Morbi Bridge Collapse: પિતા-પુત્ર અને ભત્રીજાની એકસાથે અર્થી ઉઠી, બજારમાં સન્નાટો!

એક જ પરિવારના ત્રણ લોકોના મોતથી કલ્પાંત છવાયો

દૂર્ઘટના બાદ જ્યારે પિતા-પુત્ર અને ભત્રીજાની એક સાથે અર્થી ઉઠતા પરિવાર તો ઠીક પરંતુ નજરે જોનારાની આંખોમાં આંસુ આવી ગયા હતા. જ્યારે મોરબી શહેરમાં બજારો બંધ થઇ ગઇ અને સન્નાટો છવાઇ ગયો છે.

News18 Gujarati
Last Updated : October 31, 2022, 12:57 IST
Morvi (Morbi), India

મોરબી : મોરબીમાં સર્જાયેલી કરુણ ઘટનામાં અનેક પરિવારોનો માળો પળવારમાં વિખેરાઇ ગયો છે. અનેક બાળકો નોંધારા બન્યા તો કેટલાક પરિવારમાં કોઇ રહ્યું નહીં. આવો જ એક હતભાગી પરિવાર મોરબીમાં સામાકાંઠે રહતો હતો. જેમાં મકવાણા પરિવારના એક સાથે બે બાળકો સહિત ત્રણના મોતથી સમગ્ર વિસ્તારમાં શોકનું મોજુ ફળી વળ્યું છે, તો પરિવારમાં કાળો કલ્પાંત સર્જાયો છે. દૂર્ઘટના બાદ જ્યારે પિતા-પુત્ર અને ભત્રીજાની એક સાથે અર્થી ઉઠતા પરિવાર તો ઠીક પરંતુ નજરે જોનારાની આંખોમાં આંસુ આવી ગયા હતા. જ્યારે મોરબી શહેરમાં બજારો બંધ થઇ ગઇ અને સન્નાટો છવાઇ ગયો છે.

પ્રાપ્ત વિગત મુજબ મોરબીના સોઓરડી વિસ્તાર અંદર આવેલ વરિયાનગર શેરી-11માં રહેતા મહેશભાઈ વશરામભાઈ મકવાણા ઉ.વ.40 તેના પુત્ર યુવરાજ મહેશભાઈ મકવાણા ઉ.વ.12 તેમજ ભત્રીજા મકવાણા ગિરીશ જગદીશભાઈ ઉ.વ.10ને ગઈકાલે બાઇકમાં બેસાડી ઝૂલતાપૂલે ફરવા ગયા હતા. ત્યારે સાંજે અચાનક ઝૂલતાપૂલ તૂટી પડતા આ મહેશભાઈ વશરામભાઈ મકવાણા ઉ.વ.40 તેના પુત્ર યુવરાજ મહેશભાઈ મકવાણા ઉ.વ.12 તેમજ ભત્રીજા મકવાણા ગિરીશ જગદીશભાઈના નદીમાં ડૂબી જવાથી મોત નિપજ્યા હતા.

રાત્રે પુલ તૂટતાની ખબર પડતાં જ મકવાણા પરિવાર હોસ્પિટલમાં અને ઘટનાસ્થળે દોડી ગયો હતો જ્યાં વારાફરતી ત્રણેયની લાશ મળતા મકવાણા પરિવાર ઉપર દુઃખનું આભ તૂટી પડ્યું હતું આજે સવારે પિતા-પુત્ર અને ભત્રીજાની એકીસાથે સ્મશાન યાત્રા નીકળતા પરિવાર અને સગા સ્નેહીઓએ હૈયાફાટ આક્રંદ કરી મુક્તા આખો વિસ્તારમાં શોકમગ્ન બની ગયો હતો.