નડિયાદના ડભાણ પાસે ટ્રેલર ટ્રક કાચી દુકાનમાં ઘૂસી જતા લોકોમાં અફડાતફડીનો માહોલ સર્જાયો

ઉમંગ પટેલ, નડિયાદ: નડિયાદ તાલુકાના ડભાણ ગામના બસ સ્ટેન્ડ પાસેના ઢાળ નજીક ટ્રેલર ટ્રક કાચી દુકાનમાં ઘૂસતા અફડાતફડી મચી જવા પામી છે. આ બનાવમા કોઈ જાનહાનિ સર્જાઈ નહોતી પણ કાચી દુકાનના પતરા તૂટી ગયા છે. તો એક બંધ કેબીનનો લોચો વાળી દીધો છે. ડભાણ ગામ પાસેથી અમદાવાદ-મુંબઈને જોડતો નેશનલ હાઈવે પસાર થાય છે. આ હાઈવે પર છાશવારે ગમખ્વાર અકસ્માતો થાય છે. મંગળવારની બપોરે આ હાઈવેના ડભાણ ગામ પાસેના ઢાળ પરથી એક બેકાબુ ટ્રેલર ટ્રક સિધી બસ‌ સ્ટેન્ડના ઢાળ પરથી ગગડી કાચી દુકાનમાં ઘૂસી ગઈ હતી.

સ્થાનિકોના જીવ અધ્ધર થઈ ગયા

આ ટ્રેલર ટ્રકે એક બંધ કેબીનને પણ લોચો વાળી દીધો હતો. સ્થાનિકોના જણાવ્યા મુજબ ટ્રેલર ટ્રકનો ચાલક ખેડા તરફના હાઈવે પરથી ડભાણ બસ સ્ટેન્ડના ઢાળ પાસે વાહન પાર્ક કરી નજીક આવેલ દુકાને સરનામું પુછવા જતાં વાહન ચાલુ હાલતમા હોય એકાએક ઢાળ પરથી ગગડ્યુ હતુ અને સામેની કાચી દુકાન અને કેબીનમા ઘૂસી ગઈ હતી. આ બનાવમાં કોઈ જાનહાનિ સર્જાઈ નહોતી. પણ થોડા સમય માટે સ્થાનિકોના જીવ અધ્ધર થઈ ગયા હતા.

આ પણ વાંચો: ફ્રિજને કેટલા નંબર પર ચલાવવું જોઈએ? લાંબો સમય બંધ રાખવાથી થઈ શકે છે ખરાબ!

મોટી દુર્ઘટના થતા અટકી ગઈ

મહત્વનું છે કે, તે સમયે દુકાનમાં આ જગ્યા પર કોઈ વ્યક્તિ ના હોવાના કારણે મોટી દુર્ઘટના અટકી હતી. આ હાઈવેના ખેડા તરફથી આવતાં અજાણ્યા વાહન ચાલકોને નડિયાદ તરફ વળવા માટે ડભાણ ગામ પહેલા અગાઉ સાઈન બોર્ડ મુકાયું છે. જેના કારણે અજાણ્યા વાહન ચાલકો અજાણથી ડભાણ ગામનો ઢાળ ઉતરી જાય છે અને ડભાણ ગામના બસ‌ સ્ટેન્ડ વટાવી આગળ નડિયાદ તરફ વળી રહ્યા છે.

આ પણ વાંચો: બોર્ડના અધિકારીઓની સમય સૂચકતાના કારણે વિદ્યાર્થિનીનું ભવિષ્ય બગડતા અટક્યું

નક્કર પગલા ભરે તેવી ગ્રામજનોની માંગ

ઉલ્લેખનીય છે કે, અગાઉ પણ અહીંયા આવા અનેક નાના મોટા અકસ્માતો થયા છે. પરંતુ હાઇવે ઓથોરિટી દ્વારા રસ્તામાં કોઈ પણ પ્રકારના સાઈન બોર્ડના હોવાના કારણે વાહન ચાલકોને ભારે મુશ્કેલીનો સામનો કરવો પડે છે. અને ઓથોરીટી આ મામલે કોઇ નક્કર પગલા ભરે તેવી ગ્રામજનોએ માંગ કરી છે. અત્યારે તો બસ સ્ટેન્ડ પાસેના ઢાળ નજીક ટ્રેલર ટ્રક કાચી દુકાનમાં ઘૂસતા લોકોમાં અફડાતફડીનો માહોલ સર્જાયો હતો.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Gujarati news, Kheda, Nadiad