ભારતની પ્રથમ બોક્સિંગ લીગમાં 'ગુજરાત જાયન્ટ્સ'નો નોક-આઉટ પંચ

અમદાવાદ : ભારતમાં રમતગમત ક્ષેત્રે ખેલાડીઓ શોધીને તેમને વિશ્વ સ્તરના ઉત્તમ ખેલાડી બનાવવાના લક્ષ્ય સાથે અદાણી ગ્રુપે તાજેતરમાં બોક્સિંગ ક્ષેત્રે પ્રવેશ કર્યો છે. અદાણી જૂથે મલ્ટી-ટીમ બોક્સિંગ લીગ- ધ બીગ બાઉટ ઈન્ડીયન બોક્સિંગ લીગની પ્રથમ એડિશન માટે ટીમ પસંદ કરી છે. અદાણીની 'ગુજરાત જાયન્ટસ'માં એશિયન ગેમ્સના ગોલ્ડ મેડલિસ્ટ અને વર્લ્ડ બોક્સિંગ ચેમ્પિયનશિપના સિલ્વર મેડાલિસ્ટ અમિત પંઘાલે પોતાની પ્રથમ 3 મેચમાં જીતની હેટ્રિક લગાવીને પોતાની ટીમને સ્પર્ધાની સેમિ ફાયનલ માટે ક્વૉલિફાય કરી છે. આ ટીમમાં સરીતા દેવી, દુર્યોધન નેગી, આશિષ કુમાર, પૂનમ, રાજેશ નરવાલ, ચિરાગ અને વિદેશી ખેલાડી તરીકે સ્કોટલેન્ડના  સ્કૉટ ફોરેસ્ટનો સમાવેશ કરાયો છે.

બોક્સિંગ અને રેસલિંગ જેવી રમતોમાં ભારત અવ્વલ

ડિસેમ્બર 21ના રોજ પૂર્ણ થનારી સ્પર્ધામાં સામેલ થયેલી 6 ટીમમાં 'ગુજરાત જાયન્ટ્સ'ને વિજેતા બનવા માટે  ફેવરિટ ગણાય છે. કબડ્ડીને સફળતાપૂર્વક લોકપ્રિય બનાવ્યા પછી અદાણી ગ્રુપની આ બીજી સ્પોર્ટસ ફ્રેન્ચાઈ છે. બોકસિંગ અને રેસલિંગ જેવી રમતોમાં પ્રવેશ પછી અદાણી ગ્રુપ ભારતમાં ઓછી જાણીતી રમતોને વ્યાપકપણે  લોકપ્રિય બનાવવા પ્રયત્નશીલ છે. અદાણી જૂથના મેનેજીંગ ડિરેકટર-ઓઈલ, એગ્રો એન્ડ ગેસ પ્રણવ અદાણી જણાવે છે કે "બોક્સિંગ અને રેસલિંગ જેવી રમતોમાં ભારત વિશ્વ સ્તરની સ્પર્ધાઓમાં ઝળકી રહ્યું છે. બીગ બાઉટ લીગમાં સામેલ થવાના અમારા વિઝન વડે અમે પાયાના સ્તરે આ રમતોને મજબૂત બનાવવા માગીએ છીએ. હું દ્રઢ પણે માનુ છું કે આ રમતો ટીવી ઉપર વધુ પ્રમાણમાં જોવાને કારણે લોકમાનસમાં લોકપ્રિય બની છે અને રાષ્ટ્રની નવી પેઢીના રમતવીરોને  પ્રેરણા પ્રાપ્ત આપી રહી છે."

ફાઈનલમાં ચોક્કસ વિજેતા બનીશું : સરિતા દેવી 

'બીગ બાઉટ લીગ'ની અન્ય ટીમમાં પંજાબ પેન્થર્સ, ઓડીશા વૉરિયર્સ, બોમ્બે બુલેટસ, એન ઈ રહીનોઝ, અને બેંગલુરૂ બ્રોલર્સ સમાવેશ થાય છે. એમસી મેરિકોમની આગેવાની હેઠળની  પંજાબ પેન્થર્સની ટીમ સામે 5-2ના સ્કોરથી અસરકારક વિજય હાંસલ કર્યા પછી ગુજરાત જાયન્ટસના સરીતા દેવી જણાવે છે કે "અમને આ વાતનો આનંદ છે કે અમે સેમી-ફાઇનલ સુધી પહોંચ્યા છીએ. આ મેચ જીતવા ટીમના તમામ સભ્યોએ જોમ બતાવ્યું હતું. અમે ફાયનલમાં ચોકકસ વિજેતા બનીશું. બધા લોકો કહેતા હતા કે મારી ઉંમર (37)ને કારણે  અને હું માતા હોવાને કારણે મારી રમતને અસર થશે. આ એક સૌથી મોટો પડકાર હતો અને ગઈ કાલે મારા હરિફોને હરાવીને મેં  તેનો જવાબ આપ્યો છો. હવે પછીની તમામ મેચ માટે અમે સખત પરિશ્રમ કરીશું. મને ખાત્રી છે કે અમે ટ્રોફી હાંસલ કરીશું."

બોકસર અમિત પંઘલ કે જેમણે  ફ્લાયવેઈટ કેટેગરીમા  તાજેતરમાં વર્લ્ડ એમેચ્યોર બોકસિંગમાં પ્રથમ ક્રમ હાંસલ કર્યો છે. ગુજરાત જાયન્ટસના ટાઈટલ ચાર્જ અને ઓલિમ્પિક 2020ની તૈયારીઓ અંગે વાત કરતાં  તેમણે જણાવ્યું હતું કે "મને આનંદ છે કે અમે મજબૂત હરિફ ગણાતી પંજાબ પેન્થર્સને પરાજય આપ્યો છે. આગામી ગેમ્સમાં અમે આના કરતાં બહેતર પરફોર્મન્સ દર્શાવીશું."

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Boxing, અદાણી, સ્પોર્ટસ