મહેમદાવાદમાં પરપ્રાંતિય યુવકને તાલિબાની સજા, ચોર સમજી ગામલોકો લાકડીથી તૂટી પડ્યાં, અંતે મોત થયું

ઉમંગ પટેલ, ખેડાઃ જિલ્લાના મહેમદાવાદ પંથકમાં આજે બીજો હત્યાનો બનાવ સામે આવ્યો છે. મહેમદાવાદ તાલુકાના સુઢા વણસોલ ગામે ગઈકાલ રાતે છત્તીસગઢના એક યુવકને ગ્રામજનોએ ચોર સમજી ગંભીર માર મારતા યુવકનું ટૂંકી સારવાર બાદ મોત નીપજ્યું છે. ત્યારે આ ઘટનાની જાણ થતા જ પોલીસકાફલો ઘટનાસ્થળે પહોંચ્યો હતો અને સમગ્ર ઘટના મામલે તપાસ હાથ ધરી હતી.

ગામ્ય વિસ્તારોમાં ચોરીની ફરિયાદોમાં ઉત્તરોત્તર વધારો થયો છે. ત્યારે મહેમદાવાદના સુઢા વણસોલ ગામે એક નિર્દોષની હત્યા કરી દેવામાં આવી છે. મળતી માહિતી અનુસાર, સુઢા વણસોલ ગામે ગત રાત્રી દરમિયાન પાસે આવેલા એક્પ્રેસ રોડ પર ભૂલો પડેલો યુવક ગામમાં આવ્યો હતો. ગ્રામજનોએ આ યુવકની પ્રથમ પૂછપરછ કરી હતી. જો કે, પરપ્રાંતિય આ યુવક જે કહેતો હતો તે ગ્રામજનો સમજી શકતા નહોતા. તેને કારણે ગ્રામજનોએ આ યુવક ગામમાં ચોરી કરવાના ઇરાદે આવ્યો હોવાનું સમજી બેઠા હતા અને યુવક પર તૂટી પડ્યા હતા. ચોર સમજી આ યુવકને ગ્રામજનોએ ગંભીર માર માર્યો હતો. તેને લઈને બેભાન થઈ ગયો હતો અને શરીરે ગંભીર ઇજાઓ પહોંચી હતી. આ દરમિયાન મહેમદાવાદ પોલીસને જાણ થતા પોલીસ રાત્રે ગામમાં દોડી ગઈ હતી અને પોલીસે તપાસ કરી આ ઘાયલ યુવકને દાખલ કર્યો હતો. ત્યારે યુવાનનું ટૂકી સારવાર બાદ તેનું મોત થયું હતું.



આ યુવકને ગ્રામજનોએ એટલી હદે માર માર્યો હતો કે, તડફડતો રહ્યો પરંતુ ગ્રામજનો દ્વારા તાલિબાની સજા આપતા હોય તેમ માર મારવાનું બંધ કર્યું નહોતું. આ ઘટનાની જાણ થતાં જ મહેમદાવાદ પોલીસે ગુનો નોંધી તપાસ હાથ ધરી હતી. આજે ગામમાં ઇન્ચાર્જ પોલીસ અધિક્ષક સહિત મોટી માત્રામાં પોલીસ કાફલો ગામમાં ખડકાઈ ગયો હતો. પોલીસ દ્વારા ગામમાં સરપંચ પાસે માહિતી મેળવી આરોપીની અટકાયત કરી આગળ ની કાર્યવાહી હાથ ધરી છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Kheda, Talibani punishment, Video viral, Viral videos