રાજ્યપાલે બીજેપી ધારાસભ્ય કે.જી બોપૈયાને બનાવ્યાં પ્રોટેમ સ્પીકર

કર્ણાટકમાં સૌથી મોટી પાર્ટી બનીને સામે આવેલી બીજેપીના નેતા બી. એસ. યેદિયુરપ્પાએ વિવાદો વચ્ચે ગુરૂવારે મુખ્યમંત્રી પદની શપથ લીધી છે. કર્ણાટકના રાજ્યપાલ વજુભાઇ વાળાએ બહુમતવાળા કોંગ્રેસ-જેડીએસ ગઠબંધનને સરકાર બનાવવા માટે આમંત્રિત ન કર્યા જેના કારણે કોંગ્રેસ શુક્રવારે દેશભરમાં 'લોકતંત્ર બચાવો દિવસ' ઉજવશે. કોંગ્રેસે રાજ્યપાલના નિર્ણયને લોકતત્રની હત્યા ગણાવી છે. આ વચ્ચે ખરીદીની આશંકાઓને જોતા કોંગ્રેસ અને જેડીએસએ પોતાના ધારાસભ્યોને હૈદરાબાદ મોકલી દીધા છે.

જ્યારે બીજી તરફ રાજ્યપાલના નિર્ણય સામે સુપ્રીમ કોર્ટમાં અરજી કરી છે કે જેની ઉપર આજે શુક્રવારે સવારે 10.30 કલાકે સુનાવણી થશે. આ પહેલા યેદિયુરપ્પાને શપથ લેતા રોકવા માટે કોંગ્રેસ અને જેડીએસે બુધવારે રાતે સુપ્રીમ કોર્ટમાં અરજી કરીને તરત સુનાવણીની અપીલ કરી હતી. મામલાની સુનાવણી માટે અડધી રાત પછી કોર્ટ ખુલી હતી. જસ્ટિસ એકે સીકરી, જસ્ટિસ અશોક ભૂષણ અને જસ્ટિસ બોબડેની બેંચે સુનાવણી દરમિયાન કહ્યું કે તેઓ યેદિયુરપ્પાના શપથગ્રહણને રોકી નથી શકતાં. જો કે જજોએ સરકાર બનાવવાના દાવા માટે યેદિયુરપ્પાએ રાજ્યપાલને જે પત્ર લખ્યો છે તે મંગાવવામાં આવ્યો છે. આજે આ પત્રના આધારે સુનાવણી થશે.

કર્ણાટક વિધાનસભાની 222 બેઠક પર આવેલી પરિણામોમાં ભાજપ-104, કોંગ્રેસ-78, જેડીએસ-37 અને અન્યને 2 બેઠક મળી છે. વિપક્ષની સરકાર બનશે કે બીજેપી બહુમત સાબિત કરશે એ જાણવામાં આખા દેશને રસ છે. કર્ણાટક રાજ્યપાલ વજુભાઇ વાળાએ સૌથી મોટી પાર્ટી ભાજપના નેતા યેદિયુરપ્પાને સરકાર માટે આમંત્રણ આપતાં યેદિયુરપ્પાએ ગુરૂવારે સવારે 9 કલાકે મુખ્યમંત્રી તરીકે શપથ લીધા હતા.