રાજકોટ: 'ઓલા ભાઈ જાયશે...એ ગ્યા...એ ગ્યા..', ગરનાળામાં ધસમસતા પ્રવાહમાં વ્યક્તિ તણાયો - Live Video

રાજકોટ : શહેર તેમજ ગ્રામ્ય પંથકમાં સતત બીજા દિવસે વરસાદી વાતાવરણ યથાવત જોવા મળી રહ્યું છે. સતત વરસાદ વરસવાના કારણે જળાશયોમાં પણ નવા નીરની આવક યથાવત જોવા મળી રહી છે. તો બીજી તરફ ગત મોડી રાત્રે થી રાજકોટ શહેરમાં વરસાદી માહોલ છવાઇ જવાના કારણે રાજમાર્ગો પર પાણી ફરી વળ્યા છે તેમજ શહેરના અંડર બ્રિજ તેમજ ગરનાળાઓ સ્વિમિંગ પૂલ બની ગયા હોય તે પ્રકારના દ્રશ્યો પણ સામે આવ્યા છે.

ત્યારે પોપટપરાનું ગરનાળામાં વરસાદી પાણીથી ભરાઇ ગયું હોય તે પ્રકારના દૃશ્યો સામે આવ્યા હતા. પોપટપરાનું નાળું પાણીમાં ગરકાવ થાય તે પૂર્વે જ ગરનાળાની બને તરફ ચુસ્ત પોલીસ બંદોબસ્ત ગોઠવી દેવામાં આવે છે. જેથી કોઈ પણ રાહદારી પાણીના ધસમસતા પ્રવાહમાં ગરનાળાની એક તરફથી બીજી તરફ જવાનો પ્રયત્ન સુધ્ધા ના કરે. તેમ છતાં કેટલાક લોકો પાણીના ધસમસતા પ્રવાહ વચ્ચે પણ ગરનાળા ની એક તરફ થી બીજી તરફ જવાનો પ્રયત્ન કરતા નજરે પડતાં હોય છે.

ગત મોડી રાત્રીથી શહેરભરમાં વરસી રહેલા વરસાદના કારણે પોપટપરા નુ ગરનાળું પણ વરસાદી પાણીથી છલોછલ ભરાઇ ગયું હતું. ત્યારે પાણીના ધસમસતા પ્રવાહની વચ્ચે એક સાઈકલ ચાલક સાયકલ સાથે ગરનાળા એક તરફથી બીજી તરફ જવાનો પ્રયત્ન કરી રહ્યો હતો. આ સમયે તે પાણીના ધસમસતા પ્રવાહમાં સાયકલ સાથે તણાઈ હોવાના દૃશ્યો પણ સામે આવ્યા છે. જે દ્રશ્યો ત્યાં ઉભેલા કોઈ પ્રત્યક્ષદર્શી એ પોતાના મોબાઈલ ફોનમાં કેદ કરી લીધા હતા. ત્યારે મળતી માહિતી મુજબ સાયકલ સાથે તણાયેલ વ્યક્તિનું રેસ્ક્યુ ગરનાળાની બીજી તરફ ઉભેલા લોકોએ કર્યું હોવાનું જાણવા મળ્યું છે.

રાજકોટ: 'ઓલા ભાઈ જાયશે...એ ગ્યા...એ ગ્યા..', ગરનાળામાં ધસમસતા પ્રવાહમાં વ્યક્તિ તણાયો- Live Video pic.twitter.com/wJpo0cRSzK

— News18Gujarati (@News18Guj) September 29, 2021

ઉલ્લેખનીય છે કે થોડા દિવસો પૂર્વે રાજકોટ મનપાના ફાયર બ્રિગેડ દ્વારા પોપટપરા ના ગરનાળામાં ફસાયેલ અસ્થિર મગજના વ્યક્તિનું પણ રેસ્ક્યુ કરવાની ફરજ પડી હતી.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Gujarat rain news, Rajkot News, રાજકોટ