બોટાદ હુમલોઃ યુવતીએ પ્રેમ પ્રકરણ છૂપાવવા તરકટ રચ્યાનો પોલીસનો દાવો

બોટાદની યુવતી પર હુમલા પ્રકરણમાં નવો જ વણાંક આવ્યો છે. પોલીસ તપાસ બાદ માલુમ પડ્યું છે કે યુવતીએ પ્રેમ-પ્રકરણને છૂપાવવા માટે તરકટ રચ્યું હતું. ગુરુવારે મીડિયામાં સમાચાર વહેતા થયા હતા કે ગઢડાની યુવતીનું અપહરણ કરવામાં આવ્યા બાદ તેનો કાન, હાથનો અંગૂઠો કાપી નાખવામાં આવ્યો હતો તેમજ તેના વાળ ખેંચી લેવામાં આવ્યા હતા. બાદમાં તેને રસ્તા પર ફેંકી દેવામાં આવી હતી.

તપાસ બાદ શું માલુમ પડ્યું?

શુક્રવારે વહેલી સવારે ગઢડા પોલીસે ઘટનાસ્થળનું નિરીક્ષણ કર્યું હતું. પોલીસને ઘટનાસ્થળેથી લોહીના ડાઘ તેમજ ડ્રીલ મશીનમાંથી યુવતીના વાળ મળી આવ્યા હતા. પોલીસ તપાસમાં બહાર આવ્યું છે કે ડ્રીલ મશીનમાં યુવતીના વાળ ફસાઈ જવાને કારણે તેને ઈજા પહોંચી હતી, જેમાં યુવતીના વાળ મૂળમાંથી ઉખડી ગયા હતા તેમજ તેના શરીરના અંગો કપાયા હતા. પોલીસ તપાસ પ્રમાણે રિનોવેશન કરવામાં આવેલી રહેલા કૂવામાં આ યુગલ બેઠું હતું.

મેવાણી અને બાવળિયાએ લધી યુવતીની મુલાકાત

દલિત નેતા તેમજ ધારાસભ્ય જિજ્ઞેશ મેવાણીએ શુક્રવારે સવારે વીએસ હોસ્પિટલ ખાતે પીડિત યુવતીની મુલાકાત લીધી હતી. મેવાણીએ ઘટનાની ન્યાયિક તપાસની માંગણી કરી હતી. બીજી તરફ કોંગ્રેસના ધારાસભ્ય તેમજ કોળી આગેવાન કુંવરજી બાવળિયા પણ વીએસ હોસ્પિટલ પહોંચ્યા હતા. તેમણે પણ આ કેસમાં નિષ્પક્ષ તપાસની માંગણી કરી હતી.

ગુરુવારે શું બહાર આવ્યું?

ગુરુવારે મીડિયામાં પ્રાથમિક રિપોર્ટ સામે આવ્યા હતા કે બુધવાર, 21 માર્ચના રોજ સવારે 11 વાગ્યે બોટાદમાંથી એક યુવતીનું અપહરણ કરવામાં આવ્યું હતું. ધોળા દિવસે દલિત યુવતીનું અપહરણ કરી તેના વાળ, કાન અને હાથનો અંગૂઠો કાપી તેને ફેંકી દેવામાં આવી હતી. બીજી તરફ પોલીસનું કહેવું હતું કે, તેણી તેના પ્રેમીને મળવા ગઈ હતી જ્યાં કૂવા પાસે એક મશીનમાં તેના વાળ ફસાઈ જવાને કારણે કાન અને અંગુઠો કપાઈ ગયા હતા. સામા પક્ષે પરિવારના સભ્યોનું કહેવું હતું કે, એક તરફી પ્રેમમાં પાગલ કોઈ છોકરાએ તેની આ હાલત કરી છે. જયારે છોકરીનો ભાઈ-માતા એવું માને છે કે તેની ઉપર લૂંટના ઇરાદે અત્યાચાર થયો છે.



પ્રેમ પ્રકરણને ઢાંકવા ઉભી કરી સ્ટોરી

ગુરુવારે મોડી રાત્રે મજિસ્ટ્રેટની હાજરીમાં પીડિતએ નિવેદન આપ્યું હતું. જેમાં યુવતીએ જણાવ્યું હતું કે, તેના પર 4 શખ્સો દ્વારા હુમલો કરવામાં આવ્યો હતો.

શું બનાવ બન્યો હતો?

બોટાદ જીલ્લાના ગઢડા તાલુકાના માંડવધારની રહેવાસી યુવતી બુધવારે બપોરે કોલેજ જવા નીકળી હતી. યુવતી બોટાદની એક બીએડ કોલેજમાં અભ્યાસ કરે છે. યુવતી તેના પ્રેમીને મળવા માટે તેના ખેતરમાં પહોંચી હતી. જ્યાં મશીનમાં તેના વાળ ફસાઈ જવાને કારણે તે ઈજાગ્રસ્ત થઈ હતી. બાદમાં તેને 108ની મદદથી ભાવનગરની સર ટી હોસ્પિટલમાં ખસેડવામાં આવી હતી. યુવતીને હાલત ગંભીર જોઈને તેને બાદમાં અમદાવાદની વી.એસ. હોસ્પિટલ ખાતે સારવાર માટે હોસ્પિટલમાં ખસેડવામાં આવી હતી.

યુવતીના પ્રેમીની અટકાયત બાદ ફૂટ્યો ભાંડો

યુવતીના અપહરણ બાદ તેને ઈજાગ્રસ્ત હાલતમાં ફેંકી દીધાના અહેવાલ બાદ પોલીસે તેના પ્રેમીની અટકાયત કરી હતી. સૂત્રોના જણાવ્યા પ્રમાણે યુવતીના પ્રેમીએ જ 108ને ફોન કર્યો હતો. પરંતુ 108 આવી પહોંચે તે પહેલા તે ત્યાંથી ભાગી ગયો હતો. આથી પોલીસે 108માં ફોન કરનારની તપાસ કરતા માલુમ પડ્યું હતું કે તે બીજો કોઈ નહીં તેનો પ્રેમી છે. પોલીસે તેની અટકાયત કરીને પૂછપરછ કરતા માલુમ પડ્યું હતું કે પ્રેમ પ્રકરણની વાત છૂપાવવા માટે અપહરણની સ્ટોરી ઘડવામાં આવી હતી.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Arrest, Love