દાહોદની ચારણ કન્યા: 10 વર્ષની દીકરીએ દીપડા સામે બાથ ભીડી દાદીને બચાવ્યા

સૌરભ ગેલોત, દાહોદ: ગુજરાતમાં હાલ ચારણ કન્યા જેવી ઘટના સામે આવતા જ ઘણી ચર્ચામાં છવાઇ છે. મંગળવારે મોડી રાતે દાહોદના લીમખેડામાં 10 વર્ષની છોકરી હિરલ ચૌહાણ પોતાના ચંપા નામના દાદીને બચાવવા માટે દીપડાની સામે થઇ ગઇ હતી. મંગળવારે મોડી રાતે દાહોદના એક ગામમાં આ યુદ્ધ ચાલ્યું હતું. વન વિભાગના અધિકારીઓએ પણ આ બાળકીની હિંમતના વખાણ કર્યા હતા.

આ અંગે મળતી માહિતી પ્રમાણે, મંગળવારે રાતના સમયે લીમખેડા તાલુકાના પાડા ગામે મીઠી નિંદ્રા માણી રહેલા 60 વર્ષીય મહિલા પર દીપડાએ હુમલો કર્યો હતો. દીપડાએ દાદીને પકડતા તેમણે બૂમાબૂમ કરી હતી. જેથી તેમની બાજુમાં સુતેલી 10 વર્ષની દીકરી હિરલ અર્જુનભાઈ ચૌહાણની નિંદ્રા ખુલતા તેને પોતાની દાદીનો જીવ બચાવવા ઘણી જ મહેનત કરી હતી. પાંચમા ધોરણમાં ભણતી હિરલે પોતાની દાદીને એક તરફથી પકડી રાખીને પોતાની બહાદુરીથી દાદીનો જીવ બચાવ્યો હતો.

આ પણ વાંચો: આજે 'કેસર કેરી' 89 વર્ષની થઇ

વન વિભાગના અધિકારીએ જણાવ્યુ હતુ કે, 'આ માનવભક્ષી દીપડાને પકડવા માટે વન વિભાગના અધિકારીઓ પાડા ગામ અને તેની આસપાસના વિસ્તારમાં પાંજરા મૂક્યા છે. લિમખેડામાં છેલ્લા ચાર દિવસમાં આવો બીજો કિસ્સો છે. 21 મેની વહેલી સવારે દીપડાએ ફુલપુર ગામમાં ઘરમાં નિંદ્રાધીન બે છોકરીઓ પર હુમલો કર્યો હતો. છોકરીઓના પિતાને દીપડાની સામે બાથ ભરીને દીકરીઓને બચાવી હતી. 'આ એ જ દીપડો છે કે જેણે ચંપા નામના દાદી પર પણ હુમલો કર્યો હતો કે કેમ તે અંગે અમને કોઈ ખાતરી નથી.'



અમરેલી જિલ્લામાં આવેલા ભાણીયા ગામમાં પણ દીપડાનો આતંક સામે આવ્યો હતો. આ ઘટનામાં દીપડાએ 39 વર્ષના ખેડૂત પર હુમલો કર્યો હતો. રાતના સમયે જ્યારે તેઓ ઘર બહાર ઊંઘી રહ્યા હતા તે સમયે દીપડો ત્યાં આવી ચડ્યો હતો અને તેમના પર હુમલો કર્યો હતો. જેના કારણે તેમને માથાના ભાગમાં ગંભીર ઈજા પહોંચી હતી. તેમને તરત જ નજીકની હોસ્પિટલમાં લઈ જવાયા હતા.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Gujarat News, Leopard attack, Vadodara