ગાંધીનગર: વરસાદમાં ઝાડ નીચે ઉભી રહેલી બે બહેનપણીઓ પર પડી વીજળી, એક ICUમાં, એકનું મોત

ગાંધીનગર:  બુધવારી અમાસની (Amavasya) ઢળતી સાંજે આકાશમાં વીજળીના કડાકા (rainfall and lightning in gandhinagar) ભડાકા સાથે ગાંધીનગર પંથકમાં વરસાદ વરસી રહ્યો હતો . આ સમયગાળામાં અડાલજના માણેકબા પીટીસી કૉલેજના (Manekba PTC College) ગેટ પાસેના ઝાડ નીચે ઉભી રહેલી બે વિધાર્થિનીઓ પર વીજળી પડવાની ગમખ્વાર ઘટના બની હતી. આ દૂખદ  ઘટનામાં 18 વર્ષની એક વિધાર્થિનીનું મોત નીપજ્યું છે . જ્યારે અન્ય એક યુવતીને ગાંધીનગર સિવિલ હોસ્પિટલમાં આઇસીયુમાં દાખલ કરવામાં આવી છે .

બે બહેનપણીઓ વરસાદ પડતાં ઝાડ નીચે ઉભી હતી

આ અંગે મળતી વિગતો અનુસાર, ખોરજ ખોડિયાર ગામે રહેતી 18 વર્ષીય આરતીબા જાડેજા અને નમ્રતા ઠાકોર નામની બે યુવતીઓ બુધવારે અડાલજ માણેકબા કૉલેજના ગેટ પાસે ઉભી હતી .  ત્યારે પાંચેક વાગ્યાના અરસામાં કડાકા ભડકા સાથે વરસાદ શરૂ થયો હતો. જેથી વરસાદથી બચવા બન્ને બહેનપણીઓ કોલેજના મુખ્ય પ્રવેશ દ્વાર પાસેના ઝાડ નીચે જઈને ઉભી રહી ગઇ હતી . તે વખતે અચાનક આકાશમાં જોરદાર ધડાકો થયો હતો અને વીજળી પૃથ્વી પર ઉતરી આવી હતી .

એક બહેનપણીનું મોત તો અન્ય આઇસીયુમાં

આકાશમાંથી વેરણ બની ને પડેલી વીજળીએ બંને યુવતીઓને ગંભીર રીતે ઘાયલ કરી હતી . કોલેજ છૂટવાના સમયે વીજળી પડવાથી મોટી સંખ્યામાં અન્ય વિધાર્થિનીઓ પણ ગભરાઈ ગઈ હતી . બંને બહેનપણીઓ પૈકી નમ્રતા ઠાકોર ત્યાં જ ઢળી પડી હતી . બનાવ અંગે ઈમરજન્સી 108 ને જાણ કરાતા તાત્કાલિક એમ્બ્યુલન્સ બનાવ સ્થળે દોડી આવી હતી . 108 એમ્બ્યુલન્સ દ્વારા બન્ને ને તાત્કાલિક ગાંધીનગર સિવિલ હોસ્પિટલ ખસેડવામાં આવી હતી. જ્યાં ફરજ પરના તબીબે નમ્રતાને મૃત જાહેર કરી હતી .

અન્ય વિદ્યાર્થીઓમાં શોકનો માહોલ

જ્યારે આરતીબાની હાલત ગંભીર જણાતા તેને વધુ સારવાર અર્થે આઇસીયુમાં દાખલ કરવામાં આવી છે. આ ઘટનાને પગલે કોલેજના પ્રિન્સિપાલ સહિતના સ્ટાફ કર્મચારીઓ પણ સિવિલ હોસ્પિટલ દોડી આવ્યા હતા . બનાવને લઇ કોલેજ સ્ટાફ અને અન્ય વિધાર્થીઓમાં શોક છવાઇ ગયો હતો.

આ પણ વાંચો - B.J મેડિકલ કોલેજ હોસ્ટેલ વિવાદ: આખી રાત વિદ્યાર્થિનીઓ ખુલ્લાંંમા સૂવા મજબૂર

વિસનગરમાં પણ વીજળી પડતાં મામી- ભાણેજના મોત થયા હતા

થોડા સમય પહેલા વિસનગર તાલુકાના ગણપતપુરા ગામમાં પણ આવી જ એક ઘટના ઘટી હતી. જેમા એક ખેતરમાં મામી-ભાણેજ કામ કરી રહ્યા હતા. ત્યારે વરસાદી માહોલ વચ્ચે અચાનક વીજળી પડતા બંનેના મોત થયા હતા. મામી-ભાણેજનું મોત થતા સમગ્ર પરિવારમાં શોકનો માહોલ છવાયો હતો.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Gujarat Monsoon 2021, ગાંધીનગર, ગુજરાત