નવીન ઝા, સોમનાથ : વાયુ વાવાઝોડાને કારણે છેલ્લાં ઘણાં દિવસથી ગુજરાતીઓનાં જાણે શ્વાસ થંભી ગયા હતાં. ત્યારે વાયુ નામનું આફત ગુજરાત પરથી ફંટાઇને ઓમાન તરફ જતું રહ્યું છે. ત્યારે ગુજરાતીઓ સાથે તંત્રએ પણ રાહતનો શ્વાસ લીધો છે. આ કપરી પરિસ્થિતિ અંગે અમારી ટીમે ભૂપેન્દ્રસિંહ ચુડાસમા સાથે વાત કરી હતી.
જેમાં ભુપેન્દ્રસિંહ ચુડાસમાએ જણાવ્યું કે, 'કુદરતી આફત હતી અને કુદરતનાં આશીર્વાદથી તે ટળી ગઇ છે. જેથી હું અને અધિકારીઓ બધાને લઇને હું ભગવાનનાં આશીર્વાદ લેવા જઇશ. અમને ભગવાનનાં આશીર્વાદ ચોક્કસ મળ્યાં પરંતુ તેની સાથે સીએમનું આયોજન અને તંત્રની કામગીરી પણ પુરતી હતી. આ ઉપરાંત પ્રજાનો સહકાર પણ અમને મળ્યો છે. અમારા પ્રતિનીધીઓએ એક જણે પાંચ ગામ એવા 100 ગામની પ્રત્યક્ષ મુલાકાત લીધી છે. અમે વાવાઝોડાની સાથે ભારે વરસાદને પહોંચી વળવા માટેની પણ તૈયારી કરી હતી.'
ખેડૂતોનાં પાકને નુકસાન થઇ રહ્યું છે તે માટેની મદદ માટે તેમણે જણાવ્યું કે, 'અમે તાત્કાલિક સર્વે કરાવીશું. નુકસાનીનો અંદાજ કઢાવીશું અને કાયદેસરરીતે જે પણ આગળની કાર્યવાહી કરવાની રહેશે તે કરીશું.'
