.

વડોદરા નજીક રીંછોનું સરનામું.....

વડોદરાએ દક્ષિણ અને પૂર્વના જંગલોનું પ્રવેશ દ્વાર છે અને આનંદની વાત છે કે, આપણા બાળકોના પ્રિય એવા 54 જેટલાં રીંછ મામા નજીકના છોટાઉદેપુર (કેવડી/ડોલરિયા) અને પાવીજેતપુર(કુંડળ)ના જંગલ વિસ્તારોમાં રહે છે. જ્યારે રતન મહાલ, દાહોદ (સાગટાળાં) અને જાંબુઘોડાના જંગલોમાં પણ રીંછનો વસવાટ છે.

તાજેતરમાં પાવીજેતપુરના આંબાખૂંટમાં રીંછના હુમલામાં એક ગામવાસી ગંભીર રીતે ઘવાયો....

આ ઘટના અંગે સંવાદ કરતાં છોટાઉદેપુર વન વિભાગના નાયબ વન સંરક્ષક ડો. ધવલ ગઢવીએ જણાવ્યું કે, ઘર નજીક આવેલી બોરડી પાસે એ વ્યક્તિનો રીંછથી એકાએક સામનો થયો અને તેણે હુમલો કર્યો એવું અમારું અનુમાન છે કારણ કે રીંછને ખટમીઠ્ઠા બોર ખૂબ ભાવે છે અને બોરડીઓ મોટેભાગે જંગલ વિસ્તારના ગામવાસીઓના ઘર આંગણે આવેલી હોવાથી શિયાળામાં બોરની લાલચે રીંછ માનવ વસ્તીવાળા વિસ્તારોમાં પ્રવેશે છે. ઘટના બની ત્યાં આવેલા 5 થી 6 ઘરો નજીક બોરના વૃક્ષો આવેલા છે અને હાલમાં ખૂબ બોર લાગ્યા છે. આ હુમલા પાછળ બોર ખાવાની લાલચ એક સંભવિત કારણ ગણાય. આ ગામની નજીકના જંગલોમાં 5/6 રીંછોનો વસવાટ હોવાનું અનુમાન છે.

આ પણ વાંચો: ગુજરાતમાં હજી 48 કલાક રહેશે માવઠાનો માર, જાણો ક્યારથી ફરીથી પડશે કાતિલ ઠંડી

છોટાઉદેપુર વન વિભાગે જંગલમાં રીંછની ગુફાઓની આસપાસ અને અવર જવરના રસ્તાઓ પર બોરડીઓના ઉછેરનું આયોજન કર્યું છે. તથા વન્ય પ્રાણી હુમલા સામે વળતરની યોજના હેઠળ મળવાપાત્ર રકમમાં વધારો કરવાની સાથે યાદીમાં ત્રણ વધુ પ્રાણીઓનો વન વિભાગે ઉમેરો કર્યો છે.

આ પણ વાંચો: "રસી મુકાવો અને સેલ્ફી લો"ની પહેલ આકર્ષક બની: કેલનપુરના 135 પૈકી 125 તરુણોએ પહેલા દિવસે જ કોરોના રસી લીધી

જંગલમાં બોરના વાવેતર અને ઊછેરનું આયોજન.....

આંબાખૂંટની ઘટના કમનસીબ છે અને ઇજાગ્રસ્તને વન ખાતાના નિયમો પ્રમાણે વળતર આપવાની કાર્યવાહી હાથ ધરવામાં આવશે એવી જાણકારી આપતાં ડો. ધવલે જણાવ્યું કે, શિયાળામાં રીંછ બોરથી આકર્ષાઈને ગામોમાં પ્રવેશે છે. એવા પાક્કા અનુમાન અને નિરીક્ષણને આધારે છોટાઉદેપુર વન વિભાગ ઊંડા જંગલોમાં જ્યાં રીંછની ગુફાઓ(રહેઠાણ) આવેલી છે. તેની આસપાસ અને અવર જવરના રસ્તાઓ પર અને પાણી પીવાની જગ્યાઓની આસપાસ બોરના તેમજ ફળાઉ વૃક્ષો વાવવા અને ઉછેરવાનું આયોજન કર્યું છે અને તેની સૂચના વન અધિકારીઓને આપી છે. જેનાથી ભવિષ્યમાં માનવ - વન્ય પ્રાણી સંઘર્ષ ટાળી શકાશે એવી આશા છે.


રીંછનું ફળાહારનું મેનુ...

આ પ્રાણી મુખ્યત્વે મિશ્ર આહારી છે. એટલે એને બોર ઉપરાંત મહુડાના ફૂલ, જાંબુ, કેવડી વિસ્તારમાં મળતાં ઉંબના ફળ, ગરમાળાની સિંગો, ગુલમહોરના ફૂલ અને ટીમરવા નામે ઓળખાતા ટીમરૂના ફળ એની ભાવતી વાનગી છે.

આ પૈકી બોરડી મોટેભાગે ગામોમાં જોવા મળે છે અને જંગલોમાં ભાગ્યેજ હોય છે. જ્યારે મહુડાના વૃક્ષો ગામોની સાથે આરક્ષિત જંગલવિસ્તારમાં મોટી સંખ્યામાં છે એટલે ઉનાળામાં ફૂલ ગરવાની મોસમમાં રીંછનું જોખમ ઓછું રહે છે.

આ પણ વાંચો: ગુજરાતમાં હજી 48 કલાક રહેશે માવઠાનો માર, જાણો ક્યારથી ફરીથી પડશે કાતિલ ઠંડી

રાજ્ય સરકારે વન્ય પ્રાણીઓના હુમલામાં અવસાન કે ઇજાના કિસ્સાઓમાં મળવાપાત્ર વળતરના દરો સુધાર્યા...

રાજ્ય સરકારે તાજેતરમાં ખૂબ સંવેદનશીલતા દાખવીને વન્ય પ્રાણીઓના હુમલામાં મરણના કિસ્સામાં મૃતકના પરિવારને મળવાપાત્ર તથા ઇજાના કિસ્સામાં સંબંધિત વ્યક્તિને મળવાપાત્ર સહાયની રકમમાં સારો એવો વધારો કર્યો છે. તેની સાથે આવા હુમલાઓથી પશુ મરણ અને ઇજાના કેસોમાં મળવાપાત્ર વળતર વધાર્યું છે.

આ ઉપરાંત આ યોજના હેઠળ અત્યાર સુધી વાઘ, સિંહ, દીપડો, રીંછ અને મગર એ પાંચ વન્ય જીવો દ્વારા હુમલાના કેસો જ મરણ કે ઇજાની સહાયને પાત્ર હતા.હવે તેમાં વરુ, ઝરખ અને જંગલી ભૂંડના હુમલાનો સમાવેશ કરવામાં આવ્યો છે.

રીંછના હુમલાથી કેવી રીતે બચી શકાય...

જે ગામોની આસપાસના જંગલોમાં રિંછોનો વસવાટ છે ત્યાંના લોકોએ ખાસ કરીને વહેલી સવારના 5 થી 7 વાગ્યાના આછા અજવાળામાં અને સાંજના ચાર વાગ્યા પછી ઉતરતા અંધારે અને રાત્રે જંગલોમાં જવાનું ટાળવું જોઈએ.

આ પણ વાંચો:સુરત: કપલ બોક્સમાં વધુ એક દુષ્કર્મની ઘટના, સગીરાને વાતોમાં ફસાવી લઇ ગયો હતો કાફે

જો અનિવાર્ય રીતે જવું પડે તો હાથમાં ટોર્ચ અને સ્વ બચાવ માટે લાકડી સાથે રાખવી અને એકલા જંગલમાં ન જતાં બે ત્રણ જણના ટોળામાં જવું અને સતત મોટા અવાજે વાત કરવી. શૌચક્રિયા માટે ઘણાને જંગલમાં જવાની આદત હોય છે. ઘર શૌચાલય બનાવી તેનો ઉપયોગ કરવો અને આ આદત છોડવી જરૂરી છે અને જવું જ પડે તો પૂરતું અજવાળું થાય પછી જ જવું.

જન જાગરણ સભાઓ.....

વન વિભાગ આ પ્રકારની તકેદારીઓનું લોક શિક્ષણ આપવા એ વિસ્તારના ગામોમાં જન જાગરણ સભાઓ પણ યોજે છે.

આ પણ વાંચો: Latest news: ગુજરાતમાં કોરોનાનો રાફડો ફાટ્યો, રાજ્યમાં 5396 નવા કેસ, અમદાવાદમાં 2311 કેસ

ટકોર....

મધ્ય અને પૂર્વ મધ્ય ગુજરાતના જંગલોમાં વસ્તીવાળા ગામો આવેલા છે.એટલે માનવ - પ્રાણીનો સંઘર્ષ ટાળવો જરૂરી છે. વન વિભાગ પ્રાણીઓની પ્રકૃતિ સમજીને જંગલોમાં પાણીની વ્યવસ્થા, જંગલી ફળાઉ વૃક્ષોનો ઉછેર જેવા પગલાં લે છે. જો કે નિર્દોષ વન્ય જીવોને સરહદની સમજ હોતી નથી. માણસને વન્ય જીવોની ખાલ, નખ, દાંત જેવા અંગોની લાલચ હોય છે. જો કે આ જીવોને માણસની આંખો, હાથ પગ, હૃદય, કિડની કે ચામડું - ખાલ ની લાલચ નથી હોતી. હા, માણસનો અચાનક સામનો થઈ જાય તો એ પોતાનો જીવ બચાવવા હુમલો કરી બેસે છે. એટલે જરૂરી સાવચેતી રાખવાથી જંગલમાં સલામત રહી શકાય છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Bear, Vadodara City News, વડોદરા