Jamnagar News: જામનગરના સિક્કામાં લાંગરેલા બાર્જ પર આગ લાગી, એક યુવકની હાલત ગંભીર

કિંજલ કારસરીયા, જામનગરઃ જામનગર નજીક સિક્કા બંદરે આવેલી જેટી પર લાંગરેલા એક બાર્જમાં વેલ્ડિંગ કામ દરમિયાન આગ લાગી હતી અને ઓઇલના કારણે આગ લાગી ગયા પછી બ્લાસ્ટ થયો હતો. જેમાં વેલ્ડિંગ કામ કરતો શ્રમિક ગંભીર રૂપે દાઝી ગયો હતો અને તેને સારવાર માટે અમદાવાદ ખસેડવામાં આવ્યો હતો. આગ લાગ્યા પછી સૌપ્રથમ DCC સિક્કાના ફાયરવિભાગનો સ્ટાફ ઘટનાસ્થળે પહોંચી ગયો હતો અને પાણીના 10 ટેન્કરોનો મારો ચલાવી આગને કાબૂમાં લીધી હતી. આઉપરાંત ટીપીએસ સિક્કા, જીએસએફસી અને રિલાયન્સ કંપનીના ફાયર ફાઈટર પણ દોડ્યા હતા. સિક્કા પોલીસે જેટી પર પહોંચીને બનાવનું પંચનામું કર્યું હતું.

યુવાન ગંભીર રીતે દાઝ્યો

મળતી માહિતી પ્રમાણે, જામનગર નજીક સિક્કા બંદરની DCC જેટી પર બિલાલ અલવાણીનું બાર્જ લાંગરવામાં આવ્યું હતું. તેમાં જેટી સાથે બાંધવા માટેના રસ્સાનો લોખંડનો ખૂંટો કે જે તૂટી ગયો હોવાથી તેમાં બપોરે એકાદ વાગ્યાના અરસામાં વેલ્ડિંગ કામ કરવામાં આવી રહ્યું હતું. ત્યારે વેલ્ડિંગનો તણખો બાર્જમાં નીચે રહેલા ઓઇલના ભાગમાં પડતાં ઓઇલ સળગવા લાગ્યું હતું અને ત્યારબાદ તેમાં ગેસ ભરાતા બ્લાસ્ટ થયું હતું. જેના કારણે વેલ્ડિંગ કરતો સિક્કાનો ફારૂક સુંભણીયા નામનો 32 વર્ષીય યુવાન ગંભીર રીતે દાઝી ગયો હતો અને તાત્કાલિક જામનગરની જીજી હોસ્પિટલ ખસેડવામાં આવ્યો હતો. ત્યારબાદ તેની તબિયત વધુ લથડતા તેને અમદાવાદ ખસેડ્યો હતો.

આ પણ વાંચોઃ દરિયાકાંઠે મરીન નેશનલ પાર્કની ટીમ હાથ ધરી ગણતરી

અનેક ફાયરફાઇટરો ઘટનાસ્થળે

બાર્જમાં આગ લાગ્યા પછી તેની બહાર ફરતે ટાયરો લગાડવામાં આવ્યા હતા. તે સળગી ઉઠ્યા હતા. જેથી ડીસીસી કંપનીની ફાયરની ટીમે દરિયામાંથી 10 જેટલા પાણીના ટેન્કરો વડે પાણીનો મારો ચલાવીને આગ કાબુમાં લીધી હતી. આ ઉપરાંત ટીપીએસ કંપની સિક્કા, જીએસએફસી કંપની તથા રિલાયન્સ કંપનીના ફાયર વિભાગને પણ જાણ કરાતાં તેઓના ફાયર સ્ટાફ પણ ઘટના સ્થળે દોડી આવ્યા હતા અને આગ બુઝાવવામાં મદદ કરી હતી. બપોરના સમયે લાગેલી આગની ઘટના પછી બે કલાક સુધી રેસ્ક્યૂ કામગીરી ચાલી હતી અને ત્રણ વાગ્યા આસપાસ સંપૂર્ણ આગ કાબુમાં આવી જતાં સર્વે હાશકારો અનુભવ્યો હતો.

આ પણ વાંચોઃ આ ટેણીયા ક્રિકેટરોની થઇ પસંદગી, કઈ ટ્રોફીમાં અને કયા જશે રમવા?

પોલીસે તપાસ હાથ ધરી

આગજનીની આ ઘટનાની જાણ થતાં સિક્કા પોલીસ સ્ટેશનના પોલીસ જમાદાર સુધીરસિંહ જાડેજા કે તેઓ ઘટના સ્થળે દોડી ગયા હતા, અને બનાવના સ્થળનું પંચનામું કર્યું હતું. જયારે દાઝી ગયેલા યુવાનને વધુ સારવાર માટે અમદાવાદ રીફર કરાવ્યો છે. તેમજ પોલીસ દ્વારા સમગ્ર આગની દુર્ઘટના અંગેનું પંચનામું કરવામાં આવી રહ્યું છે. અને કયા કારણે આગ લાગી તે અંગે તલસ્પર્શી તપાસ શરૂ કરવામાં આવી છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Jamanagar, Jamnagar News