ફાફડા જલેબીનાં એક દિવસનાં સ્ટોલ ખોલવા માટે AMCની મંજૂરી લેવી પડશે

પ્રણવ પટેલ, અમદાવાદ : આજે નવરાત્રીનું (Navratri) છેલ્લુ નોરતું છે અને આવતીકાલે દેશભરમાં વિજયાદશમી (Dussehra) એટલે દશેરા ઉજવવામાં આવશે. ગુજરાતમાં તો દશેરાની સવાર ફાફડા જલેબીની સાથે જ થાય છે. ત્યારે હાલ આરોગ્ય ખાતાનાં અધિકારીઓ ફૂડ સેફ્ટી ઓફિસરોએ ફરસાણ અને મીઠાઇની દુકાનમાં કાચા માલની તપાસ કરીને નમૂના લઇ રહ્યાં છે. આ સાથે લોકોનાં સ્વાસ્થ્ય સાથે ચેડા ન થાય તે માટે એએમસીએ મહત્વનો નિર્ણય કર્યો છે. એએમસીનાં હેલ્થ અધિકારી ડૉ.ભાવિન જોષીએ જણાવ્યું કે, 'શહેરમાં રોડ રસ્તા પર ફાફડા જલેબીનાં મંડપ બનાવવા માટે આરોગ્ય વિભાગની મંજૂરી લેવી પડશે.'

આ વખતે ભાવમાં વધારો થયો છે

આ વખતે દશેરાના દિવસે ફાફડા-જલેબી ખાવા હશે તો 10થી 15 ટકા વધુ કિંમત ચૂકવવી પડશે. આ વખતે ફાફડાની કિંમત પ્રતિ કિગ્રાએ રૂપિયા 460થી રૂપિયા 520 જ્યારે જલેબીની કિંમત પ્રતિ કિગ્રાએ રૂપિયા 580થી રૂપિયા 630 ચાલી રહી છે. ફાફડા-જલેબી માટેની સામગ્રીની કિંમતમાં વધારો થતાં ફરસાણના વેપારીઓએ ફાફડા-જલેબીની કિંમતમાં પણ ભાવવધારો કરી દીધો છે.

'આ વખતે મંદીનું વાતાવરણ'

અમદાવાદ ફરસાણ એસોસિયેશને જણાવ્યું હતું કે, 'શહેરમાં ફરસાણ એસોસિયેશનના 400 સભ્યો છે. આ ઉપરાંત 3 હજાર જેટલા નોંધાયા વિનાના ફરસાણનાં વેપારીઓ છે. જેઓ ફાફડા-જલેબીનું વેચાણ કરતા હોય છે. મોટાભાગના વેપારીઓ દશેરાના બે દિવસ પહેલા મંડપ બાંધીને જ ફાફડા-જલેબીનો વેપાર શરૂ કરી દેતા હોય છે.' જોકે, આ વખતે વરસાદી માહોલ અને મંદીના વાતાવરણને કારણે ફરસાણના વેપારીઓની ચિંતામાં વધારો થયો છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Dussehra, એએમસી, ગુજરાત