ખેડૂતો દોડો: કિસાન સન્માન નિધિ યોજના માટે અરજીની આજે છેલ્લી દિવસ

ન્યૂઝ 18 ગુજરાતી:  કેન્દ્ર સરકાર દ્વારા ખેડૂતોની આવક વધારવાના ભાગરૂપે નાના અને સીમાંત ખેડૂત પરિવારને સહાયરૂપ થવા માટે “પ્રધાનમંત્રી કિસાન સમાન નિધિ (PM-KISAN)" યોજના અમલમાં મૂકવામાં આવી છે. આ યોજના હેઠળ કુલ ર(બે) હેકટર સુધીની જમીન ધરાવતા ખેડૂત કુટુંબને પ્રતિ વર્ષ રૂપિયા ૬૦૦૦/- ત્રણ સમાન હપ્તામાં સહાય ડાયરેક્ટ બેનિફીટ ટ્રાન્સફર (ડી.બી.ટી.) માધ્યમથી મળવાપત્ર થશે.

આ યોજના હેઠળ જમીનધારક કુટુંબ એટલે કે પતિ, પત્નિ અને સગીર બાળકો (અઢાર વર્ષથી ઓછી વયના) કે જેઓ સંયુક્ત રીતે પોતાની બે હેકટર સુધી ખેડાણલાયક જમીન ધરાવતા હોય તેઓ આ યોજનાનો લાભ મેળવી શકશે. જમીન ધારકતા અંગે તા.૧/ર/૨૦૧૯ ની સ્થિતિએ ખેડૂત તરીકે નોંધણી થયેલી હોવી જરૂરી છે.

આ યોજનાનો લાભ લેવા માટે ખેડૂતોએ સરકારના ડિજીટલ ગુજરાત પોર્ટલ ઉપર અરજી કરવાની છે. આજે (19 ફેબ્રુઆરી) છેલ્લી તારીખ છે. માટે ખેડૂતમિત્રોએ સબંધિત ગ્રામ પંચાયતના ઈ-ગ્રામ કેન્દ્ર ખાતે તલાટી-કમ-મંત્રીશ્રી, ગ્રામસેવક, વીસીઈ (ગ્રામ્ય કોમ્યુટર સાહસિક)નો સંપર્ક કરવાનો રહેશે.

તમામ ખેડૂત મિત્રોએ આ યોજનાનો લાભ મેળવવા માટે તાત્કાલિક સબંધિત ગ્રામ પંચાયત ખાતે જરૂરી સાધનિક કાગળો સાથે રૂબરૂ જઈ પોતાની ઓનલાઈન અરજી કરાવવા જિલ્લા ખેતીવાડી અધિકારી દ્વારા અનુરોધ કરવામાં આવ્યો છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Loksabha election 2019, PM Narendra Nodi, Subsidy, ખેડૂત