ગિરનાર પર્વત પર 100 કિમીની ઝડપે ફૂંકાયો પવન, રોપ વે બંધ

જૂનાગઢ: રાજ્યમાં હાલ ઠંડીની સાથે પવન પણ ફૂંકાઇ રહ્યો છે. ત્યારે ગિરનાર પર્વત પર પ્રતિ કલાક 100 કિમીની ઝડપે પવન ફૂંકાઇ રહ્યો છે. જેથી પ્રવાસીઓની સુરક્ષાને ધ્યાનમાં રાખીને રોપ વે બંધ કરવામાં આવ્યો છે. પ્રવાસીઓ ગિરનારની સીડીઓ ચડવા મજબૂર થઇ રહ્યા છે. આજે આખો દિવસ રોપ વે સેવા બંધ રહે તેવી શક્યતા વ્યક્ત કરવામાં આવી છે. જેના કારણે પ્રવાસીઓ હાલાકીનો સામનો કરી શકે છે.

રોપ વે બંધ કરાતા પ્રવાસીઓને હાલાકી

ગિરનાર પર્વત પર આજ સવારથી જ પ્રવાસીઓને હાલાકીનો સામનો કરવો પડી રહ્યો છે. માતાના દર્શને આવેલા લોકોને ભારે પવનના કારણે પગથિયાં ચડવા મજબૂર બન્યા છે. ત્યાં ચાલતો રોપ વે હાલ બંધ કરી દેવામાં આવ્યો છે. જો પવનની ગતિ નરમ પડશે તો જ રોપ વે શરૂ કરવામાં આવશે. પરંતુ આજે રોપ વે શરૂ થાય તેવી શક્યતાઓ ઓછી દેખાઇ રહી છે.

આ પણ વાંચો: સુરત: પાંચમા માળની બાલ્કનીમાંથી પગ લપસતાં યુવાન પટકાયો

રાજ્યમાં હવામાન બે દિવસ યથાવત રહેશે

ગુજરાતમાં હવામાન વિભાગની આગાહી પ્રમાણે ગુજરાતમાં હાલ માવઠાની આશંકા નથી. પરંતુ આગામી ત્રણ દિવસ ઠંડીમાં રાહત મળશે નહીં. આ સાથે ગુજરાતીઓ ઠંડા પવનનો પણ અનુભવ કરી રહ્યા છે. આપને જણાવીએ કે, ગુજરાતમાં ઠંડીનો ચમકારો અનુભવાઈ રહ્યો છે જેમાં પવનની ગતિ પણ મોટો ભાગ ભજવી રહી છે. રાજ્યની હવામાનની વેબસાઈટ પર રજૂ કરાયેલી વિગતો પ્રમાણે આગામી 2 દિવસ લઘુત્તમ તાપમાન યથાવત રહેવાની સંભાવના વ્યક્ત કરવામાં આવી છે. જે બાદ 2થી 4 ડિગ્રીનો વધારો થઈ શકે છે. રાજ્યના તમામ વિસ્તારોમાં હવામાન સૂકું રહેશે અને માવઠાની કોઈ સંભાવના વ્યક્ત કરવામાં આવી નથી.

જૂનાગઢ: ભારે પવનને કારણે ગિરનાર રોપ-વે સેવા બંધ#Junagadh #Girnar #ropeway #Coldweather #Winter pic.twitter.com/9vjRzYbuEX

— News18Gujarati (@News18Guj) January 4, 2023

ઠંડીનું જોર વધવાની શક્યતા

ઉત્તર ભારતના પર્વતીય પ્રદેશોમાં હિમવર્ષા થઈ રહી છે તેને જોતા રાજ્યમાં ઠંડીનું જોર વધવાની સંભાવના વ્યક્ત કરવામાં આવી રહી છે. ત્યારે ગુજરાત હવામાન વિભાગના વડા મનોરમા મોહંતીએ આગામી દિવસમાં લઘુત્તમ તાપમાનમાં 1થી 2 ડિગ્રીનો વધારો થવાની સંભાવના વ્યક્ત કરી છે.



હાલ સવારે અને સાંજ પછીના સમયમાં લોકોને હાડ થીજવતી ઠંડીનો અહેસાસ થઈ રહ્યો છે. આવામાં, ઉત્તરાયણ નજીક આવે ત્યારે ફરી એકવાર ઠંડીનું જોર વધવાની સંભાવના વ્યક્ત કરવામાં આવી છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Girnar ropeway, ગુજરાત, જુનાગઢ