અસ્થિર મગજની યુવતીની લાજ બચાવવા જતાં યુવકે જીવ ખોયો, આરોપીએ ગુપ્તાંગ પર લાતો મારી હત્યા કરી

ભરતસિંહ વાઢેર, વલસાડ: વલસાડ જિલ્લાના કપરાડામાં એક અસ્થિર મગજની યુવતીની લાજ બચાવવા જતા કપરાડા તાલુકા પંચાયતના માજી સભ્યની હત્યાનો બનાવ બન્યો છે. અસ્થિર મગજની યુવતી પર દુષ્કર્મ આચરવા આવેલા નરાધમ આરોપીએ યુવતીને બચાવવા પડેલ રામજીભાઈ વાજવડીયાને પેશાબના ભાગે માર મારી અને હત્યા કરી નાખી હતી. જો કે પોલીસે નરાધમ  આરોપીને ઝડપી સળીયા પાછળ ધકેલી દીધો છે. પરંતુ અસ્થિર મગજની યુવતીની લાજ બચાવવામાં યુવકની હત્યા થતાં પરિવાર નોંધારો બન્યો છે.

વલસાડ જિલ્લાના કપરાડાના ડુંગળી ફળિયામાં વાજવાડીયા પરિવારના મોભી અને કપરાડા તાલુકા પંચાયતના માજી સભ્ય રામજીભાઈ વાજવડીયા અને તેમના માતા સુંદરીબેન રહેતા હતા. જોકે સેવાભાવી આ પરિવાર દ્વારા બાજુના ગામની એક સ્થિર મગજની યુવતીને પોતાના ઘરે આશરો આપ્યો હતો. આથી અસ્થિર મગજની યુવતી તેમના ઘરે રહેતી હતી. જોકે આ ફળિયામાં જ રહેતા નવસુ જમશું વઢાળી નામના એક આધેડની દાનત બગડી અને તે મોડી રાત્રે અસ્થિર મગજની યુવતીની લાજ લેવાના હેતુસર વાજવડીયા પરિવારના ઘરે પહોંચ્યો હતો.

આ પણ વાંચો: સુરતનો આ યુવક Ola અને Rapido સર્વિસની ખોટી રીતે મદદ લઇ વાહન ચોરી કરતા ઝડપાયો

જ્યાં રાતના અંધકારમાં બધા સુતા હતા. એ વખતે જ નરાધમ આરોપીએ અસ્થિર મગજની યુવતીનું મોઢું દબાવી તેના પર દુષ્કર્મ આચારવાનો પ્રયાસ કર્યો હતો. જોકે યુવતીએ બૂમાબૂમ કરતા ઘરના મહિલા સભ્ય ઉઠી ગયા હતા અને બૂમાબૂમ થતાં ઘરના મોભી એવા તાલુકા પંચાયતના માજી સભ્ય રામજીભાઈ વાજડીયાએ યુવતીની લાજ બચાવવા વચ્ચે પડયા હતા. આ દરમિયાન નવસુ જમસુ અને રામજીભાઈ વચ્ચે ઝપાઝપી થઈ હતી. આ દરમિયાન આવેશમાં આવેલા નરાધમ આરોપીએ મૃતક રામજીભાઈના પેશાબના ભાગે ઉપરાછાપરી લાતો મારતા તેમનું ઘટના સ્થળ પર જ કરૂણ મોત નીપજ્યુ હતું. જોકે ત્યારબાદ આરોપી ફરાર થઈ ગયો હતો.



બનાવની જાણ થતાં જ કપરાડા પોલીસની ટીમ સ્થળ પર પહોંચી હતી. અને યુવતીની લાજ બચાવવા પડેલા યુવકની હત્યા કરનાર આરોપી નવસું જમશું વઢાળીની ધરપકડ કરી તેને સળિયા પાછળ ધકેલી દીધો છે. તેના વિરુદ્ધ કાયદેસરની કાર્યવાહી હાથ ધરી છે. જોકે આ ઘટનામાં અસ્થિર મગજની યુવતીની લાજ બચાવવા જતા સેવાભાવી માજી તાલુકા પંચાયતના સભ્યની હત્યાની ઘટનાને કારણે સમગ્ર પંથકમાં ચકચાર મચી છે. આથી નરાધમ  આરોપી નવસુને કડકમાં કડક દાખલારૂપ સજા કરવામાં આવે તેવી માંગ ઉઠી રહી છે. ત્યારે કપરાડા પોલીસે હવે આરોપીની ધરપકડ કરી તેના વિરુદ્ધ કાયદેસરની કાર્યવાહી હાથ ધરી છે.

ગુજરાતી સમાચાર નો ખજાનો એટલે News18 ગુજરાતી. ગુજરાત, દેશ વિદેશ, બોલીવુડ, સ્પોર્ટ્સ, બિઝનેસ, મનોરંજન સહિત વધુ સમાચાર વાંચો ન્યૂઝ18 ગુજરાતી પર

Tags: Valsad Crime, Valsad news, Valsad police